6 ноябралда районалъул нухмалъулесул кабинеталда т1обит1ана налогал рак1ариялъул бицараб данделъи. Гьелда г1ахьаллъи гьабуна райадминистрациялъул отделазул начальниказ, налоговияб инспекциялъул вакилзабаз, районалда х1алт1улел ругел г1уц1абазул нухмалъулез ва цогидалги жавабиял х1алт1ухъабаз.
Данделъиялда аслияб къаг1идаялда гьоркьоб лъун бук1ана районалда налогал рак1ариялъул х1алт1и ц1акъ заг1ипго унеб бук1иналъул суал. Гьедин исана 10 моц1ида жаниб ракьул налогазул план т1убан буго г1иц1го 25, 22%, физлицабазул буголъиялъул налог -15,10%. «Киназдаго ц1акъ лъик1 лъала законалда рекъон жидеего щвезе кколебщинаб г1арац, амма жидецаго кьезе кколелъул лъицаниги сан гьабуларо. Г1адамазда лъазе ккола бюджет налогаздасан г1уц1улеб жо бук1ин. Гьединлъидал, бищун цебе нилъеца, ай пачалихъиял хъулухъазда ругез мисал бихьизабизе ккола цогидаздаги. Ригьда ва т1олабго къадаралда кьезе ккола налогал, гьединго кьезе бух1араб ккола токалъухъ ва газалъухъ г1арацги. Нужеца кьурал налогал хут1ула нилъер районалдаго. Амма жакъа нилъер гьеб х1алт1и ц1акъ нахъеккун буго. Налоговияб инспекциялъ хъулухъ гьабулеб 9 районалда гьоркьоб налогазул налъабазул рахъалъ бищун цере руго нилъ. Гьединабго ах1вал-х1ал буго токалъухъ г1арац бак1ариялда хурхунги. Гьеб рахъалъги Дагъистаналдаго раг1алда руго нилъ, республикаялда токалъухъ г1арац кьеялъул рахъалъ бищун нахъа руго Хунзахъ, Новолак районал ва Бежт1а участок. 100 азарго гъурущги хвезабун отопление гьабун бажарулев чиясда к1везе ккела моц1ие 5000 гъурущ бух1араб токалъухъ кьезеги. Бажарулеб гьеч1они, отоплениеги, хинал ч1абаралги ва цогидабги гьабич1ого, бугеб ресалда рекъон рук1ине ккела. Гьединго нилъер районалда хадуб буго 47 млн. транспорталъулаб налогалъул налъи. Районалда лъик1ал нухал рук1ине рокьарал шоферзабазда лъазе ккола, гьел (нухал) гьез кьурал транспорталъулал налогазда бараб бук1ин. Нагагьлъун нилъер г1адамазе кьезе кколеб жо кьеч1ого хут1ани гьезул разилъунгут1иялъул раг1а-ракьан бук1унаро, амма гьез нусго багьана батула законалда рекъон жидецаго кьезе кколелдаса рорч1изе рук1инелъун. Гьедин бегьуларо. Гьезда лъазе ккола жидеца кумек гьабич1они, цох1о администрациялъухъа х1алт1и релълъунареблъи»,- ян абуна Нурмух1амад Задиевас. Данделъиялъул ахиралда районалъул нухмалъулес иш т1аде кколел х1алт1ухъабазе т1адкъай кьуна республикаялъ бихьизабураб заманалде (2 декабрь) налогал рак1ариялъул иш роц1ц1инабизе.
|
