23 октябралда районалъул бет1ер Нурмух1амад Задиев администрациялъул х1алт1ухъабигун цадахъ г1ахьаллъана республикаялъул Х1укуматалъул рокъоб Х1укуматалъул председателасул заместитель Екатерина Толстиковалъул нухмалъиялда гъоркь т1обит1араб данделъиялда. Гьединго гьениб г1ахьаллъана чанго районазул нухмалъулелги, Дагъистаналъул ракьазулгун мал-мулкалъул министр Агъарагьим Къагьирх1ажиев, ДРялъул «Дагтехкадастр» РБУялъул нухмалъулев Александр Беднягин, республикаялъул парламенталъул ва муниципалиял депутатал, УФНСалъул ва экономикаялъулгун территориалияб цебет1еялъул министерствоялъул вакилзаби ва цогидазги.

Данделъиялда аслияб къаг1идаялъ бицана пачалихъияб кадастровияб къимат кьеялъул гьабсаг1аталда ругел х1асилазул анализ гьабиялъул.

Районалъул вакилзабаз бицана кадастровияб къимат кьеялъул отчеталда хурхун жидерго ругел т1адкъаязул (замечания). Х1алт1ул х1асилалда хадуб мух1канаб халкквеялъул мурадалда районаз бихьизабуна гьезул пикруялда рекъон, отчеталда багьа ц1ик1к1ун бихьизабурал къимат кьурал объектазул х1акъалъулъ баяналги гьезул сураталги. Цадахъ гьабураб анализалъул х1асилалда загьирлъана гьарурал сон, г1ат1илъи ва къадазул материалалъул х1акъалъулъ баянал гъалат1алги риччан ЕПРНалде росарал объектал.

Александр Беднягиница бицана гьаб отчет ахирияб гурин ва районазухъа, физическиялгун юридикиял лицабазухъа щвараб информацияги х1исабалде босун гьеб отчет хисизабизе бугилан. «Дагтехкадастралъ» х1исабалде росун гьеч1ила жеги т1адкъаял. Агъарагьим Къагьирх1ажиевас баян кьуна т1адкъаял къабул гьарулел заман лъуг1улеб бугин, амма пачалихъияб кадастровияб къимат кьеялъул отчет тасдикъ гьабун хадубги гьеб хисизабизе рес бук1унилан. 1 янвралдаса байбихьулеб буго гъалат1 бит1изабизе г1арзаби кьолеб заман.

Гьединго муниципалитетазе бицана Налогазул кодексалъ ч1езарурал льготабазулги. Мисалалъе, исана кьураб ракьул налогалъул ц1ик1к1ел цебесеб соналъул налогалъул 10% т1аде бахунеб гьеч1о. Гьединго буголъиялъул налогалда хурхун х1алт1изабулеб буго дагьаб 0,2 коэффициент.