К1удияб жамаг1ат бугеб росдал бет1ерлъи гьабизе расги
бигьаяб иш гуро. Гьеб жеги зах1малъула дуца бет1ерлъи гьабулеб администрациялде
гьоркьобе цо чанго росу унеб бугони. Гьаниб х1исабалде росизе ккола щивасул х1ажалъабиги,
т1алабалги, т1адкъаялги. Г1адатал г1адамаз жидерго божилъиги загьир гьабун
вищарасда т1алъула жиндирго х1алт1улаб болжалалъ г1адамазул г1умру-яшав цо
къадаралъниги лъик1лъизабизе.Гьеб рахъалъ жиндасан бач1арабщинаб х1алт1и гьабулев чи вуго
Хунзахъ росдал администрациялъул бет1ер Т1алх1атов Хизри Гьит1инамух1амадович.
2007 соналъ вищараб къоялдаса нахъе Хизри вихьизе бегьула цойгидал бегавулзаби
аск1орецин къаларел г1адал бак1азда: нухал къач1алев, гьел г1азудаса рац1ц1ад
гьарулевги, трансформаторал рух1арал-хисулевги, лъел г1унгут1аби ккаралъув-гьел
т1аг1инарулевги…-кивго! Кинабго жиндирго бералда бихьун гьабизе бокьулеб,
унго-унгояв г1уц1арухъанасда ва нухмалъулесда рекъараб хасият буго нижер
бегавуласул. Хизри вуго г1адатаб халкъалъул рук1а-рахъинги, яшавги бич1ч1арав,
жинцагоги г1адатав х1алт1ухъанасдасан ишалъулаб нух байбихьарав чи. Лъала ва
бич1ч1ула гьесда хур-хер г1езабиялъул, боц1и-панз хьихьиялъул къо бихьулеб
зах1матги-Г1амикь рехун тарал ракьазул 9 гектар бахъинабулеб 4 хъизамалда гьоркьовги
к1вах1-свак лъач1ого х1алт1ана гьев. Ч1ух1ич1ого гьабуна росдал магъил
хъаравуллъиги. Къокъго абуни, Хизри живго вуго г1адатаб халкъалда гьоркьоса,
ч1ух1а-къули гьеч1ев, бокьарав чи жинда аск1ове вач1ани, гьесул мурадалъухъ
к1вар кьун г1енеккулев чи. Рищиязда цере избирателазухъе рач1ун гурони, нухда
данде ккараб мехалъцин салам кьун, х1ал-х1укму ц1ехоларездаса, гьайгьай, гьесул
г1адатлъиялъул т1ок1лъиги буго. Лъик1аб бук1ина 4 декабралъ т1орит1изесел
Хунзахъ росдал администрациялъул бет1ер вищулел рищиязда цебе, щивав
избирателас хас гьабун жиндиего гьабураб ва гьабич1еб х1алт1ул бицинч1ого
росдал, ай г1аммаб пайдаялъе гьабураб х1алт1ул рехсолебани ва рак1алде
щолебани. Гьединал х1алт1абийин абуни, хунздерил бегавуласул х1алт1улаб
болжалалда дагьал гьеч1о: чан соналъ къеркьаниги к1ун бук1инч1о хунз
бет1ергьанаб, Г1арани росдал ракь ва гьелдасан рач1унел ц1ик1к1араб къадар
налогазул (6млн.гъ) х1акъикъиял бет1ергьабазе пайдаялъе х1алт1изабизелъун,
Хунзахъ администрациялде буссинабизе. Хизрица гьеб ишалъе к1удияб х1аракат
бахъана ва иш раг1алде бахъинабуна. Ц1ик1к1араб х1алт1и гьабуна райцентралда ва
г1исинал росабалъ гьекъолеб лъим бук1инабиялъе, администрациялъул харжаздалъун
хисана анц1гоялде г1агарун трансформатор (гьеб гьезда т1адаб иш гьеч1ониги),
гьабуна райцентралъул ва росабазул къват1ахъ канлъи, 70 мусор бак1арулеб
контейнер лъун, арендаялъе мусоровоз босун ч1езабулеб буго рац1ц1а-ракъалъи.
Г1и-боц1уе г1ухьби щвеч1олъи, магъил г1адлу биххи г1адал х1ужжабиги ккеч1о
Т1алх1атовас бегавуллъи гьабулеб заманалда жаниб. Хизрица кидагосеб спонсорлъи
бук1инабула администрациялда гьоркьоре унел росабалъ т1орит1улел спортивиял
къецазе, исламиял мажлисазе (мисалалъе босани, киназего бокьулеб «нашидазул
сордо» г1адаб тадбир гьаниб т1обит1иялъе), нахъе къан ч1оларо субботникал
т1орит1улелъул-гьанивги бегавул вук1уна цебесеб кьерда. Палх1асил, Т1алх1атов
Хизрица, росдал бегавуллъун вук1ун гьабунщинаб х1алт1ул бицине г1еларо т1убараб
газета. Г1иси-бикъиналги, росдае ва г1адамазе г1езег1ан к1вар бугел ва гьанжелъаг1ан
т1убач1ого рук1арал ч1ах1иялги гьел руго ц1акъго г1емер. (Гьелъул цебе-цебе
нилъерго «Росдал зах1матчиялда» хъванги бук1ана). Амма ункъго сон ц1акъ дагьаб
болжал буго рак1алда бугебщинаб х1алт1и гьабизе ва щивав чиясул мурад т1убазе.
Божула Хизрица гьабизесеб х1алт1и жеги цебе бук1иналда. Щаян гьикъани,
т1оцебесеб иргаялда, гьев вуго х1алт1уда гъорлъе ккарав чи, гьесда лъала щибаб
росдалги, жамаг1аталъулги х1ал-х1укму, х1ажалъаби. Гьединлъидал, ц1ияв вищарав
гъорлъе ккун вахъинег1ан, х1алт1уда вук1арас иш цебехун бачуна. Хьул буго
бич1ч1и бугел избирателаз, к1иабилеб нухалъги х1алт1ун бажарунеблъиги сундаго
гьоркьов живго цебесеб кьерда вук1ун жигарчилъи бихьизабурасулги рахъ
кквелилан. Дуца бет1ерлъи гьабулеб бугеб росдал администрациялъул г1адамаз
рак1-рак1алъулаб баркала кьолеб буго, Хизри, дуе дуца гьабураб х1алт1ухъ.
Аллагьги разилъаги дудаса нижг1ан, гьеб зах1матаб х1алт1уда бихьанщинаб къоги
кирилъун хъваги, сахаватав инсан, дуе!
Хунзахъ росдал жамаг1ат.
|
