2 августалда райадминистрациялда тlобитlана бегавулзабазул данделъи. Гьеб нухда бачана районалъул бетlерасул заместитель Асадгlали Гlабдуразакъовас. Данделъиялда аслияб къагlидаялъ гьоркьор лъун рукlана налогал ракlариялда ва тlаде щолеб бугеб Расул Хlамзатовасул 100 сонилаб юбилеялде хlадурлъиялда хурхарал суалал. 

Налогал ракlариялъул бицунаго, Асадгlали Гlабдуразакъовас абуна кидагогlадин, гьеб иш лъагlалил ахиралде щвезегlан хадуб бехъерхъун течlого, гьанжего гьелъие хlалтlи гьабизе кколилан. Гьелда хурхун гlемерал суалал ругоан бегавулзабазул. Гьезул гlемерисел рази гьечlоан Налогазулаб хъулухъалъул хlалтlудасан. Налогал кьезе кколеблъи берцинго гlадамазда бичlчlизабун гурони, хlал гьабун гьезухъа налогал рахъи жидеда тlадаб иш гурин, гьеб бугин Налогазулаб хъулахъалъул ва судалъулал приставаз гьабизе кколеб хlалтlийилан абуна бегавулзабаз. 

Узухъда, данделъиялда аслияб суаллъун букlана Расул Хlамзатовасул юбилеялде хlадурлъиялда хурхун унеб бугеб хlалтlул бицин.
“Нилъ киназдаго тlадаб буго кlудияв шагlираcул тlадегlанаб даражаялда тlобитlизе. Гьелъие хутlун буго цохlо моцl. Гьединлъидал нилъее тlатlала квералги лъун рукlине заман гьечlо. Гьеб заманалда жаниб сордо-къо гьечlого хlалтlизе ккола киналго. Нужеца, бегавулзабаз нужерго росабазул щибав чиясда лъазабизе ккола 20 августалде щвелалде жиндирго минаялъул къватlисеб рахъ ва гьелда сверухълъи къачlан, бакlа-бахариги гьабун, берцинаб сипаталде бачине кколеблъи ва нужер щибаб къойил бербалагьиялда гъоркь букlине ккола гьеб хlалтlи. Хlалтlул цогидал рахъалги кlочон тезе бегьуларо. Нуж руго власталъул бищунго халкъалде гlагардегlан ругел вакилзаби. Гьединлъидал гlадатияв чи бищун цебе къваригlелалъ нужехъе вортула. Гьедин къваригlел тlубаян вачlарасул мурад тlубазеги хlаракат бахъизе ккола. Кватlичlого рагlалде щвела нилъер генпланазда хурхун гьарулел хlалтlабиги. Гьебмехалда нужее рес щвела законалда рекъон нужерго ракьал хlалтlизаризе ва гьездаса пайда босизе”, - ян абуна муниципалитеталъул бетlерасул заместителас.  

И. Мухlамадов.