17 августалда райадминистрациялда тlобитlана школазул директорзабазулгун данделъи. Гьелда гlахьаллъи гьабуна районалъул бетlер Нурмухlамад Задиевас ва лъай кьеялъул отделалъул начальник Патlимат Хlамзатовалъ.

Данделъиялда рорхарал аслиял суалаздасан рукlана цlияб цlалул соналда районалъул школазул цlали анкьил щуго къоялде бачунеб букlин, ай гьанжеялдаса нахъе шамат къоги гlодобкъолъун букlине буго. Гьединаб къагlида гьабулеб бугин республикаялъул Лъай кьеялъулгун гlелмуялъул министерствоялъул бихьизабиялда рекъонилан абуна районалъул бетlерас. Гьеб цохlо нилъер гьаниб гьабулеб жо гурин, цогидал районаздаги цlали гьединабго къагlидаялде бачунеб бугилан тlадеги жубана гьес. Узухъда, цlияб къагlидаялда рекъон хиса-басиял гьаризе кколел руго школазул уставазда ва цlалулал планазда.

Цоги данделъиялда борхана тlаде щолеб бугеб Расул Хlамзатовасул юбилеялде хlадурлъиялъул суалги. “Нилъеда лъазе ккола Расул Хlамзатов цохlо Гlарани школалъул гуревлъи. Гьединлъидал шагlирасул юбилеялде хlадурлъи гьабизе ккола киналго школазда. Киналго школазда рукlине ккола поэтасул хlакъалъулъ стендал. Юбилеялда гlахьаллъи гьабизе ккола тlолабго районалъ”, - ян абуна районалъул нухмалъулес.
Ахиралда директорзабаз кьуна жидерго суалалги.
И. Мухlамадов.