 4 декабралъ 73 сонил г1умруялда нилъедаса ват1алъана
хъвадарухъан, журналист ва лъик1ав инсан Х1ажиев Х1усен. Гьев гьавуна 1938
соналъул 6 февралалъ Гьоц1алъ росулъ.
Бигьаяб бук1инч1о гьит1инго эбел-эменги
хун хут1арав Х1усен Х1ажиевасул лъимерлъи. Ц1акъ хехго лъана гьесда
зах1мат-г1акъуба бихьун босараб хинк1-чедалъулги рет1ел-хьиталъулги къимат.
Школа лъуг1ун хадуб гьев х1алт1ана Унсоколо районалъул Рихьунив консервал
гьарулеб заводалда, Лъарат1а ва Хьаргаби районазул газетазул редакциязда,
комсомолалъул райкомалда.
К1икъоялда щуго соналъул нух нахъа
тана Х1усеница республикаялъул маг1арулазул «Х1акъикъат» газеталда.
Х1алт1улаго, заочно ц1алун лъуг1изабуна Ростовалъул т1адег1анаб партшколаги.
Литературияв х1алт1ухъан, к1удияв литературияв х1алт1ухъан, отделалъул
заведующий, жавабияв секретарь - гьеле XI. Х1ажиев редакциялда вахарал
хъулухъалъул болъодул х1ок1ал. Амма гьелъ гуро творчествоялъул чи ворцунев,
гьев халкъалда лъалев, махщалил камиллъиялъ, ц1аларав чиясе асар гьабулел макъалабазги,
харбазги, къисабазги бицуна г1адамазе журналистасул, хъвадарухъанасул
х1акъалъулъ. Бат1и-бат1иял темабазда хъварал анц1-анц1 макъалабаздалъунги
репортажаздалъунги, очерказдалъунги, махсароялъулгун сатираялъул хъвай-хъваг1аяздалъунги
лъана Х1усен маг1арулазда.
Х1усен Х1ажиев вук1ана Россиялъул Хъвадарухъабазулги Журналистазулги
союзазул членлъун. Гьесие кьун рук1ана Дагъистаналъулги Россиялъулги
культураялъул мустах1икъав х1алт1ухъан абурал х1урматиял ц1арал, улкаялъулги
республикаялъулги бат1и-бат1иял идарабазул Х1урматалъул грамотаби ва цогидалги
шапакъатал.
Бищунго к1удияб шапакъатлъун
Х1усение бук1ана рек1елъ иманги бугев, намус-ях1ги г1аданлъиги ц1унаравлъун
живго ватиги, лъик1ав инсан х1исабалда жив лъалевщиназ къабул гьавулев
вук1инги.
Лъималазе камуна т1алаб бугев
эмен, Гьоц1дерил росдае, районалъе-жидер къадруяв вас, журналистазулги
хъвадарухъабазулги жамаг1аталъе гьунар бугев махщелцояв ва рак1жубарав гьудул.
Аллагьас Алжан насибавлъун гьавун ватаги гьев г1амал берцинав, гlaданлъи к1удияв лъик1ав инсан.
Райадминистрация.
Райсобрание.
Гьоц1дерил жамаг1ат.
«Росдал зах1матчи» газеталъул
коллектив.
| 
