 Г1арани рагъулабгун спортивияб лицеялда цебе бугеб памятник
ц1акъ квешаб х1алалда бук1ана. Заманаялъ жиндирабго гьабулелъул ц1адакьги,
бакъукьги, г1азукьги бугеб гьеб т1ут1ун, бек-бекун ун т1убанго хун т1аг1ине рес бук1ана. Памятникалда рак1
унтун, гьелъул г1емер бицунев, гьеб къач1аялъе ресал ралагьулев вук1ана Хунзахъ бугеб музеялъул директор Г1алиев Шамил. Ахирги
т1убана гьесул мурад: къач1алеб буго памятник. Гьенир гьарулел х1алт1абазул
нижер мухбиралъе бицана Ш. Г1алиевас ва
аслиял х1алт1аби гьарулев вугев художник
Х1асанов Г1абдулаца (к1иясго цадахъ ц1и гьабулеб буго памятник).
- Чанго соналъ цебе ВТЭКалде вач1арав цо херав чи вихьана дида бадиб маг1у хулун, памятникалда цевеги ч1ун,
гьадин Ват1ан ц1унулаго рух1 кьурал
г1адамазе бараб памятник тун бугеб куц бихьуларищилан жиндаго къварилъахъдун гаргадулев. Гьесухъ
валагьун дида рак1алде ккана гьаб гьадин тезе бегьуларин, памятник щиб гьабунги
къач1азе кколин,- абун байбихьана Шамил Г1алиевас.
Гьелдаса хадуб лъабго соналъ хьвадун вуго гьев районалъул,
республикаялъул бат1и-бат1иял идарабазде памятник къач1азе кумек гьарун. Кумек
гьабизе раг1и кьун гурони, х1акъикъияб кумек гьабулев чи вахъунев вук1инч1о. Гьанже
районалъул бет1ер Х1ажияв Дарбишевас т1аде босун къач1алеб буго памятник.
Памятник бан бук1ана 1920-21 соназ Х1оцоса Нажмудинил
бандазде данде рагъулаго хъала ц1унулаго хварал М. Атаевасул партизанал рак1алде щвеялъе. Памятникалда гъоркь буго рагъухъабазул вацлъиялъулаб хоб.
Х1. Дарбишевас кьураб г1арцуде босун буго чабах, цемент, сали, арматура ва
сетка (железобетонияб).
Сеткаги лъун цементги т1ун
памятникалъул площадка къач1ана, площадкаялъул ункъабго тулебаялъе
штукатурка гьабуна, цояб рахъалдасан биххун бук1араб къед ц1и гьабуна – гьедин
къач1ана постамент. Жибго памятникалъе гьаруна солдатазул бут1рул, кверал,
х1ат1ал. Т1умунк1ги, хвалченги гьарун лъезе хут1ун руго. Т1уманк1 кодоб ккураб
цебесеб квер (кисть) гьабизе буго, гьаризе руго памятникалда сверун ругел
болъабиги. Памятникалъе гьабизе ккола шпаклевка, белъине ккола дандекколеб
кьералъ. Памятникалда лъезе буго «Честь защитникам Хунзахской крепости» абураб
мраморнияб плитаги.
Г1аммаб къаг1идаялъ х1исаб гьабуни памятник къач1аялъул
х1алт1аби лъуг1ун буго 70 – процент, хут1ун буго 30 процент.
Ш. Г1алиевасе баркала кьезе бокьун буго районалъул
нухмалъулев Х1. Дарбишевасе тарих ц1униялде гьес к1вар кьолеб бугелъухъ. Гьесул
хьулги буго т1убанго раг1алде бахъинабун памятник къач1азе
жиндие кумек щвеялде.
П. Гунашева.
| 
