Дица халалъи гуро борцунеб бугеб

Дов нилъеда киназдаго лъалев халалъизе х1еккинабун ч1алу ц1арас борцунеб бук1ун буго нилъеда киназдаго лъалеб ч1алу. Ч1алу борцунеб бук1ун буго, къедаги базабун, маххул рулеткаги реххун. Чанц1улго реханиги пайда кколеб бук1инч1ила: рулетка, ч1алул к1алалда хъван бахъиналдего, бортун бач1унеб бук1анила. Кинабалиго къвариг1елалъ мадугьалихъ росулъе щварав Лъаг1илухъе балагьизавун, ц1улал г1арада кьвагьаразул нахъе хут1аразул цоясда бихьанила г1акъубаялда вугев мадугьал ва гьикъанила:

-Ассаламу г1алайкум, дуца гьабулеб щиб?-абун.

-Бихьуларогойищ бугеб? Ч1алу борцунев вуго.

-Дуего бигьаго бук1ине, бегизабун щайха борцунареб?

-Вай ах1макъ, дица халалъи гуреб, борхалъи борцунеб бук1ин бихьуларогойищ бугеб?-ян жаваб кьунила ч1алул бет1ергьанас.

Цо т1охда к1иго бат1ияб климат.

Ц1акъ бух1араб рииги бук1ун, к1удияб хъизамалъул чаг1аз х1укму гьабунила ахикь бугеб гьит1инабго рукъалъул т1охда кьижизе. Гьедин гьабизеги гьабунила. Баг1ариялъищ, ялъуни т1ут1 к1к1араялъищали макьидаса йорч1изаюрай васасул эбелалда рихьанила гъоркьан-т1асан къвалалги ран, цоцалъ хурхун кьижун ругел жиндирго васги васасул лъадиги. Нус рихарай якьадалда гьеб х1ехьезе к1веч1ила, ях1 гьабизе к1веч1ого, ццидалъ ах1дезе жуянила.

-Гьаб гьалулеб сордоялъ, гьадин цоцалъ хурхун регизе бегьулеб жойищ, цодагьаб гьогьен рехизег1анг1аги ях1 гьабизейищ бегьулареб? Унти ккезабизехъин буго дуца дир цох1о вугев васасда,-ян нусалда г1айиб гьабунила. Т1огьил цогидаб рахъалда регун рук1анила хирияй ясги вокьулев дурцги. К1иго рокьониги гьоркьоб тун, цоцада хъвач1ого, ясги дурцги кьижун рук1ин расги рек1ее г1еч1ила. Аск1оеги яч1ун, х1еренго абунила:

-Дир хириял лъимал, гьадинаб квачараб сордоялъ цоцаздасан хинлъизе, ран къвалалги, цоцалъ хурхун регизе ккеларищ? Квачан унтизе бегьула нуж.

Гьеб раг1арай нусалъ т1адеги яхъун, ах1ун абунила:

-Огь Аллагь, дур х1алк1олъиха! Цо т1охда к1иго бат1ияб климат! Гьаб рахъалда-х1ехьезе к1олареб бух1и, доб рахъалда-гьединабго квач!