 Районалъул росдал маг1ишаталъул управлениялда данде росана
2011 соналъул т1оцебесеб кварталалъул х1асилал. Гьениб т1оцебесеб бак1
Бакьагьеч1и росдал Дудар Г1алиевичасул, к1иабилеб Г1ахьалч1и росдал Энгельсил
ц1аразда ругел маг1ишатазе кьуна. Лъабабилеб бак1 х1арисезул «Баг1арав
партизан» ва Хунзахъ Хизроевасул ц1аралда бугеб колхозазда гьоркьоб бикьана.
Г1аммаб къаг1идаялъ босани, араб соналде данде ккун исана
г1аммаб маг1ишат цебет1еялъул ругел х1асилаз рак1 рази гьабула. 2011 соналъул
т1оцебесеб кварталалда районалдаго дандекъан маг1ишатазда буго 5335
ч1ег1ерх1айван, гьездаго гъорлъ 2233 г1ака. Араб соналъул гьебго заманалде
дандеккун ч1ег1ербоц1ул къадар 211 бет1ералъ ц1ик1к1ун руго. Араб соналдаса 900
г1ан бет1ералъ ц1ик1к1ун буго г1и-ц1аназул къадарги, исана т1оцебесеб апрелалде
гьезул г1аммаб къадар 55792 бет1ералде бахун буго. 25 азаргоялде бахун буго
щвараб т1инч1ги.
 Исана т1оцебесеб
кварталалда маг1ишатазда г1езабун буго 416 тонна рахьдал. Араб соналде
дандеккун гьебги 44 тоннаялъ ц1ик1к1ун буго.
Районалъул маг1ишатиял бут1абазда гъорлъ росдал маг1ишат
аслияблъун кколелъул, гьеб цебет1езабиялде кьолеб к1варги ц1ик1к1араб бук1уна.
Районалъул нухмалъиялъги гьеб т1оцебесеб иргаялъулаблъун рик1к1уна, х1аракат бахъула
росдал маг1ишат цебет1еялъе ц1и-ц1иял ресалги нухалги ратизе,
г1и-боц1ухъабазеги хур-хералъул х1алт1ухъабазеги х1алт1уегун х1ухьбахъиялъе
шарт1ал г1уц1изе.
Г1и-боц1ухъанлъи цебет1еялъе аслияб шарт1лъун раг1и-хер
кколелъул маг1ишатазда ц1ик1к1араб к1вар кьола хурухъанлъиялде. Араб соналъул
ахиралда лъик1аланго г1ат1илъиялда рекьун рук1ана хаслихъе культураби.
Агротехникиял
т1алабазда рекъараб хъулухъги гьабун гьанже гьел лъик1го т1аде
раккун руго. Хурухъабазул хьул буго хаслихъе культурабазул лъик1аб бач1ин
щвезе. Араб соналдаса 100 гектаралъги ц1ик1к1инабун, 600 гектаралда рекьана
ихдалил культурабиги.
Квачараб-халатбахъараб бук1ана исанисеб хасел. Маг1ишатазда
х1аракат бахъана гьеб г1и-боц1ул т1асаин ккезе теч1ого т1амизе. Ахиралде щолеб
буго бищунго жавабияздасан кколеб г1и къинлъул кампания, раг1алде рахъунел руго
ах-хуралъул х1алт1аби. Гьаб сон дагьалги лъик1ал х1асилалгун т1обит1изе
х1аракаталда къеркьолел руго районалъул г1и-боц1ухъабиги хур-хералъул
х1алт1ухъабиги.
Росдал маг1ишаталъул пресс-группа.
| 
