4 апрелалда жиндирго хlалтlухъабигун цадахъ районалде вачlун вукlана ДРялъул Лъай кьеялъулгун гlелмуялъул министр Яхlя Бучаев. Гьезул нилъехъе сапар бухьиналъул аслияб гlилла букlана муниципалитеталда ралел ругел, цlияб цlалул соналде рагьизе кколел лъай кьеялъул объектазухъ халгьаби. Гьедин, районалъул нухмалъигун цадахъ министр щвана Гlарани ва Гlобода рарал цlиял школазде, Хунзахъ гьоркьохъеб тlоцебесеб ва Кlахъ гlаммаб лъай кьеялъул школаздеги.

Гьелдаса хадуб гьалбадерица гlахьаллъи гьабуна райадминистрациялда тlобитlараб лъай кьеялъул учреждениязул нухмалъулезулгун данделъиялдаги.  
“Жакъа нилъеда бихьулеб буго дунялалда ва хасго нилъер улкаялда бугеб политикияб ахlвал-хlал. Нилъее цохlо нух буго гьединаб хlалуцараб ахlвал-хlалалдаса рорчlизе - гlун бачlунеб гlелалъе лъай кьей. Щайгурелъул, нилъер букlинесеб бараб буго гьезда. Нилъер Ватlаналъе хlажат руго махщел бугел специалистал. Битlухъе бицани, жакъа расги лъикlаб даражаялда гьечlо Дагъистаналъул лъай кьей. Россиялъул Просвещениялъул министерствоялъ 55 показателалги хlисабалде росун тlобитlулеб мониторингалъул хlасилалда улкаялдаго ахирисел бакlазда буго нилъер республика. Узухъда, гьенир руго чанго нилъеда рачlел гlиллабиги. Амма руго нилъедаго ритlизаризе кlолел гъалатlалги. Нилъер гlаммаб масъала буго киналго нилъеда рарал гlузрабиги тlагlинарун лъай кьеялъул даража борхизаби”, - ян абуна Яхlя Бучаевас 
Министрасул заместитель Аида Тlалхlатовалъ гlатlидго бицана муниципалитеталъул лъай кьеялъул бутlаялда бугеб ахlвал-хlалалъул ва кlвар буссинабуна ругел гlунгутlабазде. Гьединго кlалъаял гьаруна районалъул бетlер Нурмухlамад Задиевас ва лъай кьеялъул отделалъул начальник Патlимат Хlамзатовалъги.  
Ахиралда цо-цо лъай кьеялъул гlуцlабазул нухмалъулез кьуна жидерго суалалги.

Хадуб Ш. Шамхаловасул цlаралда бугеб культураялъул кlалгlаялда тlобитlана районалъул цlалдохъабазул эбел-инсулгун собраниеги.  
“Гlемерал суалал рукlуна лъай кьеялъул бутlаялда эбел-инсуда рарал. Гьезул хlакъалъулъ бицине буго нилъеца жакъа. Тlоцебе абизе бокьун буго, гъоркьисагогlадин исанаги экзаменал камерабазда гъоркь тlоритlизе ругилан. Дица гьелъул бициналъул гlилла буго экзаменазда жидер лъималазе кумек щвеялде лъилниги хьул лъечlого букlин. Нижеца гьал къоязда тlобитlана хьалбихьиялъул ОГЭ. Гьеб нижеда тlадаб жо букlинчlо. Букlинчlониги сурсаталги тlад хвезарун, нижеца экзамен тlобитlана цо бутlаялъниги гьелде нилъер лъимал хlадуриялъул мурадалда. Гъоркьисалаги цlалул сон лъугlизе кlиго моцl хутlидал тlобитlун букlана хlалбихьиялъул ОГЭ ва гьелъ хlасилги кьун букlана. Хьул буго исанаги кьелилан”, - ян абуна Нурмухlамад Задиевас.  
“СССР биххун хадуб тlолабго республикаялъул киналго бутlабазда лъугьарал лъикlал гурел хиса-басиял хъатlичlого хутlичlо лъай кьеялдаги. Амма жакъа республикаялъулги нужер районалъулги нухмалъияз бажарараб хlалтlи гьабулеб буго лъай кьеялъул даража борхизабиялъе. Районалъул нухмалъyлес абухъе, эбел-инсул гъорлъ гlахьаллъиги гьечlого гlуцlараб цlалулаб процессалъ хlасил кьоларо. Жакъа нилъее къваригlун буго эбел-эменги, жалго цlалдохъабиги, учительзабиги, киналго цадахъ цолъун нилъер гlун бачlунеб гlел яхl-намус, лъай-гlакълу бугеблъун ва цебетlураблъун лъугьиналда тlад хlалтlизе. Эбел-инсуда дица аблилаан лъималазде кьолеб кlвар цlикlкlинабеян. Нужеда кидаго ракlалде ккезе бегьуларо жидер лъимал кlудиял шагьараздасаги гьениб бугеб чороклъиялдасаги рикlкlад ва цlунараллъун ругилан. Гьеб мекъаб пикру буго. Жакъа буго глобализациялъул гlасру. Дунялалъул рагlалда бугебщинаб чороклъиги жакъа Интернеталдасан бихьизе рес буго нилъер лъималазда ва гьезул жеги цlубачlеб гlакълуялъухъа бажаруларо лъикlабги квешабги батlа гьабизе. Гьединлъидал нужер кидагосеб бербалагьалагьиялда гъоркь рукlине ккола лъимал. Лъимер школалде битlараб гlолин, гьелъул хадусеб тlалаб учительзабазде рехун тезе бегьуларо. Гьеб кин цlалулеб бугебали цlехон раккизе ккола школалде, тlей гьечlеб бухьен букlине ккола учителасулгун”, - ян кlалъана Яхlя Хlамидович.
И. Мухlамадов.