Россиялъул президент Владимир Путинил указалда рекъон, 2023 сон лъазабун буго Педагогасул ва насих1атчиясул сонлъун. Гьелъул мурадлъун ккола насих1атчилъиялъул иш гьабулел педагогикиял х1алт1ухъабазде хасаб к1вар кьей. Педагогасул ва насих1атчиясул лъаг1елалда гьарулел киналго тадбирал руссарал рук1ине руго учителасул х1алт1ул къимат борхизабиялде, г1ун бач1унеб г1елалъул педагогикаялде рокьи бижизабиялде. Гьаб соналда г1емераб х1алт1и гьабизе буго учительзабазул профессионалияб цебет1ей борхизабиялде, гьезул х1алт1ул к1варги бич1ч1ун социалияб рахъалъ гьел кквеялде.

Х1адур ругищ нилъер районалъул педагогал гьаб соналда мустах1икъаб къаг1идаялда дандч1вай гьабизе? Кинаб х1алт1и унеб бугеб нилъер районалда гьеб жавабияб х1алт1иялда хурхунали лъазелъун жакъа нижер  мухбир дандч1вана районалъул администрациялъул лъай кьеялъул отделалъул информациялъулгин методикияб централъул нухмалъулей Г1умарова Сидрат Мух1амадовнагун. Гьелдаги дидаги гьоркьоб ккана гьадинаб гара-ч1вари:

- Сидрат Мух1амадовна, нилъер президентас педагогасул х1алт1уде к1вар ц1ик1к1инабиялъул ва гьесул къадру борхизабиялъул мурадалда, исанасеб сон лъазабун буго педагогасул ва насих1атчиясул сонлъун. Х1адур бугищ нилъер районалъул лъай кьеялъул отдел гьаб соналда мустах1икъаб къаг1идаялда дандч1вай гьабизе? Кинаб багъа-бачари унеб бугеб лъай кьеялъул х1алт1ухъабазда гьоркьоб?

- К1удияб жигарчилъи унеб буго лъай кьеялъул отделалда рехсараб соналда дандч1вай гьабиялъе. Г1уц1ун буго лъаг1алиего план. Гьелда рекъон т1орит1изе руго к1вар бугел тадбирал. Т1убараб соналъго тадбирал гьаризе руго Педагогикиял х1алт1ухъабазул профессионалияб цебет1еялъе, насих1атчилъи, рахъи бугеб бут1а х1исабалда бихьизабиялъул проект г1умруялде бахъинабиялъе.

Т1орит1изе руго ц1алдохъабазе, педагогазе ва умумузе проекталъулал «Насих1атчи щивав чиясул г1умруялъулъ», «Педагогикияб практикаялда насих1атчилъиялъул технологиял» «Умумул – лъимадул г1умруялда аслиял насих1атчаг1и» абурал  ва цогидалги семинарал.
Х1исабалде росун руго зама-заманалдасан лъай кьеялъул «Насих1атчи. Маг1на. Къимат. Масъалаби». «Насих1атчилъи – профессионалияб цебет1езабиялде нух», «Лъай кьеялъул организациялда насих1атчилъи г1умруялде бахъинабиялъе проекталъулаб технологиял х1алт1изари», «Педагогикияб насих1атчилъи профессионалияб союзгун» абурал семинарал т1орит1изеги.

Февраль моц1алда т1обит1изе буго «Г1олохъанал педагогал - 2023» мастер-класс.

Щибаб моц1алда жаниб цо нухалда т1обит1изе буго «Г1олохъанав педагогасул къо», квалификация борхизабиялъул курсазул программаялда рекъон ц1ализари.

Февраль, август моц1азда т1обит1изе буго г1олохъанал педагогазул профессионалияб махщалил «Хурхен ккве!» «Г1уц1е!» «Х1алт1изабе!» абурал фестивалал.

Бук1ине буго «Педагогикиял кадраби – школалъул к1вар бугеб хазина» абураб г1олохъанал педагогазул форум.
«Лъай-хъвай гьабе: Бергьун к1удиял муг1алимал», «Учителасухъе кагъат» акциял. Т1обит1изе буго школалъул ва учителасул х1акъалъулъ литературияб конкурс – эссе. Гьал г1агарал къоязда раг1алде бахъана гьебго мурадалда т1обит1араб «Учитель года 
- 2023» конкурс. Гьениб бергьенлъи босана Ц1ада аслияб школалъул математикаялъул учительница Сираева Зайнаб Темирхановнаялъ.  Гьабсаг1аталда гьей г1ахьаллъулей йиго Кизляралда унеб бугеб республикаялъулаб гьебго конкурсалда.                                                                                           
Ц1адахъго унел рук1ана заочнияб къаг1идаялда «Росдал учитель» ва «Бищун лъик1ав г1олохъанав учитель», «Бищунго лъик1ав рахьдал мац1алъул муг1алим» конкурс. Жакъа къоялда жаниб цониги лъай кьеялъул г1уц1иялъе г1одоре риччан ч1езе ихтияр гьеч1о. Гьабсаг1аталда районалъул лъималазулгин г1олилазул спортивияб школалда унел руго 5-6 классазда гьоркьор шахматал х1аялъул, т1адагьаб атлетикаялъул, х1аял. Т1олгороссиялъулал спортивиял ва республикаялъулаб Брейн-ринг къецалги.

Гьединал конкурсаз кумек гьабула махщел-гьунар бугел муг1алимал загьир гьаризе мустах1икъаб къаг1идаялда гьезие къимат кьезе, гьезе жидеегоги х1албихьи щвезе.

- Бицунеб буго ФГОСал ц1идасанги хисун ругилан. Гьеб бит1араб бугищ?

- ФГОСал кьуч1дасанго хисизарич1ониги, амма гьенир хиса-басиял гьарун руго ц1ияб къаг1идаялда данде кколедухъ. Гьаб соналъул сентябрь моц1алдасан байбихьун Россиялъул киналго школал ц1ализе руго цо программаялда рекъон. Т1оцересездаса бахъараб анкьабилел классазде щвезег1ан лъимал ц1ализе руго ФГОСалъул ц1ияб системаялда рекъон. Гьениб муг1алимзабазда дандч1вазе руго г1езег1ан зах1малъаби. Гьел х1алт1изе ккезехъин руго басриял учебникалги х1алт1изарун ц1ияб программаялда рекъон. Рач1ине руго ц1иял учебникал, амма циндаго х1ажаталщинал учебникал щвезе ц1акъ зах1малъила, дагь-дагь ккун гурого.

- Сидрат, гьабулеб ишалъулъ, нужее къуват кьеги. Нилъер киназулго мурад буго нилъер г1ун бач1унеб г1ел цебет1ураб лъугьин. Гьел бит1араб нухде рачунел, гьезда лъай ва г1акълу малъулел нилъер муг1алимзабазеги гьарула гьабулеб ишалъулъ икъвал, сабру ва чорхое сахлъи. Гьезул мурадал т1урай, гьезул къадру къимат борхи, материалияб рахъ борхи – нилъерги мурад ккола.