27 июлалда районалде вачlун вукlана ДРялъул Хlукуматалъул Председатель Гlабдулмуслим Гlабдулмуслимов. Гьесда цадахъ рукlана республикаялъул Хlукуматалъул тlоцевесев вице-премьер Манвел Мажонц, финансазул министр Юнус Сагlадуев, культураялъул министр Зарема Бутаева, экономикияб цебетlеялъул министрасул ишал тlуралев Гlадильхан Ахlмадов ва цогидалги жавабиял чиновникал.

Хlакимзабазул районалде сапар бухьиналъе аслияб гlиллалъун букlана тlасияб соналъ тlолабго улкаялда кlодо гьабизе бугев нилъер машгьурав ракьцояв, кlудияв поэт Расул Хlамзатов гьавуралдаса 100 сон тlубаялъул юбилеялде хlадурлъи кинан унеб бугебали халгьаби. Районалъул нухмалъигун цадахъ тlоцебе гьалбал щвана шагlирасул Ватlаналде Цlада росулъе. Гьениб кlиго машгьурав шагlирасул рукъ-музеялъул халшалги гьабун, премьерас абуна тlасияб соналде гьениб ремонт гьабизе кколилан. Гьенисан щвана “Хъахlал къункъраби” мемориалияб комплексалде. Гьелъулги реконструкция гьабизе буго ва сверухълъи берцин гьабун къачlазе буго. “Гьаб комплекс лъугьине ккола Хунзахъ районалъул визиткаялъулаб карталъун. Гьаниб аскlобго рагьизе ккола шагlирасул тlахьал, журналал, значокал ва цогидабги атрибутика бичулеб киоск. Биччанте гьанире рачlарал туристаз поэтасул творчествогун лъай-хъвай гьабизе. Гьанир гьаризе ругел хlалтlабиги лъугlизаризе ккола кlванагlан хехго, амма лъикlаб даражаялда”, - ян абуна Гlабдулмуслим Гlабдулмуслимовас.

Бицаралда рекъон, хlакъикъаталдаги гьениб гьабизе гlураб хlалтlи буго жеги. Къачlазе кколеб территориялъул гlатlилъи буго 2 га.

Гьенисан райцентралдехун рачlунаго гьалбал лъалхъана араб анкьалда Оренбургалдаса районалде хlухьбахъи гьабизе бачlун букlараб хъизангун цадахъ машина гъоркье бортараб Цlолокь кьурул рагlалда. Хlукуматалъул Председателас лъикlаб къимат кьечlо районалда туристазул хlинкъи гьечlолъи цlуниялда хурхун гьабулеб бугеб хlалтlуе. “Гьадинал бакlазда рукlине ккола киназдаго рихьулел, чиясул лагаялда бащадал хасал знакал. Узухъда, бокьарав хlал лъаларев чи вортизе рес буго гьаниса гъоркье. Нилъеца гlадамазул хlинкъи гьечlолъи цlунулеб гьечlони, кинаб туризмалъул нилъеца бицине рес бугеб?”, - ян абуна гьес.

Районалъул бетlер Нурмухlамад Задиевас бицана кватlичlого 600 метрадул манзилалда гьеб бакl сверун къазе бугилан.

Хадуб райадминистрациялда тlобитlана шагlирасул юбилеялде хlадурлъиялъул бицараб данделъи. Кlалъазе вахъарав районалъул бетlер Нурмухlамад Задиевасул, цо-цо министразул ва цогидалги жавабиязухъги гlенеккун, юбилеялде хlадурлъи унеб бугеб къагlидаялдаса рази гьечlолъи загьир гьабуна премьерас. “Нилъеда киназдаго лъала 2023 сон улкаялда Расул Хlамзатовасул сонлъун лъазабун букlин ва гьединлъидал кlудияв шагlирасул юбилеялде федералияб даражаялда кlвар кьолеб букlин. Рес буго тадбиралде живго улкаялъул Президент Владимир Путин вачlинеги. Лъагlелгlан мех хутlун буго гьелде щвезе. Амма дида гьелде хlадурун гьабураб жого бихьулеб гьечlо. Лъиего балъголъи гуро, гьеб тадбиралде хlаталдаса ун гlемерал гьалбал рачlине ругеблъи. Гьел киналго къабул гьаризе хlадурун бугищ районалъул инфраструктура? Ругищ гьезие гlураб къадаралда кваназе ва регарахъине бакlал ва цогидабги сервис? Моцlалъ цебе гьабго суалалда хурхун районалде ун вукlана республикаялъул Бетlерги. Нужеца щиб хlалтlиха гьабураб гьеб моцlида жаниб? Некlого гlуцlун букlине кколаан районалъул оргкомитет ва гьениб рукlине ккола батlи-батlиял хlалтlулал къокъаби. Щибалда хадуб бухьинабун букlине ккола цо хасаб рахъ. Жакъа къоялдаса нахъе щибаб моцlалъ, кканани-щибаб анкьалъги оргкомитеталъул данделъабиги тlоритlун, щибаб рахъалда тlад тарал жавабияздаса тlалаб гьабизе ккола гьезда тlад къан букlараб иш тlубан бугищали. Гурони нилъер иш хадуб бехъерхъун хутlун буго. Кватlичlого хаслихълъи тlаде щвела ва гьава-бакъ кьерхине буго, цинги их щвезегlан гьеб роцlине гьечlо. Щиб хlалтlи гьабизе бугеб гьел хутlарал моцlазда? Нужеда кин кlолеб лъагlалидасан нилъер Дагъистан дунялалда рагlизабурав нужерго ракьцояв шагlирасул юбилейги букlун гьадин гlодоре риччан чIезе? Бищун цебе нуж чlухlизе ккола Расул Хlамзатовги, Цlадаса Хlамзатги, Фазу Гlалиеваги, гlалимзабиги, политикалги ва цогидалги жидер цlарал цlвабзазулъ хъварал гlадамал рахъараб район нужер букlиналдаса. Бищун цебе нужецаго байбихьизе ккола гьезул цlаралги рухlияб ирсги цlунизе. Дица нужее лъикlаблъун бихьизабулеб буго исана шагlир гьавураб къоялдехун Хунзахъ районалъул гlадамазул съезд гlуцlизе. Гьелде ахlизе ккола район, республика, улка бахун къватlирехун ругелги лъикlал хъулухъазда ругел политикал, бизнесменал ва цогидалги церетlурал, рагlи билълъарал районалъул вакилзабиги. Биччанте районалъул щивав чияс гlахьаллъи гьабизе поэтасул юбилеялда. Бищун цlикlкlараб жавабчилъи буго районалъул нухмалъулесда тlад ва киналъулго жавабги гьес кьезе буго”, - ян абуна ГIабдулмуслим Мухlидиновичас.

Гьединго юбилей тlобитlиялда хурхун жидерго пикраби загьир гьаруна республикаялъул Хlукуматалъул Председателасул тlоцевесев заместитель Манвел Мажонцица, культураялъул министр Зарема Бутаевалъ, финансазул министр Юнус Сагlадуевас, Экономикияб цебетlеялъул министрасул ишал тlуралев Гlадильхан Ахlмадовас ва цогидазги.

И. Мухlамадов.