Исанаги тlолабго улкаялдагогlадин нилъер районалдаги кlодо гьабуна Кlудияб Бергьенлъиялъул къо - 9 май. 78 сон сверана советияб халкъалъ союзникалгун цадахъ гитлерилаб Германиялда тlад бергьенлъи босаралдаса. Украинаялда унеб бугеб хасаб рагъулаб операциялда хурхун исана цlикlкlараб кlвар кьолеб букlана букlана байрамалъул гlахьалчагlазул хlинкъи гьечlолъи цlуниялде. Гьедин, кидаго байрамкъоялъ тlобитlулеб букlараб “Хвел гьечlеб полк” исана тlобитlичlо.

 
Районалда байрамалде хlадурлъизе байбихьана анкьалъ цебего.  “Стена памяти” абураб акциялда рекъон баннералги ран къачlан букlана райцентралъул аслияб къватl. Гьединго тlоритlана “Георгиевская ленточка” ва “Знамя Победы” акциял. Гlаммаб республикаялъул субботник тlобитlулеб къоялъ муниципалитеталдаги тlобитlун букlана 3000 гlан чи гlахьаллъараб кlудияб субботник. Рохьана гъутlби, лажбарги бахун кенчlезаруна заборал ва бордюрал, бакlа-бахари гьабуна паркалъулал зонабазда, Кlудияб Ватlанияб рагъул гlахьалчагlазул памятниказда ва учреждениязул минабазда сверухъ, гlемер туристал хьвадулел бакlазда ва цогидалги жамгlиял зонабазда. Субботникалда гlахьаллъи гьабизе рачlун рукlана цо-цо республикаялъул ведомствабазул вакилзабиги. Гьедин, Макьасда бакlа-бахари гьабуна республикаялъул Информациялъулгун печаталъул агентствоялъул хlалтlухъабаз.

9 маялда байрамалъулал тадбирал байбихьана, гlадатлъун лъугьахъе, радал райцентралда бугеб памятникалда цебе тlугьдул лъеялдасан. Гьелда гlахьаллъи гьабуна районалъул бетlер Нурмухlамад Задиевас, райсобраниялъул председатель Мухlамад Мухlамадовас, Хунзахъ бугеб рагъулаб часталъул командир Илья Ермолаевас, военком Шамил Мухlамадовас, росабазул бегавулзабаз, лъай кьеялъул гlуцlабазул нухмалъулез, школлъималаз ва цогидазги.

Гьенисан киналго ана Р. Хlамзатовасул цlаралда бугеб спорткомплексалда тlобитlараб волейболалъул рахъалъ районалъул турниралъул финалияб хlаялъухъ балагьизе. Гьелда гlахьаллъи гьабурал Хунзахъ ва Тlануси росабазул командабаз бихьизабураб чlагояб, балагьарал асир гьарулеб ва хlалуцараб хlаялъул хlасилалда 2-1 хlисабалда дандиязда тlад бергьенлъи босана хундерил волейболистаз. Лъабабилеб бакl ккуна Гьамущи росдал командаялъ. Программаялда рекъон хадуб тlобитlана “Хвел гьечlеб автополк” абураб автопробег. Гьелда гlахьаллъи гьабураб 78 автомобилалъ Хунзахъ памятникалдасан байбихьун сапар бухьана “Гlалагlарт” майданалде щвезегlан. 

Къалъул гlужалдехун рехсараб майданалда байбихьана  гlемерисезе бищунго интерес букlунеб чуял риччаялде. Гьедин, нилъер машгьурав ракьцояв Тlанусиса гlалимчи Шамил Гlалиевасул цlаралда 7 сверуда тlоцебе финишалде бачlана Гlахьалчlиса Мухlамадов Хlайбулагьил “ Визирь” чу (гlарцулаб сайгъат - 55000 гъурущ), кlиабилеб бакl ккуна районалъул МФЦялъул цlаралда биччараб “Буян” чоца (35 000 гъурущ), лъабабилеб бакlалде бачlана муниципалитеталъул бетlерасул цlаралда букlараб “Акбар” чу (25 000 гъурущ). 5 сверуда  бергьенлъи босана Хунзахъа Шалапов Камилил “Снайдер” чуялъ (35 000 гъурущ), кlиабилеб бакlалде бачlана “Гlочlло росдал гlолилал” гlуцlиялъул “Алилина” чу (25 000 гъурущ), лъабабилеб бакl ккуна Гумбет районалъул Килалъ росулъа Тlагьиров Гlумарил “Акбар“ чоца (15 000 гъурущ). 3 сверуда бищун цебе ккана Тlанусиса Мухlамадов Мухlамадил “Вардум” чу (20 000 гъурущ), гьелда хадуб финишалде бачlана Болъихъ районалъул Шодрода росулъа Шагьрулабазанов Шагlбанил “Афродита” (15 000 гъурущ), лъабабилеб бакl ккуна Хунзахъа Атаев Заирбегил “Буракъалъ (10 000 гъурущ). Гlицlго нилъер районалъул чуязда гьоркьоб 3 сверуда бищун  хехаблъун батана Тlадколоса Мухlамадов Хlамидил “Мубарак” чу (20 000), кlабилеб бакl ккуна Гьамищтlаса Шамилов Мухlамадил “Красавчик” чоца (15 000 гъурущ), лъабабилеб бакlалъе мустахlикълъана “Марва туралъул” “Орлик” чу (10 000). Юргъа чуязул тайпабазда гьоркьоб цо сверуда бергьенлъи босана Шамил районалъул Тlелекьа Гlабдулагьил “Спартак” чуялъ (10 000 гъурущ). 

Чуял риччан рахъингун, тlоритlана рекерухъабазда гьоркьосел къецалги. Гьедин, 1200 метрадул манзилалда рекериялъул хlасилалда тlоцебе финишалде щвана Болъихъа Лабазанов Р. (5000 гъурущ), кlиабилеб бакlалде вачlана Гlоюодаса Шигьабудинов М (3000 гъурущ), лъабабалеб бакl щвана Цlатlанихъа Шамсудинов Д (2000 гъурущ). 
И. Мухlамадов.