22 сентябралда Хунзахъ Ш. Шамхаловасул цlаралда бугеб культураялъул кlалгlаялда тlобитlана районалъул школлъималазул умумузул собрание. Гьелда гlахьаллъи гьабуна районалъул нухмалъиялъ, школалъул директорзабаз, умумуз, росабазул бегавулзабаз, рухlиял церехъабаз ва цогидазги.
Исана кlиабилеб нухалда тlобитlулеб буго гьединаб данделъи районалда. Гьелъул мурадги буго умумул жидерго лъималазде кьолеб кlвар цlикlкlинабиялде ахlи. Киназего саламги кьун данделъи рагьана районалъул бет1ер Нурмухlамад Задиевас.
“Нилъеца хlукму гьабун букlана лъагlалида жаниб цо нух гьадинал данделъаби тlоритlизе. Гьанжеялдаса нахъе ракlалда буго гьадинал тадбирал цlалул соналда жаниб лъабго нухалда гlуцlизе - авалалда, бакьулъ ва ахиралда. Гьелъие гlилла буго, нилъеца, бихьиназ нилъерго лъималазде букlине кколеб кlвар кьолеб гьечlолъи, гьезул жавабчилъи нилъеда тlад букlин кlочон толеб букlин ва лъималазе тарбия кьей тlубанго руччабазде рехун тун букlин. Жакъа чан эмен вачlунев школалде яги спортзалалде жиндир лъимер щиб гьабулеб бугебали балагьизе? Чан эмен гlодовги чlун, жиндирго лъимералъухъ гlенеккулев, гьелъул рекlел ахlвал-хlал бичlчlизе, гьелда лъикlаб-квешаб малъун, насихlатал гьарулеб? Къанагlат гурони эмен вачlунев гьечlо школалда тlобитlулеб собраниялде яги жиндир лъимералъул лъай-гlакълуялъухъ балагьизе дарсида гlодов чlезе. Цебе годекlанир гlодор чlарал чlахlиязда цебесан ине кlолароан лъималазда. Жакъа гlолилал кlалдиб хъалиянги ккун, расги нечечlого хьвадулел руго чlахlиязда цересан. Гьединаб ахlвал-хlал лъугьиналъе аслияб гlилла буго лъималазе умумузул кьварараб гlадлунизам ва тарбия щунгутlи. Гьединго жакъа киналго, хасго лъимал руго Интернеталда жанир. Жеги гlакълу цlубачlел гьезие захlмат букlуна Интернеталда бугебщинаб гlала-гъважаялда гьоркьоса лъикlабквешаб цоцалъа бахъизе. Дагьалищ ругел лъималги ва гlолилалги Интернеталдасан бетlерги сверун, мекъаб нухде гали тlамурал хlужаби? Гьединлъидал гlорхъи чlвазе ккола лъималаз Интернеталда тlобитlулеб заманаялъе. Цоги кlвар кьезе ккараб жо буго къаси кватlараб гlужалда гlовул гlужде рахинчlел лъимал къватlахъ тирулел рукlин. Кинаб хlалхьи букlунеб эбелинсул ракlазе сардилъ жидер гьитlинаб лъимерги къватlахъ тун? Узухъда, нилъее лъимералдаса хирияб жо щибго букlунаро ва киназдаго ккола жиндир лъимер малаик бу-гин, гьелъ киданиги бегьулареб жо гьабуларин. Амма лъимералде бугеб рокьиялъ бецц гьаризе бегьуларо нилъ. Гьел кидаго рукlине ккола умумузул берзукь. Гьединго статистикаялда рекъон щибаб лъабабилеб ригьин биххулеб буго нилъер районалда. Гьелъие ругел гlиллабаздасанги цояблъун ккола гьитlинго рокъосан букlине кколеб тарбия щвечlолъи. Лъимер берцинго ретlа-къанги бугони, бакъун-къечонги гьечlони, тlокlаб жоялъул ургъел гьабизе кколарин кколеб буго жакъа умумузда. Материалияб рахъ лъикlлъизабиялда хадурги лъугьун, нилъеда кlочон толеб буго лъимералъул рухlиябгун моралияб рахъалда тlад хlалтlизе кколеблъиги”, - ян абуна гьес.
Районалъул полициялъул начальник Мухlамадхlажи Сайбулаевас жиндирго кlалъаялда бицана лъималазда хурхун жидеца гьабулеб бугеб хlалтlул. Гьес абуна исана 23 эбел-эмен административияб жавабчилъиялде цlанин гьезул гlовул гlужде рахинчlел лъималаз гьарурал нарушениял сабаблъун. 6 лъимер ккун буго къаси сагlат 10 тlубан хадуб цадахъ чlахlиялги гьечlого къватlахъ ратун. 3 хъизан лъун буго гlовул гlужде рахинчlел лъималазул подразделениялъул (ПДН) учеталда.
Гьединго умумул лъималазе тарбия кьеялде ахlарал кlалъаял гьаруна районалъул имам Ахlмад Мухlумаевас, Хунзахъ гьоркьохъеб кlиабилеб школалъул директор Залимхан Гlумаровас, Гьамущи гьоркьохъеб школалъул директор Мухlамадтlагьир Аминовас, Хунзахъ ва Хlариколо росабазул дибирзаби Мухlамад Гlабдулхаликъовас, АхIмади МухIамадовас ва цогидазги.
Ахиралда данделъараз кьуна жидерго суалалги.
И. МУХIАМАДОВ.
|