Амма вриояс чIорогоял рагIабазда гIей гьабичIо – февралалъул байбихьи лъугьана, хIакъикъаталдаги,Дагъистаналъул пачалихъи-яб кверщалида «революция» бахъинабураблъун ва гIемерал соназ тамахаб бакIида хIалхьиялда кIусун рукIаразе «ушли» гьабураблъун. Дагъистаналъул ХIукуматалъул Председательлъун ГIабдулатIиповас тIамуна Сергохъала районалдаса 50 сон барав Мухтар Меджидов. Цебеккун гьес тIуразарулел рукIана ДРялъул ХIукуматалъул Председателасул замасул ишал. Гьесул тIоцевесев заместительлъун вачана цебе туризмалъул а г е н т с т в о я л ъ у л нухмалъулевлъун вукIарав Анатолий Карибов.Цойгидал заместителазул ишал тIад къана: Москваялда гьавурав, гIурав, цIаларав Юрий Липатовасда, Кули районалдаса Юсуп МухIамадовасда, Карабудагъкент районалда МухIамадхIусен Насрутдиновасда, «МахIачхъалаялъул ралъдал порталъул нухмалъулевлъун вукIарав Абусупьян Хархаровасда, Москваялдаса Александр Ермошкинида. ДРялъул президентасул хIукуматалъул администрациялъул нухмалъулесул ишал тIуралевлъун тIамуна Дагъистаналъул педагогикияб университеталъул ректорлъун вукIарав ШагьгIабас Шагьов. (ЧIарада) Дагъистаналъе аслияблъун кколеб росдал магIишаталъул министрлъун тасдикъ гьавуна Казбек районалдаса Башир Байтемиров. Гьевги гьанжелъизегIан хIалтIулев вукIана рехсараб министерствалъул нухмалъулесул заместительлъун. Республикаялъул экономикаялъул министрлъун тIамуна 20I0 саналдаса нахъе президентасул контролалъулгун финансазулаб управлениялъе нухмалъи гьабурав, РФялъул ва ДРялъул мустахIикъав экономист Раюдин Юсуфов. (Хив район) Сахлъи цIуниялъул министерствоялдаги ккана хиса-баси. ЦIияв министр ккола медицинаялъул гIелмабазул доктор, профессор, «РФялъул мустахIикъав врач» Танка Ибрагьимов. (Шамил районалъул ТIидиса) ДРялъул пачалихъияй секретарьлъун йикIарай Такибат МахIмудова тIамуна Дагъистаналъул захIматалъул ва социалияб цебетIеялъул министрлъун. (Агул) Ралел бакIазул ва ЖКХялъул цIияв нухмалъулевлъун тасдикъ гьавуна Курах районалдаса Сайфулагь ГIисакъов. 2007 соналдаса нахъе ДРялъул ХIукуматалъул нухмалъулесул заместительлъун хIалтIулев вукIарав Ризван ГъазимухIамадов тIамун вуго республикаялъул энергетикаялъул ва промышленносталъул министрлъун. Ризван ГъазимухIамадов ккола ГIахьвахъ районалъул ГIарчо росулъа. ДРялъул экологиялъул ва тIабигIиял сурсатазул министрлъун тIамуна цевеккун ДРялъул президентасул ва ХIукуматалъул администрациялъул нухмалъулевлъун хIалтIулев вукIарав ХIасан Идрисов(Хасавюрт).Транспорталъул министрасул ишал тIуразарулевлъун вихьизавуна Ширухан ХIажимурадов, миллияб политикаялъул – цебеккун ДРялъул Президентасул советчиклъун вукIарав Алексей ХIасанов. Цебеги печаталъул ва массовиял коммуникациязул комитеталъул нухмалъулевлъун вукIарав Карабудахкенталдаса ГIумаргIусман ХIажиев тIамуна гьанже печаталъул ва информациялъул министерствоялъул нухмалъулевлъун. Жидеего ругьунал министрабазул портфель кодоса инчIеллъун хутIана: финансазул министр ГIабдусамад ХIамидов, культураялъул министр Зумруд Сулейманова, лъай кьеялъул министр МухIамадфазил ГIазизов, спорталъул министр МухIамад МухIамадов, юстициялъул министр Азади Рагимов. БатIи-батIиял комитетазул ва жавабиял ишазул тIалъиялдаги ккана хиса-басиял. ХъатIана гьеб цо нилъер районалдаги. Гьедин, Дагъистаналъул туризмалъулкомитеталъул нухмалъулевлъун тIамуна МухIамад ГIисаев. Нилъецаги ракI-ракIалъ баркизинха МухIамадида гьеб жавабияб хъулухъ ва гьаризин гьесие гьабулеб дандебилълъинги, дагъистаниязе гьесдасанги,хъулухъалдасан гьесиеги баракат бахинги. Халкъияб собраниялъул нухмалъулевлъун тIамуна гIезегIан Дагъистаналда хIалтIул хIалбихьи бугев, жавабчилъи цIикIкIарав Хизри ШихсагIидовги. РакIалде ккола цIияв президентасул тIалабал тIуразариялда ва божилъи ритIухъ гьабиялда тIад свак лъачIого хIалтIилин гьанже хIакимзабиян. ТIад лъурал канахIухьдуллъун тIамурал чагIи чIанани, узухъда, президентасул хIалтIул гьоко цебехун гириларо. ГIадатал гIадамазул ракIазулъ кIудияб божилъи, кунчIун бихьана дида гьаб ахирисеб моцIалда жаниб. Биччанте, гIунгутIабазул цIураб республикаялда цIияв президентасул ва гьесул командаялъул хIаракаталдалъун цо къадаралъулгIаги хIалтIи лъугьине ва мискинхалкъ бицалъ ругел гурел, хIакъикъиял ишаздаса рохизе. Амин. Ф. МУХIАМАДОВА.
|