Х1урматияб редакция!
Т1оцебесеб иргаялда дие бокьун буго нужеда баркизе кват1ун
бугониги бусурбабазул 1433 сон ва т1аде щолеб бугеб 2012 аб ц1ияб сон. Гьаризе
нужее кинабго лъик1абщинаб.
Дун йиго ункъойилъе яхуней йигей херай г1адан. Республикаялде
рач1арал Сулейман Керимовасул х1ежалт1е ч1обого г1адамал рит1изе путевкаби Сивухъ
росулъеги 1 бач1ун бук1ана. Гьеб путевка росда гьоркьоб можороги рехич1ого,
росдал г1адамал разилъун дие кьуна. Дир г1умруялъ анищлъун бук1араб, амма
херлъиялъ ва унтиялъ щолеб бук1инч1еб, х1еж дие насиблъана. Дир рохалие г1орхъи
бук1инч1о. Рохалида цадахъго к1удияб ургъелги бук1ана, дун ячун вилъине рокъоса
чиясул санаг1ат гьеч1елъул херай дида х1еж борхизе к1веларилан.
Кин бук1аниги дица хирияб ракьалде сапар бухьана. Дир
ургъелги г1ададасеб батана. Дида цадахъ ккана иманги бугел, маг1арул
намус-ях1ги бугел гьалмагъзаби. Дун гьез жидерго эбел г1адин ячана киса-киего
квер ккун ва дица х1ежги борхана, къабул гьабун батайги. Дие бокьун буго газета
гьоркьоб ккун гьал лъик1ал г1адамазе баркала кьезе ва гьездаса дунг1ан ва дир
лъимал-хъизанг1ан Аллагьги разилъайгиян гьаризе. Т1оцебесеб иргаялда дида
божилъиги гьабун ц1ар ч1ван дун хирияб ракьалде нухда рег1арал Сахъадерил
росдал жамаг1аталъе.
К1иабизе, киса-кибго дир милат гьабураб районалъул имам
Жамал-Х1ажие ва гьалмагъзабазе:
Шотот1аса Мух1амад-Х1ажие, Гьац1алухъа Мух1амадг1алил
Пат1иматие, Харахьиса Х1алиматие, Хъих1ик1к1алахъа Пат1иматие, Байкьа
Хадижатие, Бакьагьеч1иса Мах1ачил Пат1иматие, Гьоц1алъа ва Мущулиса
г1олохъабазе (ц1арал рак1алде рач1унел гьеч1о,
Т1аса лъугьа херай ч1ужуялдаса). Гьал дир гьалмагъзабазул
х1ежги къабул гьабун батайги,
дунг1ан Аллагьги разилъайги, т1асияб соналъги х1ежалде ах1ун
ратайги.
Дирго кагъат лъуг1изабулеб буго Къурбанг1али Патах1овасул
коч1одалъун:
Ц1об г1ат1идав бет1ергьан,
Гьабе х1еж къабулаблъун
Къойил цадахъ рук1арал
Нижер киназулгоги.
Х1ежалдеги-нахъеги
Къо г1емераб бихьула,
Лъик1аб гьалмагълъи ккани
Гьебги бигьалъун уна.
Араб-хваралъул хабар
Халат гьабун щибилеб,
Щулияб сахлъиги кьун
Рохун тайги киналго.
Х1айбулаева Пат1имат Сивухъ росу.
| 
