. Исана 3-даса 19-абилеб июлалде щвезег1ан Пятигорскиялда «Машук-2011» абураб ц1аралда гъоркь т1обит1ана г1олилазул форум. Гьелда г1ахьаллъи гьабуна Северияб Кавказалъул регионаздаса к1иазаралда ункънусгог1анасев г1олилас. Исана гьеб т1обит1улеб бук1ана к1иабилеб нухалъ. СКФОялъул киналгоязде г1унт1ун миллатазул вакилзаби г1ахьаллъараб гьеб гьудуллъиялъулаб дандч1вай ккола метерисеб къоялде т1амулеб галилъун. Гьенир т1орит1ана лъай кьеялъул семинарал, тренингал, гьезда г1олилаз гъираялда г1ахьаллъи гьабулеб бук1ана. Гьеб форумалда г1ахьаллъизе бегьулаан 30 соналъул ригьалде рахинч1ел, политикаялда, жамг1ияб г1умруялда, ц1алулъ жигарлъи бихьизабурал г1олилал. Гьезда гьоркьоса бокьараз х1адуризе бегьулаан жидеего г1умруялде бахъинабизе бокьун бугеб проект. Лъик1 жидерго проект хъварал г1олилазе Россиялъул х1укуматалъ ч1езарун рук1ана г1арцулал премиял. Гьаб соналъ гьеб мурадалъе биччараб г1арцул къадар бащадаб бук1ана 100 миллионалда, ай г1олилазул щибаб лъабабилеб х1алт1ул рес бук1ана 50ялдаса 300 азарго гъурщиде щвезег1ан премия щвезе.

 Нилъер республикаялдаса Ставрополь краялде форумалда г1ахьаллъизе ана 200г1ан чи. Гьезда гьоркьоб бук1ана нилъер 10 чиясдасан г1уц1араб районалъул г1олилазул делегацияги. Гьал г1агарал къоязда районалде бач1ана рохалил хабар: нилъер республикаялъе бергьараб 159 премиялда гьоркьоб нилъер районалъул к1иго г1олилазе бергьун руго г1арцулал сайигъатал. Гьел ккола Г1оч1ло росулъа Г1умаров Камил (200 азарго гъурущ) ва Хунзахъ росулъа Г1умарова Маржана (50 азарго гъурущ). Гьез х1адурун рук1ана г1агараб районалъул тарих ц1унизе т1орит1изесел тадбиразул бицараб (Камил Г1умаров) ва наркомания, хъалиман ц1ай, гьекъолди, цойгидал заралиял пишабазде данде бич1ч1икьеялъул х1алт1и т1обит1иялъе районалда телестудия рагьизе ккеялъул (Маржана Г1умарова) проектал.

Районалъул г1олилазул комитеталъ, райадминистрациялъ, СМИязул централъ рак1-рак1алъ баркулеб буго «Машукалда» г1арцулал премиял щварал г1олилазда ва гьарулеб буго гьезие ва цойгидал бажари бугел г1олилазда хадурккун г1умруялда бергьенлъаби. Божилъи загьир гьабула, хадубккунги церет1урал ва жигарал г1олилазе, гьезда гьоркьор т1орит1улел тадбиразе районалъул нухмалъиялъ кидагосеб кумек бук1инабилилан!

                                             Районалъул г1олилазул комитеталъул председатель

                                                                                                    Шамай Г1умарова