Районалъул г1аммал маг1ишатазул г1и-боц1уда хасел
т1амизабиялде бугеб х1адурлъиялъул ва гьелъул иналъул бицунаго абила, кинабниги
хасел т1амулеб ч1ег1ер боц1ул къадар-5800, гьездасан 2100 бет1ер г1ачиязул ва
63100 бет1ер г1и-ц1аназул, гьездасанги 39600 бет1ер чахъабазул кколилан.
Г1и-боц1уе х1адурараб харил къадар бахуна 16500 тоннаялде, сенаж-4720 тоннаялде
ва соломадул 1230 тоннаялде. Кизилюрталъул гочинабун г1и-боц1и хьихьулеб
зонаялда хасел т1амулеб буго 3513 бет1ер ч1ег1ербоц1уца ва 21450 бет1ер г1и-ц1аназ.
Кизилюрталъул зонаялда хасел т1амулеб буго Хунзахъ Хизроевасул, Бакьагьеч1и
Дудар Г1алиевичасул, Г1обода Ленинил, Г1ахьалч1и Энгельсил ц1аразда ругел, Х1ариколо
«Баг1арав партизан» ва Гьамущи, Мущули, К1ахъ, Байкь росабазул маг1ишатазул
г1и-боц1уца. Гьеб зонаялда хасел т1ами лъик1 унеб буго Г1ахьалч1и Энгельсил,
Х1ариколо росдал «Баг1арав партизан», Бакьагьеч1и Дудар Г1алиевичасул ц1аразда
ругел колхозазда х1алт1и лъик1 иналъул мурадлъун ккола цебе соназда данде ккун
боц1ул къадар дагьлъизе биччангут1и ва породаялъул хасиятал лъик1лъизари. Хас
гьабун рехсезе бокьун буго Энгельсил ц1аралда бугеб СПКялда гьабулеб бугеб
х1алт1ул. Т1убанго хисун буго фермаялъул сипат. Жаниса рац1ц1арал бокьалги
къват1исан территориялда гьабураб къач1а-к1ат1айги, г1архъида лъураб хергун
солома-гьеб киналъго гъира базабулеб буго гьенир жанир х1алт1улел
боц1ухъабазулги. Гьезие ч1езарун руго лъик1ал шарт1ал-бух1араб ва ц1орораб
лъим, рет1ел хисизе хасаб рукъ, х1алт1и лъуг1ун хадуб рац1ц1а-ракъалъи гьабизе
душеваяги. Фермаялде боц1ухъаби раччизе ч1езабун буго Газель машина. Жибго
боц1иги буго лъик1аб кьаралъиялда. Фермаялда жаниб х1алт1улел руго киналниги
механизмаби (рак къват1ибе кьабиялъул, лъим гьекъеялъул). Жакъа къоялъул х1исаб
гьабун 100 центнералъ ц1ик1к1ун буго араб соналде данде беч1ч1араб рахьдал
къадар, откормалда лъун буго 55 лъаг1алидаса эхеде араб баси. Колхозалъул
правлениялъги, гьелъул председатель Мух1амадов Г1абдулацаги к1вар буссинабулеб
буго херал, унтарал, щокъал г1ачиял хисиялде. Санайил фермаялде бач1уна 15-20
къинлъизе х1адурараб г1ач1ар. Фермаялъул территориялда гьабун буго щвалт1е
щвараб боц1и жанибе гъолеб раскол. Гьединаб раскол районалъул цониги росулъ, я
г1аммаб маг1ишаталда гьеч1о. Расколалъ к1удияб кумек гьабула боц1уе гьабулеб
дару-сабаб щвалт1е щвеялъе. Фермаялъул территориялдаго буго к1алц1и хъурулеб
цехги. Сараял руго лъик1го къач1ан, кинаб бук1аниги квач боц1уда хъвалареб
х1алалъ. Жалго фермаялда х1алт1улел боц1ухъабазул хабаралъухъ г1енеккараб
мехалдаги, гьезул буго х1алт1уде к1удияб гъира, заманалда кьолел руго харжал,
раг1и-хералдалъун кумекги щолеб буго.
Бабаюрт зонаялда хасел т1амулеб буго Тельманил ц1аралда
бугеб, «Машгьурал г1адамал», «Ц1ияб г1умру», Гьамишт1а, Г1орут1а, Буц1ра,
Лъаг1илухъ, Г1ебут1а, Гъоркьколо, Гьац1алухъ колхозазул, «Гьоц1алъ» ГУПалъул ва
«Харахьи» МУПалъул-кинабниги 2287 ч1ег1ерх1айваналъги 13673 г1и-ц1аназги. Хасел
т1амиялъул ин лъик1аб даражаялда унеб буго Гьамишт1а, Лъаг1илухъ, Гъоркьколо ва
Гьоц1алъ маг1ишатазда. Гьениб лъик1аб даражаялъул х1алт1и гьабун буго боц1и
жаниб толел сараял къач1аялда сверухъ, лъик1ал шарт1ал ч1езарун руго
боц1ухъабазеги.
Жаниса рац1ц1ун, рохьун къач1ан руго Гьамишт1а СПКялъул
к1иябго фермаги Гъоркьколо ва Гьац1алухъ кооперативазул сараялги. Гьезие
ч1езабун буго г1ураб къадаралъул хъач1аб раг1и-хер, к1улц1ул къадар заг1ипго
бугониги, гьеб къват1иса балагьиялда т1ад х1алт1улел руго маг1ишатазул
нухмалъулел.
Гьамишт1а, Буц1ра, Лъаг1илухъ, Гъоркьколо, Гьац1алухъ
маг1ишатазда г1одобе ккезе биччан гьеч1о гъоркь соналде данде ккун боц1ул
къадар.
Кочубеялъул зонаялда хасел т1амулеб буго г1ухьбузулги цадахъ
къан Хизроевасул, Ленинил ц1аразда ругел, Гьамишт1а, «Машгьурал г1адамал»,
Буц1ра, Моч1охъ, Г1ебут1а маг1ишатазул 28056 бет1ер г1и-ц1аназ. Гьениб лъик1аб
х1алт1и г1уц1ун буго Гьамишт1а СПКялда. Къач1арал г1ухьбузул рукъзалги, ремонт
гьарурал г1и жанибе гъолел бокьалги, чалмалги. Рак1ч1ола гьениб хасел т1ами
бергьенлъиялда ине бук1иналда. Гьабсаг1ат Кочубеялъул авлахъалда хер лъик1
гьеч1о. Хасел буго квачараб, х1ажат буго гьал хадур рехсарал маг1ишатазул
нухмалъулезе ремонталъулал х1алт1аби хехаб заманалда лъуг1изаризе ва раг1и-хер
гьенибе рехиялъул х1алт1и раг1алде бахъинабизе.
Хъ. Г1амирханов, ветуправлениялъул нухмалъулев.
|
