16 августалда райадминистрациялда тlобитlана районалъул терроризмалда данде къеркьеялъул комиссиялъул (АТК) иргадулаб данделъи. Гьелда гьоркьор лъун рукlана муниципалитеталъул лъай кьеялъул учреждениял терроризмалъул хlинкъиялдаса цlуниялъул ва Лъай кьеялъул къоялде хlадурлъиялда хурхун райадминистрациялъул лъай кьеялъул отделалъул хlалтlул хlасилал гьариялъул, диниял гlуцlабазул терроризмалдаса цlуниялъул, гьезул категорирование ва паспортизация гьабиялъул, Расул Хlамзатовасул 100 сонилаб юбилей кlодо гьабиялда хурхарал тадбирал тlоритlулеб заманалда гlемерал гlадамал данделъулел бакlазда жамгlияб гlадлу-низам ва хlинкъи гьечlолъи чlезабиялда хурхун гьабулеб бугеб хlалтlул, 2019-2023 соназда Хунзахъ районалда терроризмалъул идеологиялда данде къеркьеялда хурхун комплексалъулаб планалда рекъон тадбирал тlоритlиялъул хlакъалъулъ суалал.
Данделъиялда гlахьаллъи гьабуна хlинкъи гьечlолъиялъул рахъалъ районалъул бетlерасул замсетитель, районалъул АТКялъул секретарь Хlамид Гьитlиновас, УФСБялъул Хунзахъ бугеб районазда гьоркьосеб отделалъул начальник Шамил Гlумаровас, РОВДялъул нухмалъулесул ишал тlуралев Шамил Маликовас, лъай кьеялъул отделалъул начальник Патlимат Хlамзатовалъ ва цогидазги.
Тlоцебесеб суалалда хурхун баян кьуна Патlимат Хlамзатовалъ. Гьелъул рагlабазда рекъон районалъул киналго лъайкьеялъул гlуцlабазул минаби руго сверун къан, киназдаго руго видеокамераби, тревогаялъулал кнопкаби, цlадудаса цlуниялъул системаби, экстреннияб хъулухъалъул телефонал. 38 школалда ва 10 садикалда лъун руго металлодетекторал. 5 школалда буго къад къоялъул охрана (ЧОП), исана цlияб цlалул соналдаса байбихьун гьединабго охрана букlине буго жеги 5 школалдаги (гьезда гъорлъ руго районалда цlиял рарал Гlарани ва Гlобода гьоркьохъел школалги). Кlиябго цlияб школалда шартlал гlуцlун руго СанПиналъул киналго тlалабазе жаваб кьоледухъ.
Районалъул имамасул вакил Шамил Гьитlиновасовас бицана жакъа къоялде районалда бугин 70 ялдасаги цlикlкlун мажгит, гьездасан жакъа къоялде гlицlго 16 мажгиталъул хlадурун бугин “зеленка”. Муниципалитеталъул диниял учреждениязул аслияб гlузру кколеб буго хlинкъи гьечlолъиялъул паспортал гьечlолъи. Гlицlго райцентралъул болмажгиталъул хlадурун рагlула хlинкъи гьечlолъиялъул паспорт. Гьебги жеги тасдикъ гьабун гьечlо. Гьел суалал рагlалде рахъинариялда хурхун жидеца хlалтlи гьабулеб бугилан тlадеги жубана гьес.
Районалъул полициялъул нухмалъулесул ишал тlуралев Шамил Маликовас бицана кватlичlого тlаде щолеб бугеб Расул Хlамзатовасул юбилей кlодо гьабиялда хурхун тlоритlизе ругел тадбиразда хlинкъи гьечlолъи цlуниялъе жидецаго гьабизе бугеб хlалтlул хlакъалъулъ. “Юбилеялъулал тадбирал тlоритlулел къоязда жамгlияб хlинкъи гьечlолъи цlуниялъе тlобитlулеб хlалтlулъ гlахьал гьаризе руго отделалъул киналго хlалтlухъаби, гьенир рукlине руго мадугьалихъ ругел районазул отделазул хlалтlухъабиги. Гьединго, хlажалъи ккани, ахlизе руго Шамилхъалаялда ва Цlумада бугеб СОБРалъул хlалтlухъабиги. Цохlо жамгlияб гlадлу-низам цlунулаго, нилъеда кlочон тезе бегьуларо цогидал рахъазде кlвар кьезеги. Кlвар кьезе ккола цlадудаса цlуниялъул ва санитарияб рацlцlа-ракъалъи цlуниялдеги”, - ян абуна гьес.
2019-2023 соназда Хунзахъ районалда терроризмалъул идеологиялда данде къеркьеялда хурхун комплексалъулаб планалда рекъон тадбирал тlоритlиялъул хlакъалъулъ бицана Хlамид Гьитlиновас. Гьедин, 3 сентябралда районалда тlоритlизе руго терроризмалда данде къеркьеялъул къоялда хурхарал тадбирал. Гьединго Хlамид Мухlамадовичас ракlалде щвезабуна щибаб гlуцlиялъ кварталалда жаниб АТКялъул рахъалда гьабураб хlалтlул хlакъалъулъ справкаби ригьда кьезе кколеблъиги.
“Цересел соназда данде ккун терроризмалъул хlинкъи гlодобцун бугиланги абун нилъеца хlалтlи чучлъизе тезе бегьуларо. Нилъеда лъаларо кисан хlинкъи тlаде бачlинебали. Гьединлъидал хасаб кlвар кьезе ккола жакъа нилъеца гьаниб бицаралде”, - ян абуна данделъи нухда бачарав Шамил Гlумаровас.
Данделъиялда гьарурал кlалъаязухъги докладазухъги гlенеккун комиссиялъ къабул гьаруна дандрекъон кколел хlукмаби ва хасал тlадкъаял кьуна иш тlаде кколел жавабиял хlалтlухъабазе.
И. Мухlамадов.
| 
