Дагъистаналъул пенсионнияб фондалда т1обит1ана Т1олгороссиялъул «Т1адаб пенсиялъулаб страхованиялъул 2014 соналъул бищун лъик1ав страхователь» абураб щуабилеб конкурсалда бергьенлъи босаразе шапакъат кьолеб тадбир. Конкурс бикьун бук1ана бат1и-бат1иял номинациязде: «Бищун лъик1аб жидер нусгоялде щвезег1ан х1алт1ухъан вугеб страхователь», «Бищун лъик1аб жидер 100-500 х1алт1ухъан вугеб страхователь», «Бищун лъик1аб щунусгоялдаса ц1ик1к1арав х1алт1ухъан вугеб страхователь», «Ккурал х1алт1ухъабазул зах1мат х1алт1изабулев бищун лъик1ав страхователь-индивидуалияв предприниматель».
Рохизе ккараб х1ужжа, исана к1иабилеб нухалъ конкурсалда бергьенлъи босаразде гьоркьоре рач1ана Хунзахъ районалъул страхователалги. 2014 соналда 100-500 х1алт1ухъан вугеб бищун лъик1аб страховательлъун бахъана ОАО «Мостоотряд-99». Предприятиялъул аслияв инженер Ясулов Мух1амад Х1ажиевичасе кьуна дипломги.
Ккурал х1алт1ухъаби ругев бищун лъик1ав индивидуалияв предпринимательлъун рик1к1ана Х1ариколоса Г1усманов Х1ажи Г1умарх1ажиевич.
Жиндир заманалда страховиял взносал кьей хадубккун лъик1аб пенсия бук1иналъе г1иллалъун кколелъул, к1удияб рецц-бакъалъе ва адаб-х1урматалъе мустах1икъаблъун ккола гьезул жидедехун ва жидерго х1алт1ухъабаздехун бугеб т1алабги жавабчилъиги.
И. Мух1амадов.
|