 .Шамсудинова Пат1имат Х1амзатовна гьаюна ва г1уна Хунзахъ районалъул Буц1ра росулъ, учитель, К1удияб Ват1анияб рагъул г1ахьалчи Шамсудинов Х1амзат Палиевичасул хъизаналда. Жиндир мунагьал чураяв Пат1иматил эмен Х1амзат Палиевичас жигараб г1ахьаллъи гьабуна К1удияб Ват1анияб рагъда, гьеб байбихьаралдаса ахиралде щвезег1ан, ва бергьенлъиги босун каранда шапакъаталгун, Ват1аналде т1ад вуссана, ва х1алт1улев вук1ана учительлъун. (Хвана 2000 соналъ).1977 соналъ Пат1иматица т1ок1лъиялда лъугӀизабуна Буц1ра росдал гьоркьохъеб школа. Ц1ализе лъик1ай йик1иналъ гьелъие школалда кьун рук1ана гӀемерал реццалъул т1амчал (похвальные листы) ва х1урматиял грамотаби, ва гьей цониги экзаменги кьеч1ого ц1ализе йосула Дагъистаналъул медицинаялъул училищеялде, ва 1980 соналъ багӀараб дипломалда Пат1иматица лъугӀизабуна Дагъистаналъул медицинаялъул училище ва гьебго соналъ биологиялъул цо экзамен щуйилаб къиматалдаги кьун, ц1ализе лъугьуна Дагъистаналъул медицинаялъул институталъул сах гьариялъулгун профилактикияб факультеталде.Институтги гьелъ лъик1ал къиматаздалъун лъугӀизабуна, ва Ӏ986 соналъ Гъизилюрт шагьаралъул централияб больницаялда лъугӀизабуна терапиялъул интернатура.Ӏ987 соналдаса нахъе гьей х1алт1улей йиго Гъизилюрталъул ЦГБ-ялъул поликлиникаялда участкаялъул врач-терапевтлъун, гьелдаго цадахъ Пат1иматица больницаялъултерапиялъул отделениялда дежурствабиги гьарула. Пат1имат йиго хӀалбихьи бугей врач-терапевт. Гьей ккола лъайги бугей, жиндирго т1адал ишалги, хӀалтӀиги лъалей специалист. Пат1имат жиндирго лъай борхиялда т1ад щибаб къойил хӀалтӀула, ц1алула медицинаялъул литература. Чанго нухалъ гьей ун йик1ана МахӀачхъалаялде лъай борхизабиялъул курсаздеги. Гьелъул х1урмат гьабула унтараз, аск1ор хӀалтӀулез, шагьаралъул гӀадамаца.Пат1имат хӀалтӀулей кабинеталъул кӀалтӀа букӀуна унтаразул халатаб очередь. БичӀчӀулареб жо ц1ехезеги гьелде аскӀоре рачӀуна цо-цо аск1ор хӀалтӀулел хIалтIухъабиги. Гъизилюрт шагьаралда буго Ӏ5 терапевтическияб участок, ва гьезда гьоркьоб бищун лъик!азул цояблъун ккола ПатӀимат х!алт!улеб Ӏ0 абилеб
участок. ГьабсагӀат бищунго захӀматал медицинаялъул хӀалтӀабазда гьоркьобе ккола участкаялъул терапевтасул х1алт1и, чӀей гьечӀого гӀемераб хӀалтӀиги гьабизе кколеб, жавабчилъиги ц1ик1к1араб, хъвазе кколеб жоги гӀемераб.
2001 соналъ Пат1иматие кьуна тӀоцебесеб категориялъул врачасул цӀар. Дагьал церегӀан къояз ПатӀиматица Гъизилюрт шагьаралъул бакӀалъулаб телевидениялдасанбалагьаразулгун гара-чӀвари гьабуна, гьанже Россиялдаяли щай гурин, тӀолабго дунялалдаго гӀемерлъун бугеб бидул тӀаде цуй (гипертоническая болезнь, ее осложнения и меры профилактики) темаялда тӀасан. ПатӀиматица гӀадамазда бичӀчӀулеб къагӀидаялда, медицинаялъул терминалги хӀалтӀизаричӀого, батӀи-батӀиял мисалалги рачун, тӀадегӀанаб даражаял-да, гьоркьо-гьоркьоб гьеб унтиялъ унтарал поликлиникаялде рачӀарал ва больницаялъул кардио-логическияб отделениялда дару гьабизе регун ругел унтаралги рихьизарун, ва гьезулгун букӀараб гара-чӀвариги босун бихьизабулеб букӀана гьеб передача. Балагьаразе кӀудияб асар гьабуна ПатӀиматица телевидениялдасан бицараб гьеб кӀвар цӀикӀкӀараб темаялъ. Гьеб передача чанго къояз телевидениялдасан такрар гьабуна. ГьебпередачаялдасангибичӀчӀулеб букӀана, ПатӀиматилъ бугеб гъваридаб лъайги,
жиндирго хӀалтӀи бокьулей специалист йикӀинги. Гьеб передачаялдаса хадуб ПатӀимат Шамсудиновалъе тӀадегӀанаб къимат кьуна-гьелъухъ балагьаразги, аскӀор хӀалтӀулезги, ЦГБ-ялъул нухмалъулезги, унтаразги ва гьел гурел цойгидазги.
Жийго ПатӀимат йиго гӀадатияй, чӀухӀи-къули гьечӀей, гӀадан хирияй, ва гӀадамазда гъорлъ йосарай, рагьараб ракӀалъул, намус-яхӀ бугей, бокьараб мехалъ кьураб суалалъе чӀван къотӀараб жавабги кьолей, ккараб бакӀалда битӀараб рагӀиги абизе лъалей унго-унгояй магӀарулай. ПатӀиматица россгун цадахъ лъикӀаб тарбияги кьун гӀезарулел руго кӀиго лъимал. ПатӀиматил нухдасан ине байбихьана гьелъул яс Хадижатицаги. Гьей ккола ДГМА-ялъул студентка. Гьарула ПатӀиматие нахъеги лъикӀаб сахлъиги, роххелги, халатаб гӀумруги, хӀалтӀулъ бергьенлъабиги!
ТӀАЛХӀАТ АХЪБЕРДИЕВ, Кизилюрт шагьар.
|
