22 ноябралда Махlачхъалаялда ДРялъул Хlукуматалъул председатель Гlабдулмуслим Гlабдулмуслимовасул нухмалъиялда гъоркь тlобитlана Расул Хlамзатов гьавуралдаса 100 сон тlубаялъулаб юбилеялде хlадурлъиялда хурхун данделъи. Гьелда гlахьаллъи гьабуна районалъул нухмалъуев Нурмухlамад Задиевасги. Шагlирасул юбилей кlодо гьабиялда хурхун, республикаялъул Бетlер Сергей Меликовас гlуцlун буго хасаб план. Гьеб тасдикъ гьабун буго регионалъул Хlукуматалъги. Гьелда хъвачlогоги юбилеялде гlуцlун буго Россиялъул Хlукуматалъул вице-премьер Татьяна Голиковалъ исана 1 июналда тасдикъ гьабураб цоги планги. Гьелда рекъонги тlобитlизе бихьизабун буго 42 тадбир.

Гьеб кlодо гьабиялъул республикаялъулаб планалда рекъон тlобитlизе буго 185 тадбир. Гьел рикьун руго чанго бутlабазде. Тlоритlизе руго лъай борхизабиялъулгун басмаялъул халтlаби, выставкаби, фестивалал ва цогидалги малданияталъул тадбирал, къачlазе руго маданияталъул объектал, ракьул участокал (паркал, скверал, азбарал), нухал. Гьаризе руго сахлъи цlуниялъул, лъай кьеялъул, физкультураялъулгун спорталъул ва коммуналияб инфраструктура цебетlеялда хурхарал хlалтlабиги. 

“Владимир Путиница Россиялъул культура цебетlеялъулъ Дагъистаналъ лъураб бутlалъун зама-заманалдасан мисалалъе бачуна Расул Хlамзатовасул творчество. Улкаялъул нухмалъулес гьев рикlкlунаан кlудияв инсанлъун ва цохlо Дагъистаналъ гуребги, тlолабго Россиялъго мисал босизе мустахlикъав чилъун”, - ян абуна Гlабдулмуслим Гlабдулмуслимовас. 

ДРялъул Хlукуматалъул Председателасул тlоцевесев заместитель Руслан Гlалиевасул рагlабазда рекъон, юбилей кlодо гьабизе федералияб, регионалияб ва бакlалъулаб бюджетаздасан биччазе буго гlага-шагарго 11,2 млрд гъурущ. Гьездасан 6,9 млрд бачlине буго федералияб бюджеталадсан, 3,6 млрд биччазе буго регионалъ.

Официалияб къагlидаялъ Расул Хlамзатовасул сон кlодо гьабизе байбихьизе буго 2023 соналъул февраль моцlалда. Гьелъул хlакъалъулъ бицана ДРялъул Культураялъул министр Зарема Бутаевалъ. Февраль моцlалъул байбихьуда гlурус театралда “Дир Дагъистан. Нилъер Расул” абураб тадбиралдалъун рагьизе буго шагlирасул сон кlодо гьаби. Гьединго министралъ бицана тlубараб соналъго улкаялъул батlи-батlиял субъектазда тlоритlизе ругин шагlирасул юбилей кlодо гьабиялда хурхарал тадбиралилан. Жеги Пачалихъияб Думалдаги тlоритlизе руго Расул Хlамзатовасул къоял, республикаялъулал театразда гlуцlизе руго премьераби, пачалихъиял коллективазул гастролал ва цогидалги рикlкlен гlемерал тадбирал. Гьединго юбилей кlодо гьабизе буго мадугьалихъ ругел улкабаздаги. Мисалалъе, тадбирал тlоритlизе руго Азербайджаналда, Киргизиялда, Белоруссиялад ва цогидалги пачалихъазда.  

И. Мухlамадов.