Г1адатлъун батухъе, август моц1алъул ахиралда районалъул лъай кьеялъул х1алт1ухъаби данделъула араб ц1алул соналъул х1асилалги гьаризе, ц1ияб соналда цереч1арал масъалабазулги бицине, хадубккун гьабизе-тезелъул дандги базе. Гьедин араб хамиз къоялъ райадминистрациялъул данделъабазул залалда т1обит1ана районалъул педагогазул августалъулаб совещание.

Г1ахьаллъаразда т1аде щолеб бугеб ц1ияб ц1алул сонги баркун, х1алт1улъ жеги ч1ах1иял бергьенлъаби щвей мурад бук1инги загьир гьабун данделъи рагьана районалъул лъай кьеялъул ва г1олилазул политикаялъул отделалъул нухмалъулев Г1умаров Залимханица. Гьес къокъго бицана совещаниялъул х1алт1ул программаялъул, лъай-хъвай гьабуна т1аде рач1арал гьалбадерилгун. Гьелдаса хадуб хехаб ишалъулаб сапаралъ вахъине кколев вугилан раг1иги босун, г1ун бач1унеб г1елалъе лъайгун тарбия кьеялъул киналго рахъал гъорлъе рачараб гъваридаб маг1наялъул к1алъай гьабуна районалъул бет1ер С. Юсуповас педагогазда цебе. Ясли-ахалда тарбия кьеялдаса бахъараб 11 классги лъуг1ун ц1ияб г1умруялде щулияб гали т1амулел т1адег1анаб культураялъул ва камилаб лъай щварал г1олилал куцай бугин хъизамалъулги школалъулги ва т1олабго жамаг1аталъулги аслияб масъалаян бихьизабуна Саг1ид Камилевичас. Арал ЕГЭ, ГИАязул, ц1алул соналъ районалда ва республикаялда т1орит1арал олимпиадабазул, ц1алдохъабазулгун педагогазул конкурсазул х1асилазул, ц1ияб ц1алул соналъ школалда цереч1арал масъалабазул бицараб г1ат1идаб доклад бук1ана лъай кьеялъул отделалъул нухмалъулесулги. Жиде-жидер бут1аялда цебет1ураб лъик1алъул бицун, х1алт1ул х1албихьи г1ахьал гьабун к1алъана методцентралъул х1алт1ухъаби, цо-цо учительзаби. Масала, ИМЦялъул методист Г1амирханова Хатиматица бицана школалда цебесеб лъай кьеялъулъ ккарал хиса-басиязул, гьаб соналдаса садиказда тарбиячаг1и х1алт1изе раг1ула ц1ияб программаялда рекъон, школалде иналде гьит1ичазул бук1ине кколила хасаб байбихьулаб лъай. Гьелъ т1адч1ей гьабуна росабалъ ясли-ахазда ругел г1унгут1абаздаги, бусен-къаялде г1унт1унги басралъун хисизе заман щун бук1иналда. «Росдал школалъул шарт1азда ЕГЭялде х1адурлъи» абураб темаялда жидерго х1албихьиялъул бицун к1алъана Лъаг1илухъ гьоркьохъеб школалъул г1урус мац1алъул учительница Г1усманова Пат1имат.

Данделъиялда г1ахьаллъана Дагъистан республикаялъул халкъияв учитель, Бакьагьеч1и гьоркьохъеб школалъул директор Мух1амадов Т1инч1авги. Исана школалъе гьабураб капиталияб ремонталъухъ районалъул т1алъиялъе баркалаги кьун, педагогазе малъа-хъваял, насих1атал гьарураб бук1ана лъай кьеялъул гьев ветеранасул к1алъайги.

Лъай кьеялъул отделалъул нухмалъулес баркала кьуна г1емер соназ школазе нухмалъиги гьабун ц1ияб ц1алул соналда г1олохъанал, бажари бугел г1уц1арухъабазе бак1ги тун х1алхьиялде арал цо-цо директорзабазе. Гьел ккола Г1оч1лоса Сайгидах1мадов Басир, Моч1охъа Нурмух1амадов Мух1амад, Колоса Х1усенов Мух1амад, Гьамущиса Мух1амадсайгидов Шагьрудин, Уздалросулъа Сиражудинов Хайрула ва Г1арани лицеялдаса Х1амзатов Мух1амад. Араб ц1алул соналъ тарбия-лъай кьеялда, хасго ЕГЭ, ГИА кьолаго ц1алдохъабаз рихьизарурал лъик1ал х1асилазе г1оло баркалаялдалъун к1одо гьаруна Лъаг1илухъ, Сивухъ, Г1ахьалч1и, Г1обода ва Т1агьада школазул нухмалъулелги. Жиндирго к1алъаялдаса хадуб ДРялъул лъай кьеялъул министерствалъул вакил Халидов Темирханицаги кьуна Г1ободаса М. Муъминовасе, Лъаг1илухъа П. Г1усмановалъе ва ИМЦялъул методист И. Исмаг1иловасе министерствалъул Х1урматалъул грамотаби. Г1арцулал сайгъатал рук1ана районалъул лъай кьеялъул профкомалъул рахъалдасанги. Данделъиялъул ахиралда школазул директорзабазда гьоркьобги бук1ана гьит1инабго семинар. Гьеб ана пайдаяб, цоцазда рич1ч1иялъул ах1вал-х1алалда.

Р. Х1амзатов.