29 апрелалда райадминистрациялда т1обит1ана районалъул терроризмалде данде къеркьеялъул комиссиялъул (АТК) иргадулаб данделъи.
Гьелда г1ахьаллъи гьабуна районалъул бет1ер, АТКялъул председатель Нурмух1амад Задиевас, республикаялъул Бет1ерасул кумекчи, ДРялъул АТКялъул Муг1рузулаб территориалияб округалда вугев вакил Сайпудин Сайповас, районалъул нухмалъулесул заместитель Х1амид Гьит1иновас, РФялъул МВДялъул Хунзахъ районалда бугеб отделалъул начальник Мух1амадх1ажи Сайбулаевас, Муфтияталъул просвещениялъул отделалъул нилъер районалда вугев вакил Г1алиасх1аб Мух1амадовас, Хунзахъ бугеб г1орхъаби ц1унулеб хъулухъалъул командир Андрей Ермаковас, прокурорасул заместитель Мух1амад Г1исалмух1амадовас, цогидалги АТКялъул г1ахьалчаг1аз, СМИязул ва жамг1ияталъул вакилзабаз.
Данделъиялда гьоркьор лъурал суалаздасан рук1ана байрамалъулал тадбирал т1орит1улел 1-12 маялда жамг1ияб г1адлу-низам ц1уни, районалъул г1адамал г1агараб Бакъбаккуде ц1ализеги ун, гьениб мекъаб идеологиялде гъорлъе ккеч1ого рук1иналъе районалъул рух1анияз гьабалеб бугеб х1алт1ул бицин, районалъул лъайкьеялъул г1уц1абазда т1орит1арал халгьариязул х1асилалда терроризамалдаса ц1униялде хурхун гьенир ратарал г1унгут1аби т1аг1инари, 2019-2023 соназда РФялъул терроризмалъул идеологиялде данде къеркьеялъул комплексалъулаб план Хунзахъ районалда г1умруялде бахъинаби.
Т1оцебесеб суалалда хурхун данделъараз х1укму гьабуна районалъул полициялъул начальник Мух1амадх1ажи Сайбулаевасе 1-12 маялъ т1орит1изе ругел байрамалъулал тадбиразул заманалда жамг1ияб г1адлу-низам ц1униялде ва байрамал т1орит1изе ругел бак1азда х1инкъи гьеч1олъи ч1езабиялде ц1ик1к1араб к1вар кьезе. Гьединго росабазул бегавулзабазда лъазабуна байрамазул заманалда жавабиял дружинниказул сиях1 бихьизабеян ва сураталгун цадахъ гьабураб х1алт1ул х1акъалъулъ информация районалъул АТКялде кьезе.
Г1алиасх1аб Мух1амадовасул к1алъаялдаса хадуб комиссиялъ х1укму гьабуна г1адамал мекъаб идеологиялде гъоркье ккеч1ого рук1ине районалъул имамас ва росабазул дибирзабаз гьабулеб х1алт1и жеги лъик1лъизабизе.
Районалъул лъайкьеялъул начальник Х1амзатов Г1абдулпатах1ица бицана к1иго школалде ва к1иго ясли-ахалде хут1изег1ан, цогидал районалда ругел лъайкьеялъул учреждениязда видеокамераби лъун ругилан. Гьединго киналго г1адин лъайкьеялъул г1уц1аби сверун ругила рорхатал заборал, хехаб кумекалъул телефонал. Комиссиялъ х1укму къот1ана ц1ияб ц1алул сон байбихьилелде гьеб к1иябго школалдаги к1иябго ясли-ахалдаги видеокамераби лъезе кколилан.
Сайпутдин Сайповас бицана терроризмалъулгун экстремизмалъул идеологиялде данде къеркьей чучлъизе тезе бегьуларин ва киналго ах1ана гьелде халатаб к1вар кьезе.
| 
