22-23 маялда районалда тlоритlана ахирисеб цlумур кьабиялъул байрамал. Исана муниципалитеталда школазулгун къо-мех лъикl гьабулеб буго 111 цlалдохъанас. 9 класс лъугlулеб руго253 чияс. Кидагогlадин кlудияб чlаголъиялда тlобитlана ахирисеб цlурмил байрам районалда бищунго кlудияблъун кколеб Хунзахъ гьоркьохъеб тlоцебесеб школалдаги. Исана рехсараб школалъул 11 класс лъугlана 26 выпускникас, 9 класс лъугlаулеб буго 62 цlалдохъанас.

Баркиялъулаб кlалъайгун тадбир рагьана школалъул директор Хlаштlихова Раисатица. “Жакъа буго рохелги пашманлъиги жубараб къо. Цо рахъалъ нужеца гали тlамулеб буго цlияб гlумруялде, цоги рахъ босани, нижеца жакъа къо-мех лъикl гьабизе кколеб буго нужергун. Кигlан борхалъуде нуж раханиги нужеда кlочон тоге нужерго тlоцересел учительзаби, гlагараб школа ва рижараб росу-ракь. Дир хьул буго нуж тlадегlанаб лъайги щун, гlагараб район цебетlезабизе тlад руссинилан. Нужее нухал ритlаги!”, - ян абуна гьелъ.
Гьединго кlалъаял гьаруна райадминистрациялъул лъай кьеялъул отделалъул начальник Патlимат Хlамзатовалъ, хундерил бегавул Мухlамад Тlалхlатовас ва цогидазги. Грамотабиги кьун кlодо гьаруна олимпиадабазда ва батlи-батlиял конкурсазда цересел бакlал ккурал, школалъул жамгlияб гlумруялда жигараб гlахьаллъи гьабулел цlалдохъаби. Выпускниказул эбел-инсул рахъалдасан баркалаялъул кlалъай гьабуна Ниматулаева Субайбатица. 
Ахирисеб цlумур кьабизе ихтияр кьуна выпускникал Тlагьиров Юсуфие, Ниматулаева Написатие, Рахlматулаева Багисултание, Махlмудова Патlиматие ва 1 классалъул цlалдохъан Мустlафаев Мухlамадие. Тадбиралъул ахиралда кочlолаб номергун цее яхъана Дагъистаналъул Мустахlикъай артистка Умукусум Мухlамадовги.
И. Мухlамадов.