Ассаламу г1алайкум, х1урматиял газеталъул гьудулзаби! 5 маялъ нилъер г1агараб «Росдал зах1матчиялъул» т1убала 90 сон. Нижее – газета гьабулезе бокьун буго нуж газета ц1алулезулгун гьеб гьайбатаб юбилей г1ахьал гьабизе, т1олго районцоязул рак1азулъ хут1уледухъ байрам г1уц1изе. Районалъул газета ц1алулезда, гьеб бокьулезда гьоркьоб 90-сонилаб  юбилеялъул х1урматалда, нижеца лъазарулел руго  цоздаса цоял интересаб 9 къец. Къецазда бергьарал юбилей т1обит1улеб къоялъ к1одо гьаризе руго хасал призаздалъун.

Хъвай «Росдал зах1матчи», гьабе къецазда г1ахьаллъи – нужер гьелдаса рак1 бух1иларо!

Т1оцебесеб къец

Газеталъулгун г1елбащадал

Районалъул газеталъул т1оцебесеб номер къват1ибе бач1ана 1925  соналъул 5 маялъ. Лъазе бокьилаан нижгун газеталъулгун г1елбащадал щал хут1ун ругел районалдаяли. Газеталъул г1елбащадал – лъала нуж 90 сонилаб г1умру бихьарал, инсанияталъул тушман -  фишизм нахъ ч1варал, рагъалъ ч1унтизабураб улка бахъинабурал, свак-к1вах1 лъач1ого х1алт1арал, адабалъеги реццалъеги мустах1икъал г1адамал рук1ин. Нижеца 1925 соналъ гьаруразда (аслияб къаг1идаялъ гьезул лъималазда) гьарулеб буго жидерго х1акъалъулъ нижеда лъазе гьабеян. Ратани нужер исана 90 сон т1убалел умумул хъвай редакциялде гьезул  х1акъалъулъ, рит1е нижехъе гьезул  рак1алдещвеял, суратал. Юбилей т1обит1улеб къоялъ газеталъул г1елбащадал к1одо гьаризе руго сайгъатаздалъун.

К1иабилеб къец

«Т1огьиллъарал т1анчал»

Газета ц1алулез гьел рукъун гьезул подшивкаби гьарун рук1уна. Нужехъ  ц1унун ратани 20-30 ва дагьабги соназ цере рук1арал газетал, рач1а нижехъе гьелги росун. Ц1ик1к1ун церег1ан  соназ бук1араб газета бач1аразе бук1ина призги.

Лъабабилеб къец

Дир г1умруялъулъ «Росдал зах1матчи»

Районалъул газеталдасан нужеца щиб бугониги пайдаяб информация лъан батани, нижеца хъваралъ нужее  сундулъ бук1аниги кумек гьабун батани гьелъул х1акъалъулъ хъван нужерго  суратгун бит1е редакциялде. Бищун лъик1аб хабаралъухъ кьола сайгъатги.

Ункъабилеб къец

Фотоконкурс «Дун ва бокьулеб газета»

Рит1е нижехъе газетагун рахъарал нужерго суратал. Бищун интересаб г1ажаибаб сураталъухъ кьола  приз.

Щуабилеб къец

«Цогояб гьарураб къо»

Райгазета бижараб къо ккола 5  май. Цойги лъил бугеб 5 маялъ  гьавураб къо? Гьеб къоялъ гьарураз хъвай нужерго х1акъалъулъ редакциялде, гьелда цадахъ бит1е нужерго суратги. Гьединго, хабаралда хъвай кидаялдаса нахъе  нужеца газета  ц1алулебали, гьелда нужее бищунго  щиб бокьулебалиги. Гьай-гьай, нужееги рук1ина сайгъатал.

Анлъабилеб къец

Газеталде кеч1

Щиб т1аг1ам бук1инеб маг1арул коч1ол пандрида ах1ич1еб мехалъ? Бищун цебе халкъалда к1удиял раг1ул устарзаби лъала газеталдасан. Нижеца лъазабулеб буго юбилейнияб куч1дузулаб къец. Рит1е редакциялде нилъерго г1агараб газеталде гьарурал куч1дул. Бищун лъик1ал куч1дузул авторал к1одо гьарула сайгъатаздалъун.

Анкьабилеб къец

«Бахъилин репортаж»

Къец лъазабулеб буго лъималазда ва г1олилазда гьоркьоб. Гьеб т1обит1изе буго лъабго номинациялда: щугоялдаса анц1го соналде щвезег1ан, 10 соналдаса 17 соналде щвезег1ан ругел лъималазда ва 17 ялдаса 25 сон барал г1олилазда гьоркьоб. Г1исинал художниказ (5-10 ва 10-17 сонал ругез) редакциялде рит1изе ккола ясли-ахалда, школалда, кружокалда, экскурсиялда ва гь.ц. бак1азда нужерго ккарал лъугьа-бахъиназул х1акъалъулъ рахъарал суратал. Г1олилаз (17-25- сон бараз) х1адуризе ккола районалъул даражаялъул лъугьа-бахъиналъул фоторепортаж (суратал ва гьезул х1акъалъулъ къокъал хъвай-хъваг1аял). Фоторепортаж г1уц1изе бегьула г1адатиял темабаздасанги, масала: эбелалъул гьаюраб къо, кинаб бук1аниги байрам, исанасеб хасел ва гь.ц. Бищун лъик1ал суратазухъ щвела призалги.

Микьабилеб къец

«Бищун лъик1аб логотип»

Компьютералъулгун гьудуллъи бугез гьабе «Росдал зах1матчи» абураб логотип. Бищун берцинаб, интересаб логотип ургъаразе буго приз.

Ич1абилеб къец

«Росдал зах1матчиялъе» бищун лъик1аб девиз

Газета ц1алулел, ургъе нилъерго районалъул г1умруялъул мат1улъун кколеб газетаялъе данде кколеб-гьелъул х1алт1и бихьизабулеб девиз. Махщел ц1ик1к1арасе кьола сайгъатги.

Районцоял г1ахьаллъе къецазулъ. Газеталъул юбилей к1одо гьабулеб къоялъ нуж рук1ина нижее хириял гьалбаллъун, гьалмагъзабилъун. Рач1а юбилей цадахъ гьабизе!