Дунго херлъун вугониги, хадуб бач1унелъул пикру гьабич1ого хут1улеб гьеч1о. Халкъалъул ургъел гьабуларев чи-пайда гьеч1ев чилъун рик1к1унев ватана умумузго. «Магъил ургъел гьабулагойила х1анч1ил бохдул т1еренлъарал» абураб аваразул кициялъул маг1на бич1ч1ич1ого к1алъалев чиги дун гуро. Амма дирго Дагъистаналъул бет1ерлъиялде кколев чиясул бат1алъи лъаларевлъун хут1изе бокьулеб г1амалги дир батиларо. «Ват1ан байбихьула нилъер гъаст1асан» абураб алфазалъул асаралда гъоркь унеб буго дир г1умру. Дие бокьула дирго росуги дирго районги, хадуб бокьула дирго республикаги к1удияб Ват1анги. Ват1ан ц1унулеб рагъда паналъана дир эменги...
Рокьула дие лъай бугел г1адамал. Хиралъула дие жинца т1аса бищараб пиша нухт1а бачине к1олел г1адамал. Г1агарлъун рихьула дида рац1ц1алъи ц1унизе к1олел г1адамал. Гьеб лъабабго рахъ жиндилъ бук1иналъ вокьула дие Myxly Г1алиев.
Жиндасаго Россиягицин бохарав президентлъун вихьизавуна Myxly Г1алиевас живго. Жиндаса вац1ц1адав чи щивго ватиларилан абилехъин х1алт1ана гьев. Президентлъиялдаса нахъе инего бокьилароанин анищ гьабизе т1амуна гьесул х1алимлъиялъ г1адамал. Лъик1аздаса ц1акъавлъун лъугьана Myxly Г1алиев Дагъистаналъе. «Дида дуда гьедин гьабеян гьарулеб буго» абун х1еренго к1алъана гьев жиндирго х1алт1ухъабаздацин.
«Хуриса Г1алил г1адал лъимал лъугьаги» абун бала рахьи нилъер г1адамаз жакъа. Жиде-жидер нухдасан унел руго Myxly Г1алиевасул вацалги. Цо лъиениги гьабизе ккеч1о гьес кумек. Кверч1вазе ккеч1о гьесул хъулухъалъ гьезда.
Ккарабаниги гьабилароан Myxly Г1алиевас законалдаса бахъараб жо.
Гьесул напсалда данде кколареб жо буго тухумчилъи.
Myxly Г1алиевас г1умруялъ лъиениги ришват кьун бугилан раг1ич1о.
Лъихъаниги ришват босарав чиги гьев гуро.
Бокьараб х1алт1уе х1алалаб къимат кьезеги лъала гьесда.
Х1алт1изе бугеб гьунарлъун бихьула дида - анц1ила лъабазарго чиясе х1алт1ул бак1 батизе к1вейги, гьебги цох1о соналда жаниб.
Миллион квадратияб метраялде бахун рукъзал разе рес батиги.
Нусиялда лъебералда микьго бест1алазе квартираби кьезе санаг1ат гьабиги. К1удияб Ват1анияб рагъул г1ахьалчаг1иги, росал рагьда паналъарал хъизаналги жанир ч1олел бак1азе гьес г1амал гьабиги. Живго лъик1ав лъугьун г1олохъанал литераторазе, художниказе, композиторазе, аспирантазе, студентазе стипендия ч1езабиги.
Гьесул жигараялдалъун гурищ рагьараб Хасавюрталда Консервабазул завод, Дербенталда лезгиязул тиятир бараб, сахлъи ц1униялъул объектал разе гьарурал, ц1иял нухал рахъарал, кьоял рарал, лъинал рахъарал, анц1ила анкьгониги ц1ияб школа бараб-кинабго цох1о араб соналда жаниб!
Гьев президентлъун ккаралдаса хъулухъалъул бак1ал ричи лъуг1анилан гурищ Myxly Г1алиев какулезциниги хъвалеб бугеб. Сталинил хъач1лъиги какулел, Myxly Г1алиевасул сабурлъиги какулеб къаг1ида бич1ч1уларо дида. Цинт1аго т1аг1инабизе к1олеб жойищ к1удиял балагьал рук1унел? Гьелъие заман г1езе гурищ гьев гьанжеги вищизе кколев?! Т1ок1аб жо бицинч1ониги, налогал бюджеталде рач1ин лъабц1улго ц1ик1к1ун гьеч1ищ?
Рекъелги, икъбалги, талих1ги Дагъистаналъул халкъазе бук1инабизе гурищ нилъер Myxly Г1алиев къеркьолев вугев?!
Myxly Г1алиев г1олохъанго вач1ана политикаялде. Доб заманаялъул бищун т1адег1анаб хъулухъалде вахинег1ан х1алт1ана гьев. Гьелдаса хадубги Халкъияб собраниялъул председательлъун вищунги х1алт1ана гьев. Гьенисанги Дагъистаналъул т1оцевесев президентлъун вищана гьев. Гьанже, к1иабилеб болжалалъул заманги гьесие кьеч1они, гьес байбихьун бук1арабщинаб лъик1аб х1алт1и нухт1а хут1иялда х1инкъи буго. Тухумчилъиги рихарав, ришват босиги сурун бихьарав Myxly Г1алиевасул бак1алде к1иябгоги хирияв чи ккеялда х1инкъи буго. Яги х1алт1и лъаларев чи вач1иналъул ургъел буго. Гьеб х1инкъиги ургъелги нахъч1вазе к1ола Дагъистаналъул халкъал цолъани. Цолъиялде ах1ула дица киналго.
Г1абасил Мах1амад.
2010 сон.
|