Унта-щокълъун лъималги рачун умумул г1емерго ккола больницаялде. Тохтурзабаз берцинаб бербалагьиги гьабуни, гьезул унта-щокълъиялъухъги г1енеккани, лъик1аб к1алги  к1алъани кутакалда рохула унтарал. Дагьаб цебег1ан ясги унтун дун ине ккана больницаялде. Гьениб хал-шалги гьабун ниж регизе рит1ана лъималазул  отделениялде. Лъималазул отделение бахъун бугоан ц1ияб корпусалде. Къойидаса - къойиде бихьулеб цебет1ей лъугьунеб буго нилъер больницаялдаги. Отделениялъе бажарун  нухмалъи гьабулеб буго х1албихьи бугей  тохтур, низам ц1унарай г1уц1арухъан  Гъазиева Пат1имат  Мух1уевналъ. Г1ажаибго рак1 бохизабуна лъималазул ц1ияб отделение бихьидал. Рац1алъи ц1унизелъун к1алт1а лъун ругел бахилабиги х1ат1ат1а хун, жанибег1ан палатабахъ кинаб берцинлъидай бугоян пикрабалъ яч1унаго, дир бер реч1ч1ана коридоралъуб диваналдаги г1одор ч1ун кодор ккун гьит1ичалгун телевизоралъухъ ралагьун ругел улбузде, квег1идехун т1аде гурун лъималгун лъун бугеб к1удияб, берцинаб аквариумги гьелда цебе жанире риччазе х1адурарал амма жеги  ведроялъурго ругел  щурункъуркъбуздеги. Гьеб  киналдего берги щвезебулаго дун щвана палатаялде. Палатабахъги бугоан кинабго: унтарасе берк1ал-кверал чуризе бокьаниги, чвердезе бокьаниги, х1ажат т1убазе бокьаниги кибего ине ккеч1ого жанибго ч1езабун. Гьелдаса к1удияб рохел щибха бук1инеб жакъа лъимерги унтун больницаялда егизе ккарай эбелалъеги ва жибго лъимералъеги. Гьеле гьединаб берцинаб ц1ияб  отделениялде рахъинарун руго нилъер гьит1ичал. Киналъухъго халги гьабулаго къадада ран ругел сураталги рихьулаго дун  йилъана жийго  отделениялъул  нухмалъулей Гъазиева Пат1иматихъе. Пат1имат йиго кутакалт1а х1еренай, унтаразухъ сабуралда г1енеккулей, жиндирго жавабчилъи ц1ик1к1араб х1алт1и рак1-рак1алъ бокьун, т1ад ч1ун гьабулей г1адан. Дирго ясалъул унта-щокълъиялъул бицун бахъиндал, дица Пат1иматида гьикъана г1ажаибго берцинаб отделениеги щун бугин нужее  рази ругищ нуж алдасаян.  Пат1имат дихъги ялагьун елъана ва цинги абуна добцояб отделениеги бук1анин жидер лъик1аб, амма цо-цо унтарал  лъималазул ва лъималазда цере ругел умумузул т1алаб гьеч1олъиялъ  берцинлъи хвезабун бук1анин долъулан. Бажарарабщинаб гьабулин жиндица ва жиндир коллективалъ унтарал сах саламатго жидедаса разиго, лъилъун нахъе иналъе. Гьеб бихьулебги батилин жидер отделениялда регараздагиян. Гьабгощинаб харж- мухьги т1ад хвезабун бан кьун бугеб жинда  жанир унтарасе киналго санаг1алъаби  ч1езабураб гьаб  детский отделение гьадин берцинго ч1еялъе нижеда цадахъго унтун регаразги  гьабулебани жидедаго хадуб г1уц1а-к1ут1и, рац1алъи ва ц1уна-къаян йик1анак пат1имат дида ургъел бикьулей. Гьеле гьеб мехалъ бук1инаанила берцинлъиги рак1 разилъиги.  Унтарал лъималги къойидаса къойиде г1емерлъулел руго, отделениеги къанаг1атги ц1еч1ого бук1унаро, регизе бак1 гьеч1ого унтарал  нахъ ч1вазе ккараб мехги чанги бук1анила жидер. Свак-к1вах1 лъач1ого х1алт1улел жалги ругилан бицана Пат1иматица рак1 унтун жидерго х1алт1ул.

Пат1имат йиго х1алт1изе гъира-шавкъ бугей, унтаразда гурх1араб, х1еренаб х1алимаб г1амал-хасияталъул инсан. Лъай бугей тохтур гурейги Пат1иматилъ загьирлъана  г1уц1арухъанлъиялъул бажари-гьунарги. Унтаразеги х1алт1ухъабазеги  ч1езабун буго дурусаб график коллективгун цадахъ жидерго харжги т1ад хвезабун отделениялда гьабун буго лъик1аб г1уц1а-к1ут1и, берцинлъи. Талих1 буго чиясул бокьулеб х1алт1и, махщел щвей. Гьединасда х1алт1и ч1алг1унаро, к1вах1-свак лъаларо.

Пат1имат кида щваниги ятула  палатабазухъ, яги жиндирго кабинеталда унтаразукл историязде къулун. Зах1матаб унтараб лъимерги тун гьей х1алт1удаса  нахъе унаро. Унтаразе Пат1иматил кабинеталъул нуц1а кидаго рагьараб буго. Дида гьеб лъала унтараз бицун гуреб дидаго бихьунги. Ниж г1емер ккола Пат1иматихъе нижг1ан Аллагьги разилъаги гьелдаса. Киг1ан к1удиябги баркалаялъе мустах1икъал сестрабиги цогидал х1алт1ухъабиги руго Пат1иматица нухмалъи гьабулеб лъималазул отделениялда.

Ахиралдаги рак1-рак1алъул баркала загьир гьабун Пат1иматие дица гьарулеб буго баркатаб, талих1аб, Аллагьги г1адамалги разияб г1умруги, сундулъго икъбал бит1 ккейги, х1алт1улъ ч1ах1иял бергьенлъабиги.

У. Къурамух1амадова.