Бат1и-бат1иял кьеразул шариказ берцин гьабураб ва лъималазул релъи-хъуй сверухълъиялдаго т1ибит1араб г1адатияб гуреб ч1аголъи бук1ана  июналъул т1оцебесеб къоялъ Хунзахъ спорткомплексалъул азбаралда.

Халкъазда гьоркьосеб лъимал ц1униялъул къоялъул байрамалде гьенире рач1ун рук1ана жибго райцентралдаса гурелги сверухъ ругелщинал росабалъаго лъимал, гьезул эбел-эмен. Лъималазе г1умруялъ рак1алдаса унаредухъ жидехъа бажарарабщинаб ихтилат-кеп, лъималазе рек1елгъей гьабизе Мах1ачхъалаялдаса ах1ун бач1ун бук1ана «Креатив» группаги.

Лъималазда байрам баркизе рач1ун рук1ана райцентралъул г1уц1абазул нухмалъулел ва т1аде ах1арал х1урматиял гьалбал.

Гьай-гьай, байрамалда аслиял чаг1и рук1ана ихдалил т1угьдулг1адин рет1а-къарал лъимал.

Данделъаразда жиндирго ва Саг1ид Камиловичасул рахъалдасан байрамги баркун, районалъул бет1ерасул заместитель Асадг1али Г1абдуразакъовас абуна:

- Лъамал ккола жамаг1аталъулги, пачалихъалъулги, хъизаналъулги аслияб бечелъи. Жакъа нилъеца рак1алде щвезабулеб буго лъималазул ихтияр ц1униялъе, гьезул г1умру лъик1лъизабиялъе жавабияллъун ч1ах1иял рук1ине кколеблъи. Нилъер районалъ кидаго к1вар кьола лъимал Ват1ан бокьулеллъун куцаялде, гьезда халкъиял г1адатал малъиялде, гьел адаб, ях1-намус бугеллъун рахъинариялде. Нилъеца кинабго гьабизе ккола лъимал талих1аллъун рук1иналъе, гьезул гьурмаздаса рохалил гьими лъуг1ич1ого бук1иналъе.

КЦСПСД-ялъул нухмалъулесул заместитель Г1абдулмаликов Г1абдулмаликицаги баркана киназдаго байрам. Жиндирго к1алъалда гьес абуна:

- «Лъимал – г1умрудул т1угьдул, гьезул бук1ине ккола талих1аб лъимерлъи» абурал раг1аби ц1акъ берцин рихьула дида. Лъималазул талих1 г1емерисеб мехалъ бараб бук1уна улбузда, учительзабазда, тарбиячаг1азда ва медицинаялъул х1алт1ухъабазда. Ахириял соназда пачалихъалъ к1удияб к1вар кьолеб буго лъималазде тарбия кьеялъул рахъалъ улбузул жавабчилъи ц1ик1к1инабиялде, бесдал лъимал хъизамазде, ва лъималазул рукъзабахъе ккезариялде.

 Г1абдулмаликица жиндирго баркиялдаса хадуб лъималазе бицана цойги лъик1аб рохалил хабарги: - Араб соналъ нилъер лъималазе щвеч1о риидалил заманаялъ х1ухьбахъиялъул лагеразде ине. Исана рач1ун руго бат1и-бат1иял лагеразде ч1обого путевкаби, ине бокьарал лъимал рач1ине  бегьула нижехъе жидерго документалги росун, ан абуна гьес.

Байрамалде жидерго кьурдабигун, куч1дулгун махсарабазул х1аялгун цере рахъана Хунзахъ

№ 1 ва № 3, Г1обода ясли-ахазул, Бакьагьеч1и гьоркьохъеб школалъул, Расул  Г1амирхановасул гьит1инал акрабатазул церерахъиназ х1айран гьаруна байрамалде рач1арал.

Гьайгьай гьит1ичазе ц1акъ бокьана гьоболлъухъ бач1араб «Креатив» къукъаялъул церерахъинги. Лъимал гьезда цадахъ кьурдана, куч1дул ах1ана, расандана.

Байрамалъул ахиралда районалъул администрациялъул рахъалдасан киналго лъималазе кьуна къиматал сайгъатал, гьуинлъаби.

Лъималазул аваданаб релъи,гьезул гьурмазда талих1алъул гьими, гьеб бук1ана байрамалъе т1адег1анаб къимат.

Ниж киналго лъималазул улбузул рахъалдасанги к1удияб баркала буго г1олилазул политикаялъул бет1ерай специалист Шамай Мух1амадовнаялъе ва гьединго гьединаб берцинаб, гьайбатаб тадбир лъималазе г1уц1аралщиназе.

У. Къурамух1амадова.