«Даруялде черх ккогеги, чияр ц1обалде рукъ  ккогеги»- ян абураб умумузул кициялъул маг1на  дида т1убанго бич1ч1ана, дагьал церег1ан  къояз Хунзахъ  г1умру гьабун ругел Заг1иса  Мух1амадова Пат1имат Х1амзатовнаялъул дое  щвараб мехалда. Дида бицана гьей г1аданалъ жиндихъего рачун хьихьун бугеб хъизаналъул х1акъалъулъ.

Мух1канлъи лъазелъун гьелъухъе арай дир, лъай-хъвай ккана  Пат1иматица жиндихъего ячун хьихьарай Х1асанова Пат1иматилгун, гьелъул лъималазулгунги. Т1оцебе нуц1аги рагьун дун жание яккараб мехалда, дихъ ялагьун  яч1ана сонал г1емер гьеч1ониги, чорхолъ бугеб унтиялъ берзул нур свинабурай, недегьабго гьимиялъул х1алакъай г1адан. Бусада егарай Пат1имат, х1алицаго г1адин, бусадаса йорхана ва лъай-хъваялдаса хадуб гьелъ дие бицана жиндирго къисматалъул х1акъалъулъ.

- Гьит1инго эбел хварай дун, ккун йик1ана эбелалъулги эбелалъул ц1обалде. Дие ва дир вацасе г1оло  кинабго гьабулей йик1унаан к1одо. Амма гьейги г1емераб мехалъ хут1ич1о нижеда аск1ой. К1одоцаги къо-мех лъик1 гьабуна нижергун. Бицинч1ониги, бокьарав  чиясда лъаларищха доб мехалда нижеда бук1араб ах1вал-х1ал. Хут1ана дунги вацги.

20 сон барай дун, жеги хъизан-рукъалде к1удияб х1адурлъи бук1инч1ониги, кьуна вацас росасе. Т1адежоялъе гьев нижер росулъаги вук1инч1о. Гьит1инго рек1ел т1егь т1ун арай дие, росасе ун хадубги талих1 кьеч1о.

Гьаруна 3 лъимал: 1 васги, 2 ясги. Я дунго яги бет1ергьанчи  кирниги х1алт1улел рук1инч1олъиялъ, язихъабго г1умру-яшав бук1ана нижер. Бесдалазе талих1 кьоларелъул, бот1ролъ ва мугъзалгьодалда лъимги ккун, рукъалъул маг1ишаталде юссинеяли киса гурин, бусадаса т1аде яхъинецин к1олеб гьеч1о дида. Дун аск1ое ячарай дир эбелалъул яцг1ал Пат1иматикьа нечон йик1уна дирго х1ажат т1убазецин дида т1аде яхъине к1оларого, гьелде кколей йик1иналъ. Гьеб гуребги, жиндиргоги руго гьелъул ясги, ясалъул лъималги. Гьезде т1адеги дир лъабго лъималги хьихьизе кколел руго гьелде. Пат1иматил жигарчилъиялдалъун дир 2 лъимералъе балагьана ясли-ахалда бак1. Баркала буго жеги гьединаб бак1 щибжояли лъаларел дир лъимал къабул гьаюрай Хунзахъ № 3 ясли- ахалъул заведующая Мух1амадова Пат1иматиеги.

Аск1ойги йик1арай Мух1амадова Пат1иматги жуяна хабаралде гъорлъе.

- Пат1имат ккола дир яцг1алалъул яс. Диде Т1агьадасан к1алъан рач1ана унтун Пат1иматги йигин, жиндирго х1ажат т1убазецин  гьелда т1аде яхъинеги к1олеб гьеч1ин, лъималазул эменги къват1ал сверулев, гьекъолдулев вугин, лъималги ракъун, къечон къват1азда хут1ун ругилан. Гьезде яккизе араб мехалда дида гьедин батизеги батана. Гьелъул йиго 4 классалде ине кколей яс. Амма гьей жегиги школалде уней гьеч1о. Мугъзада грижа бугилан школалде йит1ич1ого тун йик1анин, дарс кьезе учительница яч1унаанилан абулеб буго, амма т1оцебесеб классалде унеб лъимералдаг1анцин гьелда хъвазеяли киса гурин, ц1ализецин лъалеб гьеч1о. Хадусев 6 сон балев вугев вас ва 5 сон балей яс лъималазул ясли-ахалдецин рит1ун гьеч1о. Унтарай Пат1иматие щолеб бук1инч1о пенсия. 10 сон барай ясалъе щиб  унти бугебали мух1канго лъалеб гьеч1о. 9 моц1алъ щун гьеч1о лъималазул пособие.

Дун гьение щвараб мехалъ ясалт1а т1ад рет1ун бук1араб гьак1к1араб хьит, ч1алицаги бухьун данде бач1инабун бугоан. Эбел-лъималазда рак1 гурх1арай дица, Пат1иматие гьабизе кколеб хъулухъги гьабун, гьейги, васги инсуда аск1ор лъик1илан жидерго рокъор тун, к1ияйго яс дихъего хьихьизе рачун рук1ана. Хадубги дихъе ах1и бач1ана, Пат1иматги унтухъего йигила, я васасул яги хъизаналъул инсуца т1алабги гьабулеб гьеч1илан. Рак1 унтарай дун ц1идасан Т1агьаде ана ва эбелги васги ясазда т1адеги дихъего хьихьизе рачана.

Дида цебе яч1ана ахирисеб х1ухьел босулеб мехалъ, жий хунин абун рехун теч1ого, жиндир ясалъул бесдалал рехун тогейилан аманат гьабулей йик1арай к1одо.

Балагьараб мехалда Мух1амадова Пат1иматги гьедиг1ан ресалда йигей к1удияб мина-карт бугей ч1ужу гьеч1ин тана дица.

Буго гьелъул Хунзахъ бичун босараб гьит1инабго мина. Гьенисан цо гьит1инабго рукъ гьелъ  кьун бугоан г1агарай ч1ужуялъухъе ва гьелъул лъималазухъе. Хасалил заман бугелъул, токалъул печьги бакун  хинлъизабулеб буго рукъ.

 Эбелалъе ва лъималазе гурх1арас кьураб 2 кроватги лъун буго жаниб.

Абула, гьаб заманалда садакъа кьезе чи  хут1ун гьеч1илан. Садакъа кьезеги, гурх1ел гьабизеги бокьани, гьалдаса мустах1икъаб хъизан гьеч1илан тана нижеца.

К1варас к1вараб кумек гьабуни  киназулго садакъа бук1инаан.

Н. Г1алиева.