14 декабралда районалда кlодо гьабуна ДРялъул Халкъияй поэтесса, Андрей Первозванныясул орденалъул кавалер, жамгlияб хlалтlул жигарай цеехъан Фазу Гlалиева гьаюралдаса 90 сон тlубаялъул юбилей. Тадбиралда гlахьаллъи гьабизе рачlаразда гъорлъ рукlана республикаялъул Миллияб политикаялъулгун диниял ишазул рахъалъ министр Энрик Муслимов, шагlиралъул вас, пачалихъияб академикияб “Лезгинка” кьурдул ансамблялъул генералияв директор Жамбулат Мухlамадов, “Единая Россия” партиялдасан ДРялъул Халкъияб Собраниялъул депутат Хучбар Хучбаров, ДРялъул Халкъияй поэтесса Залму Батирова, хъвадарухъабазул Союзалъул председатель Мухlамад Ахlмадов, Гъуниб районалъул бетlер Мудунхlажи Къадиров, федералиялгун регионалиял СМИязул вакилзаби ва цогидалги шагlиралъул гlага-божарал.

Тадбир байбихьана райцентралда балеб бугеб афгъанцазул паркалда Фазу Гlалиевалъе бараб бюст рагьиялдасан. Гьенибго тlобитlараб “Магlарулалъул шал” абураб акциялда рекъон, хъахlал шалаз берцин гьарурал руччабиги рихьулаан.

Хадуб киналго щвана Ш. Шамхаловасул цlаралда бугеб культураялъул кlалгlаялде. Гьениб жанахlалъуб районалъул культураялъул бутlаялъул хlалтlухъабазул хlаракаталдалъун гlуцlун бугоан умумузул ретlел-хьиталъул, тlагlел-алаталъул ва квен-тlехалъул цебелъей. Бокьаразул рес букlана гьелъул хlалбихьизеги.

Тадбиралъул официалияб бутlаялде байбихьана шагlиралъул хlакъалъулъ бахъараб документалияб фильм бихьизабиялдасан. Данделъаразе саламги кьун тадбир рагьана районалъул бетlер Нурмухlамад Задиевас.

“Фазу Гlалиевалде бугеб рокьулги адабалъулги бицине бегьула батlи-батlиял рагlабаздалъун. Амма гlагараб Хунзахъ районалда киналго чlухlула шагlиралдаса ва нижее цlакъ кlвар цlикlкlараблъун букlана гьелъул гlагараб ракьалда памятник рагьи.  Фазу Гlалиевалъул кучlдуз рекlелъе хинлъи лъугьинабула, рорчlизарула бищунго лъикlал хиялал. Гьелъул творчествоялдасан нилъер гlагараб ракь лъана чlужугlаданалъул хинлъиялъул ва гlакъиллъиялъул рахъалдасан, гьелъ киназего рагьана Дагъистаналъул чlужугlаданалъул хасият. Гьелъ жиндирго кучlдузулъ нилъеда ракlалде щвезабулеб буго заманаялъ гlадамал гурел, гlадамаз заман хисизабулеб букlин. Шагlиралъул тlолабго творчествоялда аслияб бакl кколаан рекъел цlунизе ккеялде ахlарал асараз. Гьелъул хlакъалъулъ цохlо хъван чlечlо гьей, жинцагоги гlемераб хlалтlи гьабуна халкъазда гьоркьосеб рекъел цlуниялъе. Жиндирго гlакъиллъиялъги, бегlераб пикруялъги, Ватlаналде бугеб рокьиялъги Фазу Хlамзатовнаялда кlвана цlорорал ракlазулъ цlа бакизе ва жиндир заманалда цо-цоял гlодоре руссинаризеги. Украинаялда унеб бугеб хасаб операциялда гlахьаллъи гьабулел ругел гlолохъабазе девизлъунги гьезул улбузул ракl чучулеллъунги руго гьелъул асарал жакъаги. Нилъер гlолохъабаз жидерго ишазулъ бихьизабулеб буго шагlиралъул творчествоялъул ирсалъе ритlухъал рукlин. Гьелъул тlубараб гlумру буссараб букlана Дагъистаналъулги Россиялъулги инсанасул яхl-намусги къадру-къиматги цlуниялде. Гьеб кинабго гьабизе кlвезе букlана гlицlго къуватай чlужугlаданалда. Жакъа нилъецаги кlудияб кlвар кьезе ккола Фазу Гlалиевалъул рухlияб ирс цlуниялде”, - ян абуна гьес. 

“Дагъистаналъул Бетlер Сергей Меликовас гlуцlун букlана Фазу Гlалиева гьаюралдаса 90 сон тlубаялда хурхун республикаялъул даражаялда тадбирал тlоритlиялъул план ва гьев живго вукlана оргкомитеталъул председательлъунги. Цохlо Дагъистаналда гуребги, Россиялда кlодо гьабулеб буго кlудияй шагlиралъул юбилей. Нижер вакилзабазул кумекалдалъун тадбирал гlуцlулел руго тlолабго улкаялда. Мисалалъе, гьал къоязда Осетиялда тlобитlизе Фазу Гlалиевалъул юбилей кlодо гьабиялда хурхун тадбир. Гьелъул асаразулъ буго цо хасаб тlокlлъи, хасаб гъварилъи ва гьел цlаларав чиясда гьениб батула жиндиего хlажатабщинаб. Гьей йикlана унго-унгояй магlарулай, гьелъулъ ракlарун рукlана чlужугlаданалъулъ рукlине кколелщинал гlамалал. Хунз чlухlизе бегьула Фазу Гlалиевагlадай гвангъараб цlва нужер ракьалда бижиялдаса”, - ян абуна Энрик Муслимовас.

Гьединго кlалъаял гьаруна Мудунхlажи Къадировас, Жамбулат Мухlамадовас, шагlиралъул васасул яс Хlапизат Кичиевалъ ва цогидазги. Жамбулат Мухlамадовас ва Хlапизат Кичиевалъ шапакъатал кьуна районалъул бетlер Нурмухlамад Задиевасе ва депутат Хучбар Хучбаровасе.

 
Тадбиралда гугьар базабун букlана кlалъаязда гьоркьор рихьизарулел кучlдул ахlиялъул, рикlкlиналъул ва театралъулал церерахъиназ. 

Ахиралда Нурмухlамад Задиевас Энрик Муслимовасе ва Мухlамад Ахlмадовасе сайгъат гьаруна цояб рахъалда Фазул, цогидаб рахъалда Расул Хlамзатовасул кучlдузул цо-цо куплет хъварал буртинабиги. 
И. Мухlамадов.