20 ноябралда райадминистрациялъул данделъабазул залалда т1обит1ана райсобраниялъул депутатазул иргадулаб сессия. Гьелда г1хьаллъи гьабуна районалъул бет1ерас, гьесул заместителаз, отделазул нухмалъулез, росабазул бегавулзабаз ва цогидазги.
Сессия рагьана райсобраниялъул председатель Хважа Хважаевас. Гьениб гьоркьор лъун рук1ана 2020 соналде ва плановиял 2021, 2022 соназде «Хунзахъ район» МРалъул бюджеталъул проекталъул х1акъалъулъ ва 2019 сонил 9 моц1ида жаниб районалъул бюджет т1убазабиялъул х1исаб кьей тасдикъ гьабиялъул х1акъалъулъ суалал. К1иябго суалалда хурхун баян кьуна райадминистрациялъул финансовияб отделалъул начальник Х1айдарбегов Х1айдарица. Гьесул раг1абазда рекъон т1асияб сонил районалъул бюджеталъул т1аде бач1унеб бут1а бащалъулеб буго 809, 766 млн гъурщида, гьелдасан 563,912 млн кколеб буго республикаялъулаб бюджеталдасан рач1ине кколел бюджетазда гьоркьосел трансфертал. Гьес г1ат1идго бицана гьеб г1арац кинан ва сунда харж гьабизе бугебали. К1иябго суалалъухъги г1енеккун, дандги бан, цо-цо депутатаз гьарурал т1адк1алъаялги х1исабалде росун, кидагог1адин, цок1алго, депутатаз х1укму гьабуна 2020 соналъул бюджеталъул проект къабул гьабизе ва исана 9 моц1ил бюджет т1убазабиялъул х1акъалъулъ х1исаб кьей тасдикъ гьабизе. Цо-цо санаг1алъи гьеч1ел суалал кьолел оппозициялъулал депутатал нахъе аралдаса кинаб суал ва х1укму бугониги, цок1алго, щибго бицинег1ан дандеч1ей гьеч1ого гьеб къабул гьабула райсобраниялъул депутатаз. Т1олабго улкаялдаго исполнительнияб т1алъиялъ малъа-малъарабги гьабун парламент бугеб мехалда нилъер районалдаги иш бат1айиса бук1инищха. Сессиялъул ахиралда рорхана цогидал районалъул г1умруялда, инфраструктураялда ва цогидалги гьаризе рак1алда ругел ишазда хурхарал суалалги.
|
