Марталъул 22 къоялъ культураялъул к1алг1аялда т1обит1ана районалда «Муг1рузул сон» рагьиялъул тадбир. Районалъул бет1ер, администрациялъул жавабиял хъулухъчаг1и, росабалъа культураялъул х1алт1ухъаби, интеллигенциялъул ва цогидал г1уц1абазул вакилзабиги г1ахьаллъун аваданго ана гьеб дандерусин райцентралда.
Данделъиги рагьун баркиялъул к1алъай гьабуна лъуг1изег1ан гьеб нухда бачарай культураялъул отделалъул нухмалъулей Ирайгьанат Мух1амадовалъ. Дагъистаналда «муг1рузулаблъун» лъазабураб 2016 соналъ республикаялда цере ч1арал ч1ах1иял масъалабазул, гьелдаго гъорлъ районалда гьаризе х1исабалде росарал х1алт1абазул бицараб г1ат1идаб к1алъай гьабуна районалъул нухмалъулев Юсупов Саг1идицаги данделъаразда гьеб тадбирги баркун.
Умумузул миллияб рет1елгун ругоан гьенире росабалъа рач1арал культураялъул х1алт1ухъаби. Гьелъие г1иллаги умумузул г1адатазул кудбтураялъул централъул х1аракатчаг1азул церерахъиналдалъун баянлъана залалда ругезе. Балагьизе рач1аразда гьез бихьизабуна цебе бертин гьабиялъул сценка. Банкетазул залаздеги ч1ах1иял кафе-рестораназдеги бертаби сверараб гьаб заманалъул г1елалъе рагьараб дарслъун бук1ана цебе маг1арул росулъ киг1ан рес бугеб тухум-кьибилалдаги г1адатго гьабулеб бук1араб бертин. Киг1анха сценаялда рекъон бук1араб миллияб рат1лилъ цереги рахъун, киназулго хъатч1ваялда гъоркь ц1емсадерил вокалияб группаялъ ах1араб г1агараб росдаде гьабураб кеч1. Разиго къабул гьаюна балагьараз гьенисаго М. Магьдиевалъул цееяхъинги. Ц1оросаролъ ч1уч1иналъул гвай бана маг1арухъеги рач1ун хунздерил, бекьеч1дерил ва х1арисезул культураялъул х1аракатчаг1азги. Гьездаса нахъе ккезе ч1еларилан буц1улги к1ахъиялги х1ариселги данделъун, сценаялда оцбаялъул г1адат т1обит1ана лъабабго росдал артистаз. Мущули, Лъаг1илухъ культураялъул х1аракатчаг1иги рахъана сценаялде. Умумузул габанидул квар кьури, лъимер гьабиялъул г1адатал рихьизаруна гьезги.
Росабазул культуралъул х1аракатчаг1азул церерахъиназул гьоркьоблъиялда балагьарал ч1алг1ун теч1ого куч1дул ах1ана Дагъистаналъул халкъияй артистка Г1айшат Тажудиновалъ, республикаялъул культураялъул мустах1икъай х1алт1ухъан Пат1имат Султ1ановалъ, Хадижат Г1абдулкъадировалъ, Чаран Султ1анбеговас.
Умумузул нек1сияб мах1 гъорлъ бесараб, рак1алде щвезабизеги мисал босизеги пайдаяб жо жиндилъ г1емераб тадбирлъун лъугьана «Муг1рузул сон» рагьи районалда.
Р. Х1амзатов.
|