Х1урматиял «Росдал зах1матчи» газеталъул х1алт1ухъаби!
Хъвалеб буго нужехъе Г1орот1а росулъа Мух1амадов Х1айбулаца. Районалъул
газеталда г1емер горахъула унго-унголъунги жиделъ иман-иях1ги бугел, сахаватал
районцоязул х1акъалъулъ гьездасан кумек щвараз баркала кьурал кагътал,
макъалаби. Гьединабго маг1наялъул хъвалеб буго жакъа нужехъе дицаги ва бокьун
буго райгазета гьоркьоб ккун гьал хадур рехсолел сахал г1адамазе баркала кьезе
ва т1аде щвараб бусурбабазул 1433 ва 2012 ц1иял соналги баркун, ракьалда
лъик1абщинаб гьаризе.
Дирго чорхол сахлъи гьеч1олъиялдалъун дун г1емерго ккола
нижерго Харахьи участкаялъулаб ва Хунзахъ районалъулаб больницабазде. Гьале,
араб риидалги зах1матго унтун дун ккана больницаялде. Бит1ахъего абуни
рух1даллъизе бач1ана Харахьи участкаялъулаб больницаялъул бет1ерав тохтур
Хъайтмазов Мух1амадил х1алт1улаб бажариялда, гьес нухмалъи гьабулеб
больницаялда бугеб рац1а-ракъалъиялда, г1адлу-низамалда. Щивасда лъалеб бугоан
жиде-жидер х1алт1и, унтараздехун бук1ине кколеб бербалагьи. Киналго херехьдерил
медх1алт1ухъабазе ва хас гьабун главврач Мух1амадие, тохтур Бейбулатов Мух1амадие
рак1-рак1алъулаб баркалаги кьолаго, гьарула щулияб сахлъиялда, парахатаб г1умруялда
жеги таманал саназ гьел хут1изе.
Гьединго Аллагь разилъаги доб мехалъ Хунзахъ
райбольницаялъул бет1ерав тохтур Хъайтмазов Х1ажимурадидаса, терапиялъул
отделениялъул заведующая Мусаева Зулейхадаса ва т1олалго гьеб отделениялъул
х1алт1ухъабаздаса. Нужедаса унтаралг1ан Аллагьги разилъаги нужедаса! Х1алт1улъ
жеги ч1ах1иял бергьенлъабиги, талих1-рохелги нужер щивасе.
Таги нуж бах1арго нусго баниги,
Нижер, унтаразул т1алаб гьабизе,
Т1олго г1умруялъго гвангъаги талих1
Сверухъ ругелазе сахлъи бикьизе!
Мух1амадов Х1айбула, Г1орот1а росу.
| 
