Гьале т1аде щвана сентябрь моц1-ц1идасанги лъаялъул к1алг1абазде нуц1биги рагьун ц1алдохъаби жиде-жидер классазда парахалъулеб заман. Киса-кибего улкаялдаго г1адин, районалъул школаздаги байбихьана ц1ияб ц1алул сон. Районалъул нухмалъулесул х1аракаталдалъун исана г1емерисел школазда гьабуна капиталияб ремонт, цо-цо росабалъин абуни ц1ияб соналъул т1оцебесеб дарсиде ц1алдохъаби анна ц1ирагьарал школазде. Капиталияб ремонталдаса хадуб Ч1ондокь, Байкь байбихьулал школал рагьулел, Бакьагьеч1и, Г1обода, Харахьи ц1алул сон байбихьиялъул рохалилал данделъабазда г1ахьаллъана живго Саг1ид Камилевичги. Щибаб росулъе рес рекъеч1ониги, «Росдал зах1матчи» газеталъул ва бак1алъулаб телевидениялъул вакилзабиги щвана цо-цо школазде гьеб къоялъ.

Хунзахъ т1оцебесеб школа

Т1угьдузул квац1абазги т1угьдулг1анги берцинго къач1арал ц1алдохъабазги гвангъизабун бук1ана Хунзахъ т1оцебесеб гьоркьохъеб школалъул азбар т1оцебесеб сентябралъ. Райцентралъул аслияб-Г1алиханов Махсут1ил ц1аралда бугеб къват1го ц1ун бук1ана гьенире къач1а-к1ат1ан рач1унел умумузги лъималазги. Абила, байрамалъего берцинлъи кьун бук1анин киналго ц1алдохъаби цо ккураб школалъул форма-рет1ел-хьитгун рук1иналъилан. Сверухълъиялдаго т1ибит1араб бакъан, киназего г1аммаб релъа-рохи, цоцазда баркиял. Азбаралъул цо рахъалдада берцинго рекъезабураб трибуналда нахъа г1одорч1ун школалъул дирекция, райадминистрациялъул вакиллъи, т1аде рач1арал гьалбал, умумул, лъаялъул къоялъул х1урматалда т1обит1улеб линейкаялда классал ккун кьерда ч1арал ц1алдохъаби.

Данделъаразда ц1алул сон байбихьиги баркун х1урматалъул линейка рагьараблъун лъазабуна ва лъуг1изег1ан гьеб бачана школалъул г1уц1арухъан Пат1имат Маламух1амадовалъ. Араб соналъул х1асилазул бицун, цереч1арал масъалаби рагьун, ц1алулъгун школалъул жамг1ияб г1умруялда жеги ч1ах1иял бергьенлъабазде, борхалъабазде муг1алимзабигун ц1алдохъаби ах1араб баркиялъулаб к1алъай гьабуна школалъул директор Атаев Расулица. 52 гьит1ичас т1амулеб бугила исана лъаялъул дунялалде т1оцебесеб галиян бихьизабуна директорас. Гьезие ц1алулъги г1умруялдаги цебет1ей, росдае, республикаялъе, улкаялъего пайдаял г1адамаллъун нуж рахъин бугила дир мурадилан абуна гьес. Умумузул рахъалъан лъимал ц1алуде к1вар кьезе, г1адлу-низамалда мисалияллъун рук1ине ах1арал насих1атал гьарун к1алъана Ах1мадов Халилбег ва Къадиев Шамил. Жиндирго, райадминистрациялъул, депутатазул собраниялъул рахъалдасан данделъаразда лъаялъул байрамги баркун, лъималазе насих1аталъулаб к1алъай гьабуна райадминистрациялъул бет1ерасул заместитель Батиров Саг1адулагьицаги.

Ахиралда байрамалъул линейкаялда цебесан «Лъаялъул к1улгун» х1урматалъул свери бахъана т1оцебесеб ва анц1ила цоабилеб классазул ц1алдохъаби Г1. Г1аммаевалъги П. Х1айбулаевалъги. Пат1имат Абулмуслимовнаялъ ц1ар ч1вана ц1ияб ц1алул сон байбихьиялъул т1оцебесеб ц1умур кьабг1улезда. Исана т1оцебесеб классалде унев М. Малачиевас ва 11 классалъул ц1алдохъаби Д. Гъазиевалъ, Г1абдулпатах1овалъ ва С. Муртазаг1алиевалъ кьабг1улеб ц1урмил зваргъиялда гъоркь учительзабигун ц1алдохъаби жиде-жидер классазде риххана. Байбихьана т1оцебесеб дарсиде. Г1адатлъун лъугьухъе школалда гьеб дарс ракълил, лъималазе бах1арчиял умумузул хвел гьеч1ел ишазул бицараб бук1уна. Саг1ат лъик1аб батаги нужее ц1ияб ц1алул соналде байбихьулел ц1алдохъабигун муг1алимзаби.

Р. Х1амзатов.