Г1адамазул г1умруялъулъ к1вар ц1ик1к1араб бак1 ккола пенсионнияб фондалъул х1алт1уца. Дагьалго гъурщазцин пенсия ц1ик1к1индал рохула г1адамал. Инфляциялда рекъон гьабула пенсиялъул  индексация (гьеб ц1ик1к1ин). Исана пенсиял кьеялъулъ ккарал хиса-басиязул, гьарурал ц1илъабазул бицана районалъул пенсионнияб  фондалъул отделалъул нухмалъулей Пат1имат Ах1мадовалъ.

- Пат1имат, ц1ик1к1анищ исана пенсиял?

- Февраль моц1алда гьабуна пенсиязул индексация. Индексация гьабураб пенсия щвана г1иц1го араб соналъул 30 сентябралде щвезег1ан х1алт1улел гьеч1ел  пенсионеразе. Пенсионер х1алт1илев вугев – гьеч1ев пенсионнияб фондалъ ч1езабула гьев х1алт1улев г1уц1иялъул баяназда рекъон. Ахирисел гьединал баянал нижехъ рук1уна т1адехун рехсараб къоялде кьурал. Пенсионер ватани индивидуалияв предприниматель, нотариус, адвокат, ай живго жиндит1аго ч1ун х1алт1улевлъун, араб соналъул 31  декабре щвезег1ан гьев учеталда ватани, пенсионнияб фондалъ гьев х1алт1улевлъун рик1к1уна. Гьединав пенсионерас араб соналъул 1 октябралдасан гьаб соналъул 31 марталде щвезег1ан заманалда х1алт1и тани, гьес  бегьула гьеб пенсионнияб фондалда лъазабизе ва гьаб соналъул 31 маялделъаг1ан нижехъе  г1арза кьезе. Г1арза кьун хадусеб моц1алдасан пенсионерасе щола индексация гьабураб пенсия. Гьелдаса хадув пенсионер нахъойги х1алт1изе лъугьани, гьесие щолеб пенсия дагь гьабуларо. 31 маялдаса хадув пенсионер х1алт1удаса нахъе вилълъани, пенсионнияб фондалде гьес г1арза кьезе кколаро, щайгурелъул гьаб соналъул 2-леб кварталалдасан г1уц1иялъе (х1алт1и кьолесе) бихьизабун буго щибаб моц1алъулаб отчет кьеялъул бигьа гьабураб къаг1ида гьелда рекъон пенсионер х1алт1улев вугев – гьеч1ев автоматически ч1езабула.

1-себ февралалдаса страховияб пенсия ц1ик1к1ана 4 проценталъ, ЕДВ – 7 проценталъ.

1-себ апрелалдасан, х1алт1улел ругониги – гьеч1ониги, социалияб пенсия ц1ик1к1ине буго 4 проценталъ. Гьедин, социалияб пенсиялъул гьоркьохъеб лъаг1алил къадар бащалъула 8562 гъурущалда.

Араб соналъул 1-себ январалдаса байбихьун, Россиялда ч1езабураб пенсионнияб формулаялда рекъон, гьаб соналда херлъун  бахъулеб пенсия бахъиялъе бук1ине ккола 7 соналдаса дагьаб гьеч1еб х1алт1ул стаж ва 9-са дагьал гьеч1ел пенсионниял баллал. Исана пенсионнияб балл бащалъула 74,27 гъурущалда.

- Нужер х1алт1уда хурхарал кинал хиса-басиял лъугьарал г1уц1абазул (х1алт1и кьолесул) х1алт1улъ?

- Кьурал ва рехсарал взносазул щибаб кварталалъ г1уц1абаз отчет кьола нижехъе. Гьанже апрелалдаса байбихьун, пенсионерал х1алт1улел рук1ин лъазе, ч1езабулеб буго щибаб моц1алъе отчет кьолеб къаг1идаги. Гьелъие щибаб моц1алъул 10-леб къоялдаса кват1ич1ого страхователас пенсионнияб фондалде кьезе ккола киналго страховать гьарурал х1алт1ухъабазул х1акъалъулъ гьадинал баянал: х1алт1ухъанасул фамилия, ц1ар, инсул ц1ар, СНИЛС ва ИНН.

Т1оцебесеб гьединаб отчет кьезе ккола 10-леб маялдаса кват1ич1ого.

-«Эбелалъул» капитал кьеялда кканищ хиса-басиял?

-«Эбелалъулаб» капиталалъул программа халат гьабуна жеги 2 соналъ. Гьелда рекъон «эбелалъулаб» капитал щвезе бегьула 2018 соналъул 31 декабралде щвезег1ан к1иабилеб ялъуни хадусеб лъимер гьабураб яги хьихьизе бачараб хъизаналъе. Гьаб соналда капиталалъул къадар бащалъула 453026 гъурущалда.

Гьаб соналъул 1-себ январалдасан, законалда рекъон, хъизаназул ихтияр буго «Эбелалъулаб» капиталалъул г1арац лъимер-инвалидалъе х1ажаталъе х1алт1изабизе. Гьеб г1арац хвезабизе бегьула хъизаналда бугеб бокьараб лъимер-инвалидалда, гьеб лъимералъул соназухъ балагьич1ого. Гьеб мурадалъе пенсионнияб фондалъ сертификаталъул бет1ергьабазухъа г1арзаби къабул гьарула РФялъул Х1укуматалъ «эбелалъулаб» капитал х1алт1изариялъул къаг1идаби ва сунде гьеб харж гьабизе бегьулебали ч1езабун бахъиндал.

П. Гунашева