Гьанжег1агар Хьиндахъ библиотекаялда т1обит1ана Ват1анияб рагъ лъуг1аралдаса 70 сон т1убаялъул х1урматалда г1уц1араб вечер. Рагъул кьог1лъи бихьарал ветеранал нахъе хут1ун гьеч1ониги, гьеб вечералде ах1ун рук1ана ветераназул лъимал-ирсилал. Рук1ана вечералда т1аде ах1арал гьалбалги: школалъул директор Мух1амадов Мух1амад, росдал бегавул Мух1амадов Мух1амад ва росдал клубалъул директор Сайгид Х1адисов. Вечералде ах1арал руччабазда гьоркьор рук1ана инсул гьумер лъаларел, рагъдаса дадаял т1ад руссинч1ел ясал. Г1усманова Хатиматил эмен Г1усман т1аг1ана рагъда, гьей хут1ана г1умруялда жийго яц-вац гурей, херай эбелалъ хьихьун г1урай г1адан. Г1алиева Пат1иматилги вуссинч1о эмен, амма гьелъул рак1 гъезе вац-яц рук1ана, ракъи-къеч лъазе теч1ого хьихьана эбелалъ.
Гьеб вечералда йик1ана киназдасаго къваридай, пашманай, г1адан-Пат1имат Салах1удинова. Гьелъ 3 моц1 байдал 1941 соналъ ун вуго эмен рагъде, гьев т1ад вуссинч1о. Эбелги гьелъ 5 сон байдал къадаралде щун, хут1ула т1убанго бесдалайлъун, ункъг1алалъ хьихьун. К1алъазе раг1и кьедалги гьелъ ц1акъ пашманго абуна к1иго-лъабго раг1и. Ункъг1алалъ бицунаанила къват1иве лъугьунев инсуца кинидал мокъги ккун т1адеги къулун абунила рихьиладай т1ок1алъ нилъ цоцаздаян. Киналго бадиб маг1уги хулун ралагьана гьелъухъ, рохун рук1арал лъималазулцин гьурмадаса гьими т1аг1ана. Пат1иматида бихьун буго г1емер г1акъуба, унта-щокълъи. Гьей йиго т1алабалъе цевесев чи гьеч1ей г1адан ва гьединал ц1ехолел гьеч1илан бук1уна кидаго гьелъул рек1ел пашманлъи.
Лъималаз рик1к1ана, ах1ана куч1дул, х1ана рагъулъ лъукъун холев солдатасул х1акъалъулъ сценка.
Гьезда рохелги пашманлъиги жубараб дандеруссин баркана школалъул директорас ва росдал бегавулас. 70 сон аниги к1очон гьеч1о гьеб бихьаразда рагъул кьог1лъи. Ракъи-къеч, гьеб лъималазда бихьизе теларин рачел черхалдаги къан бихьиназулабги гьабун г1умру нухда бачарал руччабазе рецц.
Библиотекаялда гьабураб вечер лъуг1ун хадуб росулъ цох1о хут1арав ветеран Камил Х1адисовасухъеги щвана лъималгун цадахъ библиотекаялъул заведующая. Цо къоялъг1аги жал ц1ехарай, т1ок1азда рак1алде щвеч1ониги, гьеб къоялъг1аги бух1араб чай жидее кьурай Мадинатие баркала загьир гьабуна руччабаз ва вечералъул г1ахьалчаг1аз. Цоцаздехун гьаруна баркиял.
Киназего сахлъи, халатаб г1умру, кинабго лъик1абщинабги гьарулаго Мадинат Х1ажиева.
|