 Г1емер больницабазде ккаразда лъала, рук1уна
кидадай палатаялъуре рач1инаян унтарал жидехъ балагьун ч1арал,
рохел-аваданлъигун, х1еренаб, х1алимаб раг1игун гьезухъе рач1унел тохтурзаби.
Гьединай дие йик1ана Бакьагьеч1иса милосердная сестра
Абакарова Сиядат. «Милосердная» раг1ул маг1на-цогиясул унти, г1азаб жиндирго
г1адин къабул гьабун, гьесие кумек гьабизе бажарилъун бич1ч1ула дида. Лъаларо
гьединаб к1удияб гьунар Сиядатилъ бугищали, амма жиндирго х1алт1и гьелъие
бокьулеблъиялда ва унтарасе х1еренаб, х1алимаб раг1и бицун бажарулеб бук1иналда
дир рак1ч1ана.
Ургъун, бокьун т1аса бищанин жинца тохтурлъиян бицана дида
Сиядатица. Ясик1абазул «ругъназда» катан къалей, дару бахуней, къандалъабазда
уколал гьарулей йик1унаанин жийилан бицана Сиядатица. Бицинч1ониги бихьулеб
бук1ана медсестраялъе жиндирго иш бокьулеб бук1ин, гьей къисматалъ жиндирго
бак1алде ячун йик1ин.
Т1адег1анаб лъай босун врачлъун яхъине рак1алда гьеч1ищан
гьикъидал, мединституталде ц1ализе лъугьине ресги гьеч1ила, унтарав инсул
т1алаб гьабизеги кколила жинцаян, г1ажаибаб жаваб кьуна Сиядатица дие.
(Г1емерищ гьанже дандч1валел эбел-инсуда цебе жидерго налъи к1оченч1ел ясалги
хасго васалги). Врачасулалдаса жиндир х1алт1и г1емер интересаб бугила. Врачас
диагноз лъолила, назначениял гьарулила. Сестраялъ дару гьабулила, унтарав сах
гьавулила. Врачасул бугила хъвай-хъваг1ай г1емераб х1алт1и. Жиндие хъвадаризе
гуреб, дару гьабизе бокьулила. Жиндие бокьулила капельницаби лъезе, уколал
гьаризе, ругънада катан къазе. Жиндие рохел бугила зах1матго унтарасул
къоялдаса къоялде мадар лъугьунеб бихьи, унтарав сахлъи.
Би бихьизе х1инкъуларищ, ругънаде ялагьизе бокьуларого
йик1инарищан абураб суалалъе Сиядатица жаваб кьуна жиндие гьединаб зах1малъи
т1оцебесеб курсалдацин бук1инч1илан.
Медсестралъун х1алт1изе г1ураб лъайги х1албихьиги бук1анищ
дур хирургиялъул отделениялде х1алт1изе яч1удасаян суалги кьуна дица Сиядатие. Ц1ияв
директор Буйнакскиялъул медучилищеялде вач1индал «лъай г1арцухъ бичун босиялъе»
ахир лъунила. Студентасдасаги г1арац гуреб, лъай т1алаб гьабизе лъугьанила.
Училищеялъ лъик1аб лъайги кьолила, практикияб х1алт1уе х1албихьиги щолила.
Лъалареб жинда малъулила отделениялъул заведующий Ах1мад Х1усеновичас ва г1емер
соназулаб х1албихьи бугел гьалмагъзабаз.
Процедурная сестра Абакарова Сиядатил х1алт1и релълъун
бихьана горида жаниб т1амураб, минуталъ рах1ат лъалареб гвангваялда. Сиядатил
х1алт1ул багьа пачалихъалъ бащад гьабун буго 4000 гъурщида. Ц1вакараб столалда
нахъа г1одовги ч1ун, бак1 хинлъизабулев вугев чиновникасул «зах1маталъул» багьа
гьабун буго 40000 гъурщидаса ц1ик1к1унги. Гьединаб буго нилъер «родной»
пачалихъалъул социалияб рит1ухълъиги г1адатав чиясул ургъел, т1алаб-агъазги.
Жийго Сиядатил талих1-рохел гъурщазулъ гуреб, рак1алъ ах1ун т1аса бищараб
махщалилъ бугин ккола. Г1умруялъулъги батаги гьей сахаватаб рак1алъул ясалда
талих1. Амма хъизан лъараб, лъимал лъараб мехалъ гъурущ х1ажалъич1ого бук1унаро.
Гьайгьай, х1ажалъила гьеб Сиядатиеги. Бокьилароан рит1ухълъи гьеч1олъиялъе
жакъасеб къоялъул цогидабги мекълъи-т1екълъиялъ бокьулеб х1алт1удаса рак1
буссинабизе.
Ахиралдаги. Отделениялъул Заведующий А. Мух1амадовас «Сиядат
молодец йиго»- ян къимат кьуна. Сиядатил х1алт1уе рак1-рак1алъулаб х1урматгун
жийго гьелъие баркалагун гьелъ дару гьабурав Г1. Г1исаев.
|
