Дагъистаналъул Бет1ер Владимир Васильевас Халкъияб Собраниялде гьабураб хит1абалда к1вар кьуна араб соналда ккарал х1асилазде гуребги, жакъа къоялда жаниб цере ч1арал масъалабаздеги, бицана гьел т1уразариялъе х1ажатал нухазулги, х1алт1ул аслиял рахъазулги.

Владимир Васильевас баян гьабуна жакъа къоялда жаниб пачалихъияб политика буссараб бук1ин инсанасул х1инкъи гьеч1олъи ц1униялде, гьесул г1умру гьабиялъул шарт1ал къойидаса къойиде лъик1лъизариялде, рахъи бугеб лъай кьей ва медицинаялъулаб кумек бук1инабиялде.

Хит1абалда бихьулеб бак1 кьун буго социалияб сфераялдеги. В. Васильевасул пикруялда рекъон республикаялда руго ц1акъго г1одорег1анал харжал, пособиял. Гьел ц1ик1к1инаризе рес бугила налогал ц1ик1к1инариялдалъун, бизнесалъул, буголъиялъул ва ракьазул регистрация гьабиялдалъун. Х1укуматалъе гьес т1адкъай кьуна учительзабазе, школалда цебесеб лъай кьеялъул педагогикиял х1алт1ухъабазе ва цогидалги бюджеталде гьоркьоре унел х1алт1ухъабазе мухь-харж ц1ик1к1инабиялъе гьабулеб х1алт1и хадубккунги раг1алде бахъинабизе.

Гьединго кабминалда т1ад къан буго гьес лъимадуе щибаб моц1алъе щолеб пособиялъул къадар ц1ик1к1инабиялъе ресал ратизе, лъимал-инвалидазда хадуб хъулухъ гьабулезе кьолеб г1арцул къадар ц1ик1к1инабизе 5,5 азарго гъурущалдаса 10 азаргоялде щвезег1ан.

Инвалидал х1алт1уде росиялде к1вар кьезе, лъимал-инвалидал ругел хъизаназе бигьалъи гьабулеб ипотечнияб кредит кьеялда 10 соналда жаниб бец1изелъун щибаб моц1алъ дагь-дагьккун кьун гьезда т1ад буссинабизе к1олеб къадаралда.

Хасаб к1вар кьуна гьес сахлъи ц1униялде. Аслияб масъалалъун гьес рик1к1унеб буго медицинаялъулаб кумек гьабиялъул даража борхизаби, дарабаздалъун хьезари лъик1лъизаби, церет1урал технологиял х1алт1изари, врачасухъе халгьабиялде ин электроннияб къаг1идаялда хъвай-хъваг1ай гьабун ва гьединго унтарасе электронияб история ц1еялде г1унт1унгицин. Абуна Васильевас республикаялда исана 11 сахлъи ц1униялъул учреждение базе бугиланги. Росдал маг1ишаталъул к1вар бич1ч1изабулаго ва агропромышленнияб комплекс цебет1езабизе ккеялде к1вар кьолаго, В. Васильевас к1вар кьуна овощал, пихъал ц1унулел бак1ал раялде, рекьулел ракьазда лъалъадиялъул х1алт1и цебет1езабизе ккеялде.

Лъай кьеялъул бицунаго В. Васильевас к1вар кьуна лъималазул ясли-ахазда ирга щоларого бук1унеб зах1малъи лъуг1изабизелъун школалда цересел учреждениял разе ккеялде. Гьеб мурадалда, Федералияб централдаса республикаялде 4 млрд гъурущ бач1ун бугила. В. Васильевас бицана «нусго школа» проект х1алт1изабиялдалъун республикаялда г1езаг1ан цебет1ей лъугьун бук1аниги, гьелда г1ей гьабун ч1езе бегьунгут1иялъул. Гьаб соналда республикаялда базе буго 11азарго чиясе бак1 бугеб 33 школа. Гьеб мурадалда Дагъистаналъе биччан буго 3,9 млрд гъурущ.

Щибаб школалда ц1алдохъаби 100 проценталъ хьезарун руго учебниказдалъун. Лъик1лъун буго гьел школалде раччизе автобусал ч1езариялъул х1алт1иги.

Г1агараб заманалда гьеб х1алт1иги т1убанго раг1алде бахъинабизе буго. Г1аммаб къаг1идаялъ босани, жамг1ияталъул т1алабал т1уразариялде к1вар буссараб бук1ана ДРялъул Бет1ерасул хит1аб.