Цебеккун лъазабун букlахъе, 26 январалда райцентралда Ш. Шамхаловасул цlаралда бугеб культураялъул кlалгlаялда тlобитlана районалъул бетlер Нурмухlамад Задиевас араб соналъ гьабураб хlалтlул хlисаб кьей. Тадбиралда гlахьаллъи гьабуна районалъул активалъ ва жамагlатазул вакилзабаз.

 
Данделъи байбихьана районалъул нухмалъулес Украинаялда тlобитlулеб бугеб хасаб рагъулаб операциялда гlахьаллъи гьабулел районцоязе баркала кьеялдасан. Гьединго киналго ахlана гьезул рокъор хутlарал хъизан-лъималазул тlалаб-агъаз гьабизеги. 

Гъоркьисала гьарун бажарарал хlалтlабазул бицунаго, районалъул нухмалъулес аслияб кlвар кьуна социалиял бутlабазда кколел ругел хиса-басиязде. Мисалалъе, бицана районалда 7 лъай кьеялъул объект балеб яги базе проекталда лъун бугилан. Хlисаб кьеялда хасаб бакl ккун букlана спецоперациялъул гlахьалчагlазе районалъул росабазул жамагlатаз, бегавулзабаз ва росдал магlишатазул предприятияз гьабураб гlарцулаб ва нигlматазулаб кумекалъул бициналъ. Гьединго Нурмухlамад Задиевас ракlалде щвезабуна исанасеб сонги цlакъго жавабчилъи цlикlкlараб ва дагьабги гъуждулги гурун хlалтlизе кколеб бугилан, щайгурелъул, гьеб федералияб даражаялдаго нилъер ракьцояв, Халкъияв шагlир Расул Хlамзатовасул сонлъун лъазабун бугелъул. Кlудияв шагlир гьавуралдаса 100 сон тlубаялде гьабизе кколеб хlадурлъиялъулги бицана гьес.  

2022 соналъ гьабураб хlалтlул хlасилазул нижеца араб соналъул ахирисеб газеталъул номералда гlатlидго кьун букlиндал, гьаниб гьелъул къокъго бицун толеб буго. 

Лъагlалил хlасилал гьарун хадуб, районалъул бетlерас жавабал кьуна гlадамазул суалазе. Гlаммаб къагlидаялъ гьес жаваб кьуна 25 гlан суалалъе. Гьезулги гlемерисел рукlана социалияб бутlаялда хурхарал. Мисалалъе, гlемерисезул рахlат хвезабун бугоан лъим дагьлъун яги тlубанго цlорон букlиналъ. Бассейналдасан хиса-хисун лъим гьеч1ел роххабазде бегунг1аги, гьел г1адамаз жидеего ц1езег1аги санаг1алъи гьабизе бегьуларищан гьикъулеб бук1ана райцентралъулаз. Узухъда, лъим дагьлъун бук1ин х1исабалдеги босун, гьеб бит1арабги бук1ина, цоял-кидаго лъимгун, цойгидал баччулел теч1ого. Райцентралъул цо-цо авалаздаги, Бакьагьечlи росулъги тlубанго т1аг1ун яги цlорон буго лъим. Гьелъие жаваб кьолаго, Нурмухlамад Задиевас абуна аслияб къагlидаялъ лъим дагьлъиялъе гlилла бугин ахирал соназда тlабигlаталда лъугьун ругел хиса-басиялилан. Ай, дагьлъун буго гlазу-цlад. Мисалалъе, гьаб хаселалъ унго-унголъун цониги нухалъ гlазу бачlо районалде. Гьединго цо-цояз жидерго рокъоб цlорочlого букlинеян, цойгидазул ургъел гьабич1ого минаялъул чанго точкаялда гlодобе биччан толеб буго лъим. Гьелдалъун цо-цо авалазде лъим тlубанго къотlулебги буго. Бакьагьечlи бегавуласул хlаракаталдалъун хасаб транспортги чlезабун баччулеб буго лъим, амма гlезегlан кlудияб росдае гьедин биччараб лъим гlелищха. Хунзахъги лъим гьечlого хутlарал авалазде гьединго баччизе ккелилан тlадкъайги кьуна бет1ерас бегавуласе. 

Ахирисел къоязда районалъул мугlалимзабазул рахlат хвезабун букlана жеги араб сонил декабралъул харжал щун гьечlолъиялъ. Гьелда хурхунги букlана чанго суал. Районалъул нухмалъулес бицана декабралъ учительзабазе авансал кьун рукlанин, амма республикаялдаса кватlун гурони сурсатал рачlинчlолъиялъ, лъагlел лъугlилалде тlубанго харжал кьун рахъинчlилан. Амма гьал къоязда гьелги кьезе ругилан ракl чlезабуна гьес.

Суалазул гlемерисел рукlана райцентралдасан рачlарал. Гьедин, Хунзахъан бачlараб цоги суалалда цlехолеб бугоан гlемерисел къватlахъ чирахъал рекlунел гьечlин, гьабсагlаталда гьеб иш районалъул администрациялде тlаде кколелъул, гьелда хурхун щиб хlалтlи гьабулеб бугебан. Гьабсагlаталда райцентралъул къватlахъ 500 чирахъ бугилан бицана Нурмухlамад Махсутlхlажиевичас. Узухъда, гьезул цо-цоял хlалтlулелги гьечlин. Жидеда ракlалда бугин централияб къотlноб ругел чирахъал республикаялъул Транспорталъулгун нухазул магlишаталъул министерствоялъул балансалде кьезеян тlадеги жубана гьес. 

Накlкlикьан бачlараб суалалда хъвалеб бугоан росулъ садик рагьизе санагlалъи кколарищан. Ахирисеб кlиго соналъ гьеб суал жидер бербалагьиялда гъоркь бугин, садик базе участокги, цогидал хlажатал документалги хlадурун ругин, кватlичlого проект хlадуризе бугилан жаваб кьуна Нурмухlамад Задиевас.

Залалда гlодор чlаразулги рукlана жидерго суалал. Щибаб данделъиялда гlахьаллъи гьабулев районалъул Жамгlияб палатаялъул член, Хунзахъа Гlумаров Тимурил суалал кидагогlадин хурхарал рукlана лъай кьеялъул бутlаялда. Бекьечlдерил бегавул Ахlмад Гъазиевас абуна исана Расул Хlамзатов гьавуралдаса 100 сон тlубайги кlодо гьабизе бугелъул, школаздаги, ясли-ахаздаги, киса-кибго рахьдал мацlалде кlвар кьезе лъикlаб букlинилан.

Тадбиралъул ахиралда Нурмухlамад Задиевас баркалаялъул кагътал кьуна районалъул жамгlиябгун политикиябгун гlумруялда жигараб гlахьаллъи гьабулел цо-цо хlаракатчагlазе.
И. Мухlамадов.