23 августалда райцентралда
халкъияб творчествалъул рокъоб щибаб санайилго г1адин т1обит1ана лъай
кьеялъул х1алт1ухъабазулаб совещание. Данделъиялда г1ахьаллъана педагогикиял х1алт1ухъаби гурелги, районалъул нухмалъулелги, т1аде рач1арал гьалбалги.
Т1аде щолеб бугеб ц1ияб ц1алул сонги баркулаго, лъай кьеялъулъ церет1еялги
бергьенлъабиги педагогазеги гьарулаго районалъул бет1ерасул ишал т1уралев С. Юсуповас абуна лъай кьеялде жеги ц1ик1к1араб к1вар кьезе бугин,
ц1ик1к1араб х1алт1и гьабизе бугин пагьму гьунар бугел лъимал т1атинаризелъун ва
гьезулгун гьабулеб х1алт1удеги к1вар буссинабизе бугилан.
Баркиялдаса хадуб С. Юсуповасги РУОялъул начальник З.
Г1умаровасги лъай кьеялъулъ рихьизарурал
рахъи ц1ик1к1арал х1асилазухъ «РФялъул
лъай кьеялъул х1урматияв х1алт1ухъан» ц1аралдалъун к1одо гьаруна Хунзахъ № 1
гьоркьохъеб школалъул директор М-Р. Атаев, Г1обода гьоркьохъеб
школалъул учительзаби М.
Х1асанх1усенова, М. Мух1амадова, Буц1ра гьоркьохъеб школалъул учитель К.
Хъарагишиев, Г1ахьалч1и гьоркьохъеб школалъул учитель Т1. Мух1амадов, Х1ариколо гьоркьохъеб школалъул учитель М.
Х1анапиев, Хунзахъ № 2 гьоркьохъеб
школалъул учительница Хъ. Гьит1инова,
РУОялъул методист Р. Атаева, РУОялъул
специалист Р. Дарбишева ва Хунзахъ
ДЮСШялъул тренер М. Г1абдулхаликъов.
Араб ц1алул соналъул
х1асилазулги ц1ияб ц1алул соналъ
районалда лъай кьеялъулъ цереч1арал масъалабазулги бицараб доклад гьабуна
районалъул лъай кьеялъул управлениялъул нухмалъулев З. Г1умаровас.
Лъай кьеялъул х1алт1ухъабазда ц1алул сон байбихьи баркизе
рач1ун рук1ана нилъер ракьцоял
ДРялъул туризмаялъул комитеталъул председатель М. Г1исаев ва Дагъавтодоралъул генералияв директор З. Хучбаров. З. Хучбаровас бицана
ДРялъул президентасул ишал т1уралев Р. Х1. Г1абдулат1иповас лъай кьеялде к1вар
буссинабулеб бугилан, гьес лъаялъул къимат
гьабулилан. З. Хучбаровасда рак1алда буго лъай кьеялъулъ ва ц1алулъ
церет1еял рихьизарурал учительзабазегун
ц1алдохъабазе кверч1вай гьабулеб фонд г1уц1изе.
Пишацоязда байрам баркана «Лидер образования» конкурсалъул
призер Т1ануси гьоркьохъеб школалъул директор Хъ. Дибировас. Жидерго
школалда лъай кьеялда гьабураб ва гьабизе
бугеб х1алт1улги бицана гьес.
Лъай кьеялъул даража борхизабизе, ц1ияб ц1алул соналда
гъира-шавкъалда х1алт1изе мурадгун берцинаб ах1вал-х1алалда ана районалъул лъай
кьеялъул х1алт1ухъабазул августалъулаб совещание.
П. Гунашева.
|