2 февралалъ райадминистрациялъул данделъабазул залалда районалъул активги г1ахьаллъун т1обит1араб тадбиралда гьоркьоб лъун бук1ана Дагъистан республикаялъул бет1ерас халкъалде ва парламенталде  гьабураб иргадулаб хит1аб. Абизе ккола гьеб къоялъ данделъабазул зал занк1ун ц1ун бук1анин ва хадур хут1арал бак1ги щвеч1ого, рахъунч1унги г1енекканин районалъул нухмалъулев Юсупов Саг1идил к1алъаялъухъилан. Гьенире рач1ун рук1ана  райадминистрациялъул бет1ерасул заместителалги, аппараталъул х1алт1ухъабиги, учреждениял-организациязул нухмалъулелги, интеллигенциялъул вакилзабиги, г1адатиял зах1матчаг1иги.

Саг1ид Камилевичас щибаб бут1а ккун рагьана данделъаразе  Р. Г1абдулат1иповасул хит1аб. Бицана  араб соналда Дагъистаналъул экономикаялда, социалиябгун культурияб ва цогидалги бут1абазда ккарал церет1еязул, т1адч1ей гьабуна хадубккун к1вар буссинабизе кколел рахъазда, нахъеккеязда. Бицана республикаялда, улкаялда, гьеб тун къват1ибехунги гьабсаг1аталда бугеб политикияб ах1вал-х1алалъул. Гьелдаса хадуб Юсуповасул хабар дагь-дагьккун  районалъул г1умруялде сверана.

- Районалъул цебет1ей цох1о дир х1алт1и гуро, нилъер социалиябгун экономикияб цебет1ей бараб буго щивасул х1аракаталда,- ян абуна Саг1ид Камилевичас районалда ахираб соналъ ккарал цо-цо лъик1ал рахъазул бицунаго. Масала, араб соналъул х1асилазда рекъон муг1рузул зонаялда  бак1алъулаб нухмалъиялъул бищун рахъи кьураблъун рик1к1ана нилъер районалъул т1алъиялъул х1алт1и ва гьелъие  щвана 1.484 азарго гъурущалъул грант, гьединго районалъул бет1ер мустах1икълъана «Лъаг1алил нухмалъулев»  абураб х1урматияб ц1аралъе. Лъик1алан х1алт1и гьабулеб буго районалда г1адамазул рук1а-рахъин лъик1лъизабиялъе, х1акъикъаталдаги араб сон райцентралъе бук1ана берцин гьабун къач1а-к1ат1аялъулаблъун. Капиталияб ремонтги гьабун къач1ана районалъул культураялъул к1алг1а,  шагьаралъулалгицин х1айран гьариледухъ буго гьанже гьеб. Къокъаб заманалда кьуч1дасанго бан х1алт1изе кьуна  Хунзахъ МФЦ,  гьанже районцоязул рес буго  чанго бат1ияб идараялдеги хьвадун халат бахъун гурого т1убалереб бук1араб къвариг1ел, гьеб г1уц1иялъ циндаго т1убазе. Хунзахъ, Ват1анияб  рагъдаса руссинч1ел рак1алде щвеялъе бараб памятникалда аск1об гьабуна фонтан, культураялъул к1алг1аялда цебе рагьана «Наибзабазул парк».

Саг1ид Камилевичас т1адч1ей гьабуна районалъул экономикаялъул аслияб бут1алъун кколеб росдал маг1ишаталдаги. Районалъул киналниги маг1ишатазда 28500 ч1ег1ербоц1и, 200 азаргог1ан г1и-ц1аниги ругилан бихьизабуна гьес. Араб соналда г1езабураб валовияб продукция цо миллиардалде бахунила. Маг1ишатазда х1адур гьабураб гьанал къадар 300 тонна кколила, районалдаго дандекъан цо г1акдадаса 1450 килограмм рахьдал беч1ч1ун буго. Гьединго рихьизаруна хурухъанлъиялда ругел г1унгут1абиги. Т1абиг1иял шарт1азда банги, жалго иш т1адал г1адамазул тасамах1лъиялъги хурухъанлъи нахъе ккун унеб бугилан абуна районалъул нухмалъулес. Араб соналъ щвараб т1орщалил цо гектаралде х1исаб гьабун босани г1иц1го 14,5 центнер бак1арун буго. Исанисеб  сон республикаялда ахихъанлъиялъул сонлъун лъазабун бугила, районалда гьеб цебет1езабиялъе ресалги ругила, умумулъанго батараб бут1аги кколелъул, Саг1ид Камилевичас ахихъанлъи цебет1езабиялде ах1ана районцоял. Х1исабалде босун бугила исана росабалъ 40 гектаралда ц1иял ахал ч1езе, херал, басралъарал гъут1биги рахъун церегусел ахал ц1и гьаризеги.

Г1и-боц1улги ах-хуралъулги ниг1матал г1езарурал г1оларелъул, бак1азда гьел къач1алел (переработка) цехал, пункталги разе ругила, г1адамазе х1алт1ул бак1алги рук1инила.

Ахираб заманалда дунялалда бугеб политикияб ах1вал-х1алалъулги бицана данделъиялда. Украинаялъул, Польшаялъул, Прибалтикаялъул улкабазул политикиял церехъабаз х1акъикъияб тарих, ай нилъер история жидеего бокьухъе хиса-сверизабулеб бугила. Евросоюзалъ Россиялъулгун дармилал гьоркьолъаби хвезарун къват1иса рач1унел рук1арал кванил ниг1матал улкаялдаго г1езаризе кколила, гьединлъидалги г1адамал х1алт1изе, г1и-боц1удасан, ах-хуралдасан маг1ишат гьабизе ругьунлъизе ккелилан абуна Саг1ид Камилевичас. Гьенибго бицана районалда лъай кьеялъул, сахлъи ц1униялъул бут1абазда бугеб ах1вал-х1алалъулги.

Дагъистан муниципалитетаздасан г1уц1араб республика кколелъул гьезул киназулго цадахъ рекъон гьабулеб х1алт1и бук1ине ккола г1адамазул г1умру-яшав лъик1лъизабиялде, нилъер муг1рузул улка т1егьазабизе, гьабулеб щибаб къойилаб рахъи кьолеб х1алт1илъун,-ан абуна районалъул бет1ерас жиндирго к1алъаялъул ахиралда.