Дагьал церег1ан къояз Хунзахъ Ш. Шамхаловасул ц1аралда бугеб культураялъул к1алг1аялда т1обит1ана Дагъистаналъул искусствабазул мустах1икъав х1алт1ухъан Мусалаев Жамал рак1алде щвезавиялъул мурадалда районалъул школлъималазда гьоркьоб «Полет сокола» абураб кьурдабазул конкурс. Конкурс г1уц1ун бук1ана районалъул пагьму-гьунар бугел лъималазул централъу специалистаз. Тадбирги рагьун к1алъазе яхъана районалъул культураялъул отделалъул нухмалъулей Ирайгьанат Мух1амадова. Гьелъ бицана Жамалил исскуствоялде бук1араб рокьул ва гьесул зах1маталъулаб г1умрудул нухалъул х1акъалъулъ. Хадуб байбихьана конкурсалде. Гьениб г1ахьаллъи гьабуна районалъул 12 школалъул ц1алдохъабаз. Конкурс бикьун бук1ана лъабго бут1аялде: цо-цоккун, к1ирекъон ва къокъабиккун кьурдулезде. Лъималаз бихьизабуна жидерго бат1и-бат1иял кьурдабазе бугеб махщел. Конкурсалъул х1асилалда цо-цоккун кьурдулезда гьоркьоб т1оцебесеб бак1 щвана Гьамущи гьоркьохъеб школалъул ц1алдохъан Г1ащикъова Г1айшатие к1иабилеб босана Т1агьада гьоркьохъеб школалъул ц1алдохъан Зайнулг1абидова Пат1иматица, лъабабилеб бак1 ккуна Хьиндахъ гьоркьохъеб школалъул ц1алдохъан Шапиева Хадижатица.
К1ирекъон кьурдулезда гьоркьоб т1оцебесеб бак1 босана Гьоц1алъ гьоркьохъеб школалъул ц1алдохъан Нурмух1амадова Майяца ва Мусалаев Мух1амадица, к1иабилеб бак1 ккуна Лъаг1илухъ гьоркьохъеб школалъул ц1алдохъаби Г1абдулмуъминов Мух1амадица ва Х1адисова Хатиматица, лъабабилеб бак1алъе мустах1икълъана Г1ахьалч1и гьоркьохъеб школалъул ц1алдохъаби Мух1амадов Мурад ва Ахсагова Урузманг.
Къокъабиккун кьурдулезда гьоркьоб бергьенлъи босана Г1ахьалч1и росдал гьоркьохъеб школалъул ц1алдохъабаз,к1иабилеб ва лъабабилеб бак1азе мустах1икълъана Бакьагьеч1и ва Гьоц1алъ гьоркьохъел школазул ц1алдохъаби.
И. Мух1амадов
|