5 августалда хlалтlулаб сапаргун районалде рачlун рукlана республикаялъул Хlукуматалъул къокъа. Гьезул бетlерлъуда вукlана Хlукуматалъул Председатель Гlабдулмуслим Гlабдулмуслимов, гьесул заместитель Муслим Телякавов, Культураялъул министр Зарема Бутаева, Лъай кьеялъул министр Яхlя Бучаев, Транспорталъулгун ухазул магlишаталъул министрасул заместитель Мухlамад Тlагьиров, Экономикаялъул министрасул заместитель Шамил Гlаммаев, Федералияб Казначействоялъул Дагъистаналда бугеб управлениялъул нухмалъулев Гlабдулпатахl Гlамирханов, Халкъияб Собраниялъул депутат Хучбар Хучбаров ва цогидалги. 

Районалъул нухмалъиялъ гьалбадерида дандчlвай гьабуна районалъул гlорхъуда Бухlнатlа абулеб бакlалда. Хlалтlулаб къокъаялъул нилъер районалде сапар бухьиналъе аслияб гlилла букlана тlаде щолеб бугеб Расул Хlамзатовасул 100 сонилаб юбилеялде унеб бугеб хlадурлъиялъухъ халгьаби.
Гьедин, тlоцебе гьел щвана шагlирасул цlаралда Гlарани балеб бугеб цlияб школалде. Гьениб цlалул корпусалда гьарулел хlалтlаби рагlалде щун руго. Цо-цо кабинетазухъ байбихьун бугоан мебель бакlаризе. Хlакъикъаталдаги цlакъ берцинаб, гlатlидаб, гвангъараб ва гьаб заманалъул тlалабазе жаваб кьолеб школа лъугьун буго. Гlаммаб къагlидаялъ цlияб школалда букlине буго 308 лъимералъе бакl. Щибаб тlалаялъул къадазда ран руго Расул Хlамзатовасул творчествалъул, гьесул гlумрудул нухлул, нилъер Ватlаналъул бечедаб тарихалъул рицунел стендал. Гьалбал рази хутlана цlалул корпусалда бихьаралдаса, амма кибниги кlудияв шагlирасул рахьдал мацlалда бугеб цониги кечl батичlолъи рекlее гlечlо премьерасе. "Расул Хlамзатовасул цlаралда бараб школалда щай цониги гьесул магlарул мацlалда ругел асарал хъвараб стенд гьечlеб? Гьаб школалда аслияб кlвар кьезе ккола магlарул мацlалде, гьанир цlалулел лъималазда лъазе ккола жидерго рахьдал мацl. Шагlирасул магlарул мацlалда ругел асарал хъварал стендалги рукlине ккола гьанир", - ян абуна гьес. Хlадурун буго 126 лъимералъе бакl бугеб общежитиеги. Амма Хlукуматалъул нухмалъулесул гьениб бихьараб-таралдаса букlараб разилъи ссун ана азбар-къоноялда ва спортивияб залалъул корпусалда бугеб ахlвал-хlал бихьидал. Гьениб жеги гlураб хlалтlи бугоан. Жеги лъугlун гьечlо спортзалалда ва азбаралъул гьелда цебехун бугеб территориялда гьарулел ругел хlалтlаби. “Гьадинаб хехлъиялда хlалтlаби унел ругони, 25 ноябралдехун лъугlизеги бегьула школа. Нилъее хутlараб жо буго гlицlго цохlо моцl. Гьеб болжалалда жаниб гьабщинаб хlалтlи рагlалде бахъинабизе ккани, чанго нухалъ цlикlкlинабизе ккола гьанир ругел хlалтlухъабазул къадар ва сордо рогьаралдаса къо рукlкlинегlан хlалтlизе ккола гьел. Гурони, нилъ киналго цlакъ нечараб бакlалде ккезе руго", - ян тlадеги жубана гьес. Объект базе тlаде босараб подрядалъулаб гlуцlиялъул нухмалъулев Хlусен Хlамзатовас бицана жакъа къоялде, гlаммаб къагlидаялъ кlиябго объекталда цадахъ 120 чи хlалтlилев вугилан. 

Гьенисан киназго сапар бухьана Цlада "Хъахlал къункъраби" мемориалияб комплексалде. Делегациялъе рекlее гlуна гьенир гьарун ругел хlалтlаби, амма жеги гьабизе бугебщинаб бихьидал, гьезул гьурмал кьерхун ана. Гьанибги хlалтlухъабазул къадар цlикlкlинабизе кколин лъазабуна Гlабдулмуслим Гlабдулмуслимовас. Комплексалда тlадран унел руго жанисел ва къватlисел хlалтlаби. Гьениб реконструкция гьабизе биччан букlана 250 млн гъурущ. Гьел гlарцулал сурсатал районалде рачlун руго гlицlго апрель моцlалда.
Проекталда рекъон комплексалда рукlине руго мультимедийниял зонаби, фонтан, гъветl-хер чlун берцин гьабизе буго сверухълъи, цlи гьабизе буго экспозиция ва цогидалги хlалтlаби. Экспозициялда рихьизаризе руго шагlирасул творческияб ва гlумрудул нух, машгьураб “Къункъраби” асаралъул тарих, рукlине руго суратал, тематикиял зонаби ва цогидабги.

Гьенисан щвана райцентралда Ш. Шамхаловасул цlаралда бугеб Маданияталъулгун хlухьбахъиялъул рокъоре. Гьениб кlиабилеб тlалаялда бугеб централияб библиотекаялда унел руго “Культура” миллияб проекталда рекъон модельнияб библиотека гlуцlиялда хурхун ремонталъулал хlалтlаби. Гьедин, жакъа къоялде гьениб хисун руго чlабарал, токалъул кварал, шпатлевкаги гьабун хlадурун руго жанисел къадал. Культураялъул министр Зарема Бутаевалъ абуна кватlичlого гьанир интерактивиял touch - панелалги лъезе ругилан. Киналго хlалтlаби рагlалде рахъине кколел руго август моцl лъугlилелде. Ремонталъулал хlалтlаби унел руго тlоцебесеб тlалаялдаги. Гьенибги хисун буго чlабар, тlадеги лъезе руго канлъи ва гьаракь рекъезарулел системаби, кватlичlого бачlине буго цlияб мебельги.

Ахиралда щвана Хунзахъ гьоркьохъеб тlоцебесеб байбихьул классазул школалдеги. Исана риидалил каникулазул заманалда жаниб гьениб гьабун буго косметическияб ремонт. Амма пищеблокалъул расги лъикlаб хlал гьечlо. Рагьлил махlги бахъараб, басриябго минаялда жанир кваназе кколел руго лъимал. Школалъе цlияб пищеблок гьабизе сурсатал риччалин абуна Хlукуматалъул Председателас ва гьеб ишалда хурхун хlалтlи гьабизе байбихьеян Лъай кьеялъул министрасе тlадкъайги кьуна. Цlияб цlалул сон байбихьилелде школалъул территория ва сверухълъи берцин гьабун къачlаян лъазабуна школалъул дирекциялдаги. 

Киналго объектаздеги щун, бихьараб-таралъул хlасил гьабизеян, ахиралда райадминистрациялда тlобитlана данделъиги. “Расул Хlамзатов вукlана нилъер Дагъистан дунялалдаго машгьур гьабурав поэт гуревги, Ватlаналъул унго-унгояв патриотги. Нилъеда лъала улкаялъул Президентасул шагlирасдехун бугеб бербалагьиги ва гьесул указалдалъун поэтасул юбилей федералияб даражаялдаго кlодо гьабизе букlинги. Юбелеялда хурхун аслиял тадбирал тlоритlизе руго Хунзахъ районалда, гьанире рачlине тlолабго улкаялдасаго гьалбал. Гьединлъидал гьабсагlат нилъер цадахъаб кинабго къуват рехизе ккола тадбир тlадегlанаб даражаялда тlобитlизе хlадурлъиялде. Дир дагlба гьечlо, лъикlаб качествоялда, гlемераб хlалтlи гьабун буго районалда юбилеялде хlадурлъиялда хурхун. Амма жеги гьабизеги буго гlураб хlалтlи. Гьаб хехлъиялда хlалтlаби гьарулел ругони, юбилей тlаде щвелалде гьенир гьарулел хlалтlаби лъугlунгутlи хlакъаб жо буго. Гьединлъидал районалъул бетlерасдехун ва подрядчикасдехун дир кlудияб гьари буго гьеб хlалтlуде хасаб кlвар кьеян. Гlарцулал сурсатазда хурхун захlмалъаби рукlарал ратани, нужеца ригьдаго нижеда лъазабизе кколаан. Амма нужер рахъалдасан гьединаб гlарзаги бачlинчlо. Гьединлъидал дида ккола, гьабсагlат кинабго бараб бугин битlун хlалтlи гlуцlиялда. Нужее хlалтlухъаби гlолел ратичlони, цогидал росабалъа ва районаздасаги рачине бегьула гьел. Киналго жамгlиял бакlал рукlине ккола къачlан, гьениб чlезабун букlине ккола рацlцlа-ракъалъи. Тадбир тlаде щвелалде щибаб анкьалъ нужеца районалда тlоритlизе ккола субботникалги. Киса-кибго букlине ккола гlадлу-низам ва бакlа-бахари. Кlиго анкьидасан дунгоги вачlине вуго цогинух хlалтlухъ балагьизе”, - ян абуна Гlабдулмуслим Мухlудиновичас. 

“Ниж разиял руго жакъасеб сапаралъул хlасилалда нужеца рихьизарурал гlунгутlабаздаса ва нахъбахъичlого гьел киналго лъугlизариялда тlад хlалтlизе байбихьизе буго. Кlудияб баркала буго республикаялъул ва Хlукуматалъул нухмалъиялъе, юбилеялде хlадурлъиялда хурхун хlалтlи гьабулел министерствабазе ва цогидазеги, гьадин нижер районалде кьолеб бугеб кlваралъухъ”, - ян абуна Нурмухlамад Задиевас ахиралда.
И. Мухlамадов.