28 марталда г1умруялъул 55 сонилаб юбилей к1одо гьабуна Гиннесил рекордазул т1ехьалъул чанц1улго рекордсмен нилъер районалъул гьит1инабго Г1амикь росулъа Г1умар Х1анапиевас. Лъидаха рак1алда гьеч1еб 2000 соналъ цабзаз 15 метралъ 576 тонна т1ад бугеб гама лъададасан гьес ц1араб куц? Гьединго ракъдадасан 260 тонна бак1лъиялъул тепловоз 152 метралъ долго «чармил» цаби-г1усаз бехъерхъи? 2001 соналъ ТУ-134 самолет 7 метралъ цабзаз ц1ай? Бигьаго рицатал маг1азул кьурун рак1ал гьари, бот1рода гьец1о гъури, г1усаз маххул рахсал т1ет1ей, арматура кьури, лъугьун руго спортсменасе щибаб къойилал г1адатал ишаллъун. 60 дунялго х1айран гьабураб рекорд ч1езабун буго ракьцояс гьанжелъаг1ан. Ва амма гьеб къадар нусиде г1агар гьабизе сахлъи таваккалги бугин жиндирилан рак1 ч1езабулеб буго Х1анапиевас.
Жиндирго гьавураб къо рекордсменас к1одо гьабуна г1агараб Ват1аналда. Юсуп Асх1абг1алиевас, Расул Г1умаровас, Х1амзалав Х1амзаловас ах1арал нашидазгун живго Г1умарил г1ажаибал церерахъиназ берцин гьабун бук1ана тадбир. Гьединго спортсменасул юбилеялъул х1урматалда Г1ахьалч1и т1обит1ана районалдаса команда г1ахьаллъараб футболалъул турнир. Гьенир финалалда дандч1вана Гьоц1алъ ва Хунзахъ-1 командаби. Гьоц1дерил футболистаз т1ок1лъи бихьизабуна ва Г1.Х1анапиевасул кубокалъе мустах1икълъана. Загьирлъана турниралда бищун лъик1ал х1алелги: «Приз зрительских симпатий» -Г1амирханов Мурад (Гьоц1алъ), «Лучший защитник» - Гайдалов Мух1амад (Гьоц1алъ), «Лучший нападающий» - Гъазияв Мух1амад (Хунзахъ), «Лучший вратарь» - Хизроев Абубакар (Хунзахъ). Г1адатлъун лъугьахъе, киналго лъик1ал тадбиразул церехъабилъун ва г1уц1арухъабилъун лъугьана «Хунзахъ» жамг1ияб г1уц1и. Районалдаги Мах1ачхъалаялдаги т1орит1улел юбилеялъул тадбиразда Х1анапиевасда аск1оса кьурич1о гьел росдал сахал патриотал.
Киназего интерес ц1ик1к1араб ва къуват бихьизабиялъул спорт бокьулел балагьун ч1араб бук1ана Авартеатралда юбилярас т1обит1изесеб гьавураб къоялъул тадбирги. Гьениб 61 абилеб нухалъги халкъ тамашалъизабизе нигат бук1ана Х1анайил Мух1умил вас Г1умарил. Дунялалъулго, Европаялъул чемпионал, Х1айдарбек Х1айдарбеков, Къурамух1амад Къурамух1амадов, Султ1ан Ибрагьимов, Мух1амад Маликов рач1ун ругоан Х1анапиевасда юбилей баркизе ва Сали-Сулейманил (къуват бихьизабиялъул рахъалъ машгьурав гугарухъан) орден гьесие кьезе. Республикаялъул спорталъул министерствалъ Х1анапиев вихьизавуна «Дагъистаналъул физкультураялъул мустах1икъав х1алт1ухъан» ц1аралъе, «Жамг1ияталъе пайдаялъе», «Х1урматалъул Г1аламаталъе». Районалъул гурел, Кизилюрталдаса, Буйнакскалдаса рик1к1ен г1емерал гьудулзабаз баркана спортсменасда гьеб къоялъ. Районцоязул рахъалдасан баркизе вахъарав районалъул нухмалъулев Нурмух1амад Задиевас жиндирго баркиялъулаб каламалда бихьизабуна Х1анапиевасдаса ч1ух1арал ва рохарал Хунз рук1инги, г1олеб г1елалъухъе жиндирго бажари-махщел гьес кьеялде хьул бук1инги. Районалъул бищун т1адег1анаб шапакъат «Х1урматияв гражданин» рекордсменасе нек1ого кьун бугелъулан, бицатаб конвертги бегьана районалъул бет1ерас юбилярасухъе.Ч1арадисезул хоралъ, авартеатралъул артистаз, цоял цояздаса машгьурал коч1охъабаз тадбир берцин гьабун бук1аниги, залалъур г1одор ч1аразе х1ажат бук1ана г1ажаибаб ва лъиданиги такрар гьабизе к1олареб – рекорд! Гьебги Х1анапиевас бигьаго ч1езабуна: мугъзада 400 кг т1ад бугеб гьакида г1одор ч1арал лъабгоялгун гьес цабзаз борхана рельса.
Барабг1ан т1адеги баги нилъер машгьурав ракьцояс спорталъул Олимпалда; ц1иял бергьенлъабигун, шапакъаталгун ва мустах1икъаб къиматгун!
Ф.Мух1амадова
|
