26 апрелалда Мах1ачхъалаялда «Гьудуллъиялъул рокъоб» т1обит1ана районалъул г1олилазулгун интеллигенциялъул форум. Гьелда г1ахьаллъи гьабуна районалъул т1алъиялъ, цо-цо республикаялъул министерствабазулгун ВУЗазул нухмалъулез, СМИялъул вакилзабаз, районалъул студентазгун г1олилаз ва цогидазги. Цереселго г1адин, исанасеб форум т1обит1иялъул г1илла бук1ана районалъул ц1алудехун ва спорталдехун гьет1и бугел г1олилал цолъизари, гьезда кверч1вай.

Форум байбихьилалде «Гьудуллъиялъул рукъалъул» жанах1алда г1уц1ун бук1ана Россиялъул мустах1икъав художник Г1амирхан Мух1амадовасул суратазул выставка, гьенибго бугоан районалъул культураялъул бут1аялъул х1алт1ухъабазул х1аракаталдалъун г1уц1араб умумузул квен-т1ехалъул, т1аг1ел-алаталъул ва рет1ел-куналъул цебелъейги. Бокьаразул рес бук1ана умумузул т1аг1амазул х1албихьизеги. Гьединго форум байбихьилалде данделъаразда бихьизабуна Хунзахъ районалъул х1акъалъулъ фильмги.

Тадбир рагьана районалъул бет1ер Нурмух1амад Задиевасул к1алъаялдасан. «Баркала кьезе бокьун буго т1оцебе гьадинаб лъик1аб ва пайдаяб тадбир г1уц1изе рак1алде ккарал дидаса цере рук1ал районалъул нухмалъулезе. Щай гурелъул гьаб форум ккола районалда бугебщиналъул бищун лъик1аб жолъун. Гьанир нилъеца к1одо гьарула гьаб заманалда дандч1валел зах1малъабазухъги балагьич1ого, жидерго церет1еялъул нухдаса кьурич1ого ц1алулел ругел студентал-отличникал, спортсменал ва цогидалги мустах1икъал г1олилал. Гьал ахирал соназда г1олилал т1убанго хисанин абизе бегьула. Гьеч1о цебе г1адин киналго г1олилал цолъизарулел идеябиги церет1еялъе мух1канал нухалги. Гьанже кинабго буссун буго г1арцуде. Амма г1арац гьабизе кканиги къвариг1уна лъик1ал специалистал. Гьединлъидал жакъа дие баркала кьезе бокьун буго унго-унголъунги ц1али гьабулел ругел студентазе. Гьединал, х1акъикъаталда лъайги бажариги бугел студентал нижеца районалде рачинеги руго. Ниж х1адурал руго гьелгун х1алт1изе. Гьединго рак1алда буго цебе советияб заманалда бук1араб, хас гьабун цо мурадалда лъимал ц1ализарулеб къаг1ида ц1и гьабизеги. Т1оцебесеб курсалдаса байбихьун, ахиралде щвезег1ан къайимлъи гьабизе буго нилъер студентазул. Дун божула нилъер г1олилаз жидедаго цере лъурал масъалаби т1уразариялда», - ян абуна гьес.

Жиндирго философиялъулаб къаг1идаялда г1олилаздехун хит1аб гьабуна Дагъистаналъул т1оцевесев президент Мух1у Г1алиевасги.

«Кутакалда рази-ракиго къабуллъана дун форумалда г1ахьаллъизе. Щайгурелъул циндаго рак1алде щвана дирго бах1арал соналги районалъул доб мехалда рук1арал нухмалъулез г1олилалгун т1орит1улел рук1арал дандч1ваялги. Гьединал тадбирал т1орит1улаан цогидал районазул нухмалъулезги. Узухъда, гьанже т1убанго бат1ияб заман бач1ун буго. Бат1ияб буго улка, бат1ияб буго жамг1ияб г1уц1и, бат1иял руго г1олилазул пикрабигун проблемабиги. Гьанжесеб г1ун бач1унеб г1елги ниж г1олохъанаб заманги данде ккуни, дида рак1алде ккола жакъасел г1олилал ругин хъач1аб, кьварараб г1умруялда. Гьеб г1умруялъе г1иллаги ккана СССР биххун хадуб нилъер улка бакът1ерхьул къаг1идаялъул нухдасан инеб бук1ин. Гьеб нухда аслияблъун бук1уна щибав чиясул хасаб интерес, щивасе цох1о жиндирго гурони ургъел бук1унаро. Хасго гьединаб заманалда ц1ик1к1араб к1вар кьезе ккола жакъаг1адинал дандеруссинал т1орит1иялде. Гьединал тадбираз квербакъула моралиялгун рух1иял качествабазул кьуч1алде нилъер г1адамал цолъизаризе»,-ян абуна Мух1у Гьиматовичас.

Гьединго ругел ресалги х1алт1изарун, цолъиялде, ц1алуде, спорталдегун сахаб г1умруялде к1вар кьезе ва умумузул ях1-намус ц1унизе ах1арал к1алъаял гьаруна 2001-2009 соназ районалъул бет1ер, гьанже республикаялъул Пенсиязул фондалъул нухмалъулев Мух1амад Г1исаевас, г1олилазул ишазул рахъалъ министр Камил Саг1идовас, академик Шамил Г1алиевас, философиял г1елмабазул доктор Султану Г1умаровалъ, Россиялъул правовояб академиялъул Мах1ачхъалаялда бугеб филиалалъул ректор Х1усейн Мух1амадовас, ДРялъул Халкъияй поэтесса Залму Батировалъ, боксалъул рахъалъ дунялалъул чемпион Тимур Х1айдаловас, Brave CF23 г1уц1иялъул чемпион Эльдар Эльдаровас, тарихиял г1елмабазул доктор Мух1амад Г1аммаевас ва цогидазги.

Г1олилазулгун студентазул рахъалдасан районалъул нухмалъиялъе баркала кьураб к1алъай гьабуна ДГУНХялъул студент, активист, хундерил г1олилазул союзалъул ц1ивищарав председатель Г1умаров Зубайрица.

Форумалъул мустах1икъал гьалбалгун цадахъ районалъул нухмалъулес сайгъатал кьуна нусгоялдаса ц1ик1к1ун спортсменазе ва студентал-отличниказе.

Тадбиралъул официалияб бут1аялдаса хадуб «Г1акаро» кьурдул ансамблялъ, Зайнаб Махаевалъ, Х1ава Газаховалъ, Тимур Рах1мановас, Г1айшат Айсаевалъ ва цогидалги ц1вабзаз бихьизабуна г1ат1идаб программаялъул концертги.

И.Мух1амадов