Гьале, нилъер районалъул цо-цо росабалъеги щвана т1абиг1ияб газ. Гьеб буго бит1ун х1алт1изабизе лъач1они, г1адамасул г1умруялъе к1удияб х1инкъи бугеб санаг1алъи. Газ х1алт1изабулелъул ц1унизе кколел х1инкъи гьеч1олъиялъул тадбиразул бицун киг1ан г1емер цере рахъаниги, кколел руго рук1а-рахъиналда газ кьвагьиялъул ва газалъул угаралъ г1адамал к1отинариялъул лъугьа-бахъинал. Аслияб къаг1идаялда гьел кколел руго жидерго мина яги квартира бугел г1адамаз газ х1алт1изабулелъул риччалел гъалат1ал сабаблъун. Араб соналда г1адамазул рокъоб газ х1алт1изабулелъул т1уразе кколел тадбирал т1урач1ого, кьвагьана газ. Гьелъул х1асилалда сакъат ккана 5 чиясе. Жакъа нижеца, газ х1алт1изабулелъул ц1унизе кколел тадбиразул бицеян гьарана «Дагъистан газораспределение газпром» ОООялъул бет1ерав инженер Шамсудин Г1алиевасда.

-Шамсудин Асадбекович, щай дагъистанияз жидерго ва хъизаналъул х1инкъи гьеч1олъи ц1унулареб?

-Киг1ан нилъее бокьич1ониги, г1емерисеб мехалда г1адамаз х1алт1изабулеб батула сертификат гьеч1еб, газ къват1ибе биччалеб, цоги-цогидалги г1унгут1аби ругел газалъулаб къайи-къоно. Газ х1алт1изабулеб бак1алда ратуларо вытяжкаби. Ниж г1ажаиблъизарула ургъел гьеч1олъиялъ. Газалъул хъулухъалъул х1алт1ухъабаз рихьизарурал г1унгут1аби гьез г1адахъцин росуларо яги х1инкъи гьеч1олъиялъул т1алабал т1уразаризе т1ами мекъи бихьун лъугьуна.

-Кинал т1алабал ругел газ х1алт1изабулездехун?

-Т1оцебесеб ва бищунго аслияб-гьеб ккола минаялъуб яги квартираялъуб бугеб газалъулаб къайи-къоноялъул техникияб хал гьаби т1обит1изе. Газалъулаб къайи-къоноялъул гьит1инабниги г1унгут1и бугони, (печалъул яги котелалъул), г1иц1го хъизаналде гуребги, щибго г1айиб гьеч1ел мадугьалзабаздецин к1удияб балагь бач1ине бегьула.

Щибаб минаялъубе яги квартираялъубе бачун буго газ, лъун руго краникал, бух1араб газалъул х1исаб-суал гьабулел приборал, газалъул плита, бакулеб котел яги лъим бух1изабулеб колонка. Гьел ккола минаялда жаниб рук1унел газалъул т1аг1алаби (ВДГО). Киналниги х1инкъи гьеч1олъиялъулал т1алабал ц1унизеялъе г1оло, киналго газ х1алт1изабулез гьаризе ккола къот1аби, ВДГОялъе техникияб хъулухъ гьабиялъе.

-Мух1кан гьабе, газалъулаб къайи-къоноялъе техобслуживание гьабиялъе къот1и-къай хъвазе газ х1алт1изабулезда т1адаб ишлъун кколищ?

-Абонентасул техобслуживаниялъе ва авариялъулгин диспетчерлъиялъулаб хьезабиялъе къот1и-къай батич1они, газ кьолеб «Газпром межрегион газ Махачкала» компаниялъул ихтияр буго газ х1ажатасе газ кьезе къот1и-къай хъвач1ого тезе. Лъик1 х1алт1улареб газалъул къайиялде газ кьезе бегьуларо, жиндир заманалда кинабго бух1араб газалъухъ г1арац кьолеб бугонигицин.

-Газалъулаб къайи-къоноялъул техникияб хъулухъ гьабиялде гьоркьобе щиб унеб?

-Гьелда гьоркьобе уна: газалъулаб т1аг1ел-г1уч1алъухъ халгьаби, газопровод щула гьабураб, гьеб белъараб бак1алъухъ хал гьаби

-газалъул т1аг1алаби цолъизарурал, гьел ракулел ва свинарулел бак1аздасан газ къват1ибе бач1унеб бугищали хал гьаби;

-кранал рахъун, рац1ун ра;

-газ къват1ибе кьолел горелкаби рац1ц1ад гьари;

К1к1уй къват1ибе ц1алел ва вентиляция гьабулел каналазул ах1вал-х1ал кин бугебали лъазаби;

-газ кин къват1ибе бач1унеб бугебали лъазаби ва х1алт1ул бат1и-бат1ияб низамалда кин гьеб бух1улеб бугебали мух1кан гьаби;

-х1инкъи гьеч1ого газ х1алт1изабиялъе г1оло т1уразе т1адал тадбиразда хурхун гьеб х1алт1изабулезулгун гара-ч1вариял гьари.

-Киг1ан унеб техникияб хъулухъалъухъ?

-Техникияб хъулухъалъухъ ва газалъулаб къайи-къоно къач1аралъухъ босулеб г1арац бук1уна газалъулаб оборудованиялъул моделалда ва гьелъул къадаралда. Мисалалъе босани, 4 конфораялъулаб газалъулаб плитаялъе техникияб хъулухъ гьабуралъухъ лъаг1алие босула 330 гъурущ, счетчикалъухъ хал гьабуралъухъ-127 гъурущ. Нилъецаго хал кквезе ккола х1алт1и гьабулес гьеб мух1канго гьабун бугищ яги гьеч1ищали. Гьелдаса хадуб гьабула акт. Г1арац кодобе кьезе кколаро. Гьабураб х1алт1ухъ ва бух1араб газалъухъ г1арац духъе бит1ун бач1уна хасаб счеталда рекъон.

-Дагъистаналда ругел кинал компаниязул ихтияр бугеб минабахъ лъураб газалъулаб къайи-къоноялъухъ хал гьабизе?

-Газалъулаб къайи-къоноялъе техникияб хъулухъ гьабизе ихтияр бук1уна, газалъул т1аг1алабигун х1алт1изе ругьун гьарурал, гьелъие хасаб лъай бугел ва авариязулгин диспетчерлъиялъулаб хъулухъ жаниб бугеб хассаб г1уц1иялъул. Нилъер Дагъистаналда бугеб гьединаб г1уц1илъун ккола «Газпром газораспределение Дагестан» компания. Гьелъ 15 соналъ, гьанжесеб техника, гьелъие ц1аларал г1адамал рук1иналъ, кумек гьабула г1адамазе х1инкъи гьеч1еб х1алалда газ х1алт1изабиялъе.

-Газалъулал т1аг1алабазе техникияб хъулухъ гьабизе х1ажалъани, лъида лъазабизе кколеб?

-Гьединаб хъулухъ х1ажалъани, ине ккола яги ах1изе бегьула г1умру гьабун ругеб бак1алъул газалъулаб хъулухъалде.

Гьезулгун хурхен кквезе х1ажалъани гьале телефоналъул номерал:

Контактный 7(8722)682019.

E-mail: dgs-d.biybulatov@mail.ru

Сайт: gro05.ru