Эмен вукъараб вацлъиялъул хоб Гъизляр шагьаралъул г1урусазул хабалъ бук1ин лъайдал, нижер инсул рахъалъан г1агарлъиялъул лъебергоялдаса ц1ик1к1ун чи (6 машина) щвана гьаб соналъул 3 аб. маялда рузман къоялъ эмен вукъараб бак1алде зияраталъ. Бусурзабазул диналда рекъон, нижеца хабада гьаризе кколел тадбиралги т1орит1ана. Дир эмен Ахъбердиев Иманшапиг1 Давудович, Шамиль имамасул ц1ар раг1арав наиб Хунзахъ Ахъбердил Мух1амадил ирсилав, 1935 соналъ Краснодарь шагьаралда рек1аразул рагъулаб училищеги лъуг1изабун, Баг1араб Армиялъул офицер,-гьес хъулухъ гьабуна Орджоникидзе шагьаралда хадуб Украинаялда рагъулал частазда. Рагъ байбихьараб соналъ гьес хъулухъ гьабулеб бук1ана, Украинаялъул бакъ-т1ерхьул г1урхъуда бугеб Каменец-струмиловка шагьаралда (военный городок). Гьев, рагъ байбихьараб т1оцебесеб къоялъго дандч1вана, тохлъукьего рек1к1ги гьабун нилъер Ват1аналде к1анц1арав къуватав тушмангун. Нахъе къалаго гьев вагъана Украинаялда, Кубаналда. Дир эмен гвардиялъул капитан, Кубаналъул рек1аразул 4 аб. корпусалъул, 9 абилеб дивизиялъул, 32 абилеб рек1аразул полкалъул командирасул заместитель бах1арчилъиялда хвана, Ставрополалъул краялда, Ачикулак ц1ар бугеб росдае г1оло гьабулеб рагъулъ, 1942 соналъул 1-ноябралда.

1942 соналъул август моц1алда гьесие кьун бук1ун буго «Баг1араб ц1ва» - орденги. Гьаб соналъул 7 маялда Гъизляр шагьаралъул администрациялъги ах1ун, дун г1агарал васалгун цадахъ шагьаралъул администрациялде щвана, гьенисан администрациялъул х1алт1ухъабигун щвана эмен вукъараб вацлъиялъул хабаде. Гьенире рач1ун рук1ана Гъизляр шагьаралъул школалъул ц1алдохъабиги. Хабада к1алъай гьабуна Гъизляр шагьаралъул Халкъияб собраниялъул председатель Полюшко Александр Владимировичас, администрациялъул г1олилазул советалъул член Хадижат Мух1амадовалъ, Гъизляр шагьаралъул ветераназул советалъул председатель Старчак Валентина Ивановнаялъ, журналистаз, Гъизляр шагьаралда г1умру гьабун вугев маг1арулав, живго Ч1арада районалдаса Г1абдусалам Халиловас ва гь.ц.

Т1алх1ат ахъбердиев