Г1агарлъулел руго К1удияв Расулил поэзиялъул ва «Хъах1ал къункърабазул къоял». Исана гьел къоязул цо  хаслъиги буго: гьел къояз к1одо гьабизе буго Расулица 90 сон т1убаялъул юбилей. Т1олгороссиялъул литературияб праздниклъун ва бат1и- бат1иял рагъазда хварал рак1алде  щвезарулел къояллъун лъугьарал гьел сентябралъул къояз т1олабго Дагъистаналдаса вакилзаби гурелги Россиялдасаги ва къват1исел  пачалихъаздасаги гьалбал къабул гьаризе х1адурлъулеб буго Хунзахъ т1алъи. Т1адбан унеб буго Расулие балеб бугеб мемориалияб комплексалда х1алт1и. 8 сентябралда комплекс рагьизе бук1иналда рак1чезабулеб буго гьеб балез.

Хунзахъ районалда «Расулил поэзиялъул ва «Хъвах1ал къункърабазул къоязде» х1адурлъи кин унеб бугебали бихьизе районалде бач1ун бук1ана Дагъистаналъул бет1ерасул ишал т1уралев Р. Г1абдулат1иповас бит1араб  бет1ералда Дагъистаналъул парламенталъул председателасул заместитель Н. Ю. Алчиевгун к1удияб делегация. Делегациялда гъорлъ  рук1ана Дагъистаналъул культураялъул министр З. Бутаева, жамг1ияб палатаялъул председатель Х1. Х1амзатов, Бак1алъулаб самоуправлениялъул комитеталъул председатель Б. Г1абасов ва цогидалги жавабиял г1адамал.

Гьайгьай гьел щвана К1удияв поэтасул ват1ан – Ц1адаре. Лъай-хъвай гьабуна Расулил мемориалияб комплекс баялъул х1алт1ул иналъул, щвана Ц1адаса Х1амзатил музеялде, гьеб росдал культураялъул рокъоре.

Культураялъул министр З. Бутаевалъ, гьайгьай, Расулил мемориалалъул гуребги интерес гьабуна культуриял идарабазул х1алт1улги. Гьей щвана районалъул централияб библиотекаялде,  лъималазул библиотекаялде, республикаялъул  край лъазабиялъул Хунзахъ районалда бугеб  музеялъул филиалалде. Культуриял идарабазул х1алт1удаса ц1ияй министр разиго хут1ана. Дагъистаналъул хъвадарухъабазул асараздалъун библиотекабазул фонд бечеб гьабизе ва культуриял идарабазе цогидабги кумек гьабизе раг1и кьунилан нижер мухбирасда бицана районалъул культураялъул управлениялъул начальник Мах1ач Х1асановас. Аллагьас лъик1аб хъван батаги районалъе.

Г1иса Г1исаев.