22 маялда райадминистрациялда тlобитlана районалъул терроризмалде данде къеркьеялъул комиссиялъул (АТК) иргадулаб данделъи. Гьелда гlахьаллъи гьабуна районалъул бетlерасул хlинкъи гьечlолъиялъул рахъалъ заместитель, АТКялъул секретарь Хlамид Гьитlиновас, рагъулав комиссар Шамил Мухlамадовас, районалъул централияб больницаялъул бетlерав врачасул ишал тlуралей Патlимат Гусаровалъ, ихтиярал цlунулелгун къуваталъулал идарабазул вакилзабаз, рухlиял церехъабаз ва цогидазги.
Данделъиялда гьоркьор лъун рукlана районалъул лъай кьеялъул учреждениязда ахирисеб цlумур, ОГЭ ва ЕГЭ кьеялъул ва выпускалъулал вечерал тlоритlулаго, хlинкъи гьечlолъи цlуниялъул хlакъалъулъ, диниял учреждениязул “зеленкаби” гьариялда хурхун тlобитlараб хlалтlул хlасилазул ва 2023 соналъул тlоцебесеб бащалъиялда районалда терроризмалъулгун экстремизмалъул идеологиялда данде къеркьеялъул комплексалъулаб план тlубазабиялъул, районалъулгун республикаялъул АТКязул хlукмаби тlуразариялъул хlакъалъулъ суалал.
Тlоцебесеб суалалда хурхун баян кьуна районалъул полициялъул начальник Мухlамадхlажи Сайбулаевас. Гьес бицана цlалул соналъул ахиралда районалъул лъай кьеялъул учреждениязда тlоритlулел тадбиразда хlинкъи гьечlолъи цlуниялъе гlоло полициялъ гьабулеб бугеб хlалтlи цlикlкlинабун букlиналъул.
Хlамид Гьитlиновас бицана гlемераб мехалъ хадуб бехъерхъун букlараб суал тlубазе кlванин - районалъул киналго централиял мажгитазе “зеленкаби” гьарун ругилан. Гьанже 1 сентябралде щвелалде, къуваталъулал идарабиги гlахьал гьарун, гьезие хlинкъи гьечlолъиялъул паспорталги гьаризе кколилан. Гьединго щибаб кварталалъ гьабураб хlалтlул хlакъалъулъ АТКялде ригьда справкаби кьезе кколеблъиги кlочон тогеянги лъазабуна Хlамид Мухlамадовичас.
И. Мухlамадов.
|
